ਪੱਟੀ, 28 ਜੂਲਾਈ (ਕੁਲਵਿੰਦਰਪਾਲ ਸਿੰਘ ਕਾਲੇਕੇ, ਅਵਤਾਰ ਸਿੰਘ ਖਹਿਰਾ)-ਪੰਜਾਬ ਸਰਕਾਰ ਵਲੋਂ ਚਲਾਈ ਗਏ ਆਪ੍ਰੇਸ਼ਨ ‘ਕਾਸੋ’ ਅਧੀਨ ਪ੍ਰਹਾਰ ਮੁਹਿੰਮ ਤਹਿਤ ਜ਼ਿਲ੍ਹਾ ਪੁਲਿਸ ਤਰਨ ਤਾਰਨ ਦੇ ਐਸ.ਐਸ.ਪੀ. ਸੁਰਿੰਦਰ ਲਾਂਬਾ ਦੀਆਂ ਹਦਾਇਤਾ ’ਤੇ ਅੱਜ ਟਰੈਫਿਕ ਪੁਲਿਸ ਸੈੱਲ ਪੱਟੀ ਦੇ ਇੰਚਾਰਜ ਥਾਣੇਦਾਰ ਹਰਪ੍ਰੀਤ ਸਿੰਘ ਵਲੋਂ ਪੁਲਿਸ ਪਾਰਟੀ ਸਮੇਤ ਪੱਟੀ ਦੇ ਪੁਰਾਣੀ ਕਚਹਿਰੀ ਰੋਡ ਦੇ ਨਜ਼ਦੀਕ ਫਾਟਕਾਂ ’ਤੇ ਵਾਹਨਾਂ ਦੀ ਚੈਕਿੰਗ ਕੀਤੀ ਗਈ। ਇਸ ਮੌਕੇ ਟ੍ਰੈਫਿਕ ਪੁਲਿਸ ਇੰਚਾਰਜ ਥਾਣੇਦਾਰ ਹਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਪੰਜਾਬ ਸਰਕਾਰ ਅਤੇ ਡੀ.ਜੀ.ਪੀ. ਪੰਜਾਬ ਵਲੋਂ ਸਮੁੱਚੇ ਪੰਜਾਬ ਵਿਚ ਚਲਾਈ ਗਈ ਇਹ ਮੁਹਿੰਮ ਤਹਿਤ ਸਮਾਜ ਵਿਰੋਧੀ ਅਨਸਰਾਂ ਨੂੰ ਨੱਥ ਪਾਉਣ ਲਈ ਚੈਕਿੰਗ ਅਭਿਆਨ ਚਲਾਇਆ ਜਾ ਰਿਹਾ ਹੈ। ਇਸ ਮੌਕੇ ਉਨ੍ਹਾਂ ਨੇ ਇਲਾਕਾ ਵਾਸੀਆਂ ਨੂੰ ਅਪੀਲ ਕੀਤੀ ਕਿ ਆਪਣੇ ਵਾਹਣ ਘਰੋਂ ਬਾਹਰ ਲਿਆਉਣ ਸਮੇਂ ਵਾਹਨ ਦੇ ਕਾਗਜਾਤ, ਡਰਾਈਵਿੰਗ ਲਾਈਸੰਸ ਅਤੇ ਆਵਾਜਾਈ ਦੇ ਨਿਯਮਾਂ ਦੀ ਪਾਲਣਾ ਕਰਨੀ ਬਹੁਤ ਜ਼ਰੂਰੀ ਹੈ। ਇਸ ਮੌਕੇ ਉਨ੍ਹਾਂ ਨੇ ਦੱਸਿਆ ਕਿ ਸਮੇਂ-ਸਮੇਂ ’ਤੇ ਸਕੂਲਾਂ ਦੇ ਪ੍ਰਿੰਸੀਪਲਾਂ ਨਾਲ ਮੀਟਿੰਗਾਂ ਕਰਕੇ ਵੀ ਜਾਣੂ ਕਰਾਇਆ ਗਿਆ ਹੈ ਕਿ ਬੱਚਿਆਂ ਨੂੰ ਘਰ੍ਹਾਂ ਤੋਂ ਸਕੂਲ ਲੈ ਕੇ ਆਉਣ ਵਾਲੀਆਂ ਬੱਸਾਂ ਦੇ ਕਾਗਜਾਤ ਮੁਕੰਮਲ ਰੱਖੇ ਜਾਣ, ਬੱਸਾਂ ਵਿਚ ਆਕਸੀਜਨ ਸਿਲੰਡਰ ਦਾ ਪ੍ਰਬੰਧ ਹੋਵੇ, ਬੱਸ ਚਾਲਕ ਯੂਨੀਫਾਰਮ ਵਿਚ ਹੋਵੇ, ਹਰੇਕ ਬੱਸ ਵਿਚ ਫਿਟਨਿਸ ਸਾਰਟੀਫਿਕੇਟ ਹੋਵੇ, ਬੀਮਾਂ ਲਾਜਮੀ ਹੋਵੇ, ਪ੍ਰਦੂਸ਼ਨ ਜਰੂਰੀ ਹੋਵੇ, ਛੋਟੇ ਬੱਚਿਆਂ ਲਈ ਇਕ ਹੈਲਪਰ ਵੀ ਜ਼ਰੂਰ ਹੋਵੇ ਅਤੇ ਕੋਈ ਵੀ ਡਰਾਇਵਰ ਬੱਸ ਨੂੰ ਕਿਸੇ ਵੀ ਰਸਤੇ ਵਿਚ ਰੋਕ ਕੇ ਬੱਚੇ ਨਾ ਉਤਾਰੇ, ਸਗੋਂ ਇਕ ਪਾਸੇ ’ਤੇ ਬੱਸ ਰੋਕ ਕੇ ਬੱਚਿਆਂ ਨੂੰ ਉਤਾਰਿਆ ਜਾਵੇ। ਇਸ ਮੌਕੇ ਪਾਲ ਸਿੰਘ, ਕੁਲਵਿੰਦਰ ਸਿੰਘ ਪੰਜਾਬ ਹੋਮ ਗਾਰਡ ਦੇ ਜਵਾਨ ਹਾਜ਼ਰ ਸਨ।
