ਛੋਟੇ ਭਰਾ ਨੂੰ ਕੁੱਟਮਾਰ ਤੋਂ ਬਚਾਉਣ ਗਏ ਵੱਡੇ ਭਰਾ ਦੇ ਢਿੱਡ ’ਚ ਮਾਰੀ ਗੋਲੀ

ਅੰਮ੍ਰਿਤਸਰ, 22 ਜੂਨ (ਰੇਸ਼ਮ ਸਿੰਘ)-ਛੋਟੇ ਭਰਾ ਦੀ ਕੁਝ ਨੌਜਵਾਨਾਂ ਵਲੋਂ ਕੁੱਟਮਾਰ ਤੋਂ ਬਚਾਉਣ ਗਏ ਇਕ ਨੌਜਵਾਨ ਦੇ ਦੂਜੀ ਧਿਰ ਦੇ ਵਿਅਕਤੀ ਵਲੋਂ ਢਿੱਡ ‘ਚ ਗੋਲੀ ਮਾਰ ਕੇ ਜ਼ਖਮੀ ਕਰ ਦਿੱਤਾ ਜਦੋਂ ਕਿ ਹਮਲਾਵਰ ਫਰਾਰ ਹੋ ਗਏ। ਪੁਲਿਸ ਵਲੋਂ ਮਾਮਲਾ ਦਰਜ ਕਰਕੇ ਮੁਲਜਮਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਇਥੇ ਨਿੱਜੀ ਹਸਪਤਾਲ ‘ਚ ਜ਼ੇਰੇ ਇਲਾਜ ਹਰਦੀਪ ਸਿੰਘ ਵਾਸੀ ਬਾਬਾ ਦੀਪ ਸਿੰਘ ਕਾਲੋਨੀ ਫਤਿਹਗੜ੍ਹ ਚੂੜੀਆਂ ਰੋਡ ਨੇ ਥਾਣਾ ਸਦਰ ਦੀ ਪੁਲਿਸ ਨੂੰ ਦੱਸਿਆ ਕਿ ਉਹ ਬੀਤੇ ਦਿਨੀ ਆਪਣੇ ਕੰਮ ਤੋਂ ਘਰ ਵਾਪਸ ਆ ਰਿਹਾ ਸੀ ਜਦੋਂ ਕਿ ਸ਼ਾਮ ਸਾਢੇ 6 ਵਜੇ ਉਸਦੇ ਛੋਟੇ ਭਰਾ ਜਗਦੀਪ ਸਿੰਘ ਦਾ ਫੋਨ ਆਇਆ ਕਿ ਇਕ ਨੌਜਵਾਨ ਜਿਸ ਦਾ ਨਾਮ ਟਾਂਗਾ ਹੈ ਅਤੇ ਉਸਦੇ ਸਾਥੀਆਂ ਨੇ ਉਸਨੂੰ ਫਤਿਗਹੜ੍ਹ ਚੂੜੀਆਂ ਰੋਡ ‘ਤੇ ਇਕ ਖਾਲੀ ਪਲਾਟ ‘ਚ ਘੇਰਿਆ ਹੋਇਆ ਹੈ। ਉਹ ਦਸੀ ਜਗ੍ਹਾ ‘ਤੇ ਪੁੱਜ ਗਿਆ ਤੇ ਟਾਂਗੇ ਨੂੰ ਪੁੱਛਿਆ ਕਿ ਕੀ ਗੱਲ ਹੋਈ ਹੈ ਪਰ ਉਸਨੇ ਉਸਦੀ ਕੋਈ ਗੱਲ ਨਹੀਂ ਸੁਣੀ ਅਤੇ ਆਪਣਾ ਅਸਲਾ ਡੱਬ ਵਿਚੋਂ ਕੱਢ ਕੇ 2 ਹਵਾਈ ਫਾਇਰ ਕੀਤੇ ਤੇ ਫਿਰ ਮਾਰ ਦੇਣ ਦੀ ਨੀਅਤ ਨਾਲ ਇਕ ਫਾਇਰ ਕੀਤਾ ਜੋ ਉਸਦੇ ਢਿੱਡ ‘ਚ ਲਗਿਆ ਤੇ ਉਹ ਡਿੱਗ ਪਿਆ। ਉਸਦੇ ਭਰਾ ਨੇ ਉਸਨੂੰ ਅਮਨਦੀਪ ਹਸਪਤਾਲ ਵਿਖੇ ਦਾਖਲ ਕਰਵਾਇਆ। ਜਿਥੇ ਉਸਦਾ ਇਲਾਜ਼ ਚਲ ਰਿਹਾ ਹੈ। ਇਸ ਹਮਲੇ ਦੀ ਵੱਜ੍ਹਾ ਰੰਜਿਸ਼ ਇਹ ਦੱਸੀ ਗਈ ਹੈ ਕਿ ਟਾਂਗੇ ਤੇ ਉਸਦੇ ਸਾਥੀਆਂ ਨੇ ਉਸਦੇ ਭਰਾ ਜਗਦੀਪ ਸਿੰਘ ਨੂੰ ਬਹੁਤ ਕੁਟਿਆ ਸੀ ਤੇ ਜਦੋਂ ਉਹ ਪੁਛਣ ਗਿਆ ਤਾਂ ਉਨ੍ਹਾਂ ਤੈਸ਼ ‘ਚ ਆ ਕੇ ਗੋਲੀ ਮਾਰ ਦਿੱਤੀ। ਪੁਲਿਸ ਵਲੋਂ ਮਾਮਲਾ ਦਰਜ ਕਰਕੇ ਮੁਲਜ਼ਮਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।