ਲੁਧਿਆਣਾ, 5 ਮਾਰਚ (ਜਸਵਿੰਦਰ ਸਿੰਘ)-ਗੁਰੂ ਅੰਗਦ ਦੇਵ ਵੈਟਰਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ ਨੇ ਡਾਇਲੈਸਿਸ ਯੂਨਿਟ ਵਿਖੇ ਕੁੱਤਿਆਂ ਵਿਚ ਡਾਇਲੈਸਿਸ ਤਕਨੀਕਾਂ 'ਤੇ 5 ਰੋਜ਼ਾ ਇੰਡੋ-ਕੋਰੀਅਨ ਉਨਤ ਹੱਥੀਂ ਸਿਖਲਾਈ ਕਾਰਜਸ਼ਾਲਾ ਦਾ ਸਫਲਤਾਪੂਰਵਕ ਪ੍ਰਬੰਧ ਕਰਕੇ ਆਲਮੀ ਵੈਟਰਨਰੀ ਕਲੀਨੀਕਲ ਸਿੱਖਿਆ ਵਿਚ ਇਕ ਨਵਾਂ ਇਤਿਹਾਸਕ ਪੰਨਾ ਲਿਖਿਆ ਹੈ | ਦੱਖਣੀ ਕੋਰੀਆ ਤੋਂ 7 ਵੈਟਰਨਰੀ ਡਾਕਟਰ ਇਹ ਉਨਤ ਸਿਖਲਾਈ ਪ੍ਰਾਪਤ ਕਰਨ ਲਈ ਪਹੁੰਚੇ, ਇਸ ਪਹਿਲਕਦਮੀ ਨੂੰ ਅੰਤਰਰਾਸ਼ਟਰੀ ਵਿਗਿਆਨਕ ਸਹਿਯੋਗ ਅਤੇ ਸਮਰੱਥਾ ਨਿਰਮਾਣ ਵਿਚ ਇਕ ਮੀਲ ਪੱਥਰ ਵਾਂਗ ਗਿਣਿਆ ਗਿਆ ਹੈ | ਸਿਖਲਾਈ ਪ੍ਰੋਗਰਾਮ ਰਾਹੀਂ ਇਕ ਅਨੁਭਵੀ ਸਿਖਲਾਈ ਮੰਚ ਪ੍ਰਦਾਨ ਕੀਤਾ ਗਿਆ, ਜਿਸ ਵਿਚ ਵਿਹਾਰਕ ਕੇਸ ਪ੍ਰਦਰਸ਼ਨ, ਲਾਈਵ ਕਲੀਨੀਕਲ ਕੇਸ ਚਰਚਾ, ਹੱਥੀਂ ਡਾਇਲੈਸਿਸ ਪ੍ਰਕਿਰਿਆਵਾਂ, ਵਿਚਾਰ-ਵਟਾਂਦਰਾ ਵਿਗਿਆਨਕ ਸੈਸ਼ਨ, ਅਤੇ ਗੁਰਦੇ ਬਦਲਣ ਵਾਲੀਆਂ ਥੈਰੇਪੀਆਂ ਅਤੇ ਨੈਫਰੋਲੋਜੀ 'ਤੇ ਢਾਂਚਾਗਤ ਗਿਆਨ-ਸਾਂਝਾ ਕਰਨਾ ਸ਼ਾਮਿਲ ਸੀ | ਡਾ. ਜਤਿੰਦਰ ਪਾਲ ਸਿੰਘ ਗਿੱਲ, ਉਪ-ਕੁਲਪਤੀ ਨੇ ਕਿਹਾ ਕਿ ਕਾਰਜਸ਼ਾਲਾ ਨੇ ਡਾਇਲੈਸਿਸ ਯੂਨਿਟ ਟੀਮ ਦੀ ਅਸਾਧਾਰਨ ਕਲੀਨੀਕਲ ਮੁਹਾਰਤ, ਤਕਨੀਕੀ ਸਮਰੱਥਾ ਅਤੇ ਅਕਾਦਮਿਕ ਅਗਵਾਈ ਦਾ ਪ੍ਰਦਰਸ਼ਨ ਕੀਤਾ, ਜਿਸ ਨਾਲ ਇਹ ਉੱਨਤ ਵੈਟਰਨਰੀ ਕਿਡਨੀ ਤਬਾਦਲਾ ਥੈਰੇਪੀਆਂ ਲਈ ਇਕ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਕੇਂਦਰ ਬਣ ਗਿਆ ਹੈ | ਰਵਾਇਤੀ ਤੌਰ 'ਤੇ ਉੱਨਤ ਕਲੀਨੀਕਲ ਸਿਖਲਾਈ ਲਈ ਸਿੱਖਿਆਰਥੀ ਬਾਹਰ ਦੇ ਮੁਲਕਾਂ ਨੂੰ ਜਾਂਦੇ ਹਨ, ਪਰ ਇਸ ਕਾਰਜਸ਼ਾਲਾ ਨੇ ਪ੍ਰਵਾਹ ਨੂੰ ਉਲਟਾਅ ਦਿੱਤਾ ਅਤੇ ਅੰਤਰਰਾਸ਼ਟਰੀ ਪੇਸ਼ੇਵਰ ਭਾਰਤ ਵਿਚ ਅਤਿ-ਆਧੁਨਿਕ ਸਿਖਲਾਈ ਲੈਣ ਲਈ ਪਹੁੰਚੇ | ਇਹ ਭਾਰਤ ਦੀ ਕਲੀਨੀਕਲ ਉੱਤਮਤਾ ਅਤੇ ਤਕਨੀਕੀ ਸਮਰੱਥਾ ਦੀ ਵਧਦੀ ਵਿਸ਼ਵਵਿਆਪੀ ਮਾਨਤਾ ਨੂੰ ਦਰਸਾਉਂਦਾ ਹੈ | ਕਾਲਜ ਆਫ਼ ਵੈਟਰਨਰੀ ਸਾਇੰਸ ਦੇ ਡੀਨ ਡਾ. ਸਵਰਨ ਸਿੰਘ ਰੰਧਾਵਾ ਨੇ ਦੱਸਿਆ ਕਿ ਇਸ ਪ੍ਰਾਜੈਕਟ ਦਾ ਉਦੇਸ਼ ਡਾਇਲੈਸਿਸ ਯੂਨਿਟ ਨੂੰ ਇਕ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਵਿੱਦਿਅਕ ਕੇਂਦਰ ਵਜੋਂ ਸਥਾਪਿਤ ਕਰਨਾ ਹੈ | ਹਸਪਤਾਲ ਦੇ ਨਿਰਦੇਸ਼ਕ ਡਾ. ਜਤਿੰਦਰ ਮੋਹਿੰਦਰੂ ਨੇ ਇਸ ਪ੍ਰੋਗਰਾਮ ਨੂੰ ਕਲੀਨੀਕਲ ਮਿਆਰਾਂ ਨੂੰ ਉੱਚਾ ਚੁੱਕਣ ਲਈ ਇਕ ਵੱਡਾ ਮੀਲ ਪੱਥਰ ਕਿਹਾ | ਡਾ. ਰਣਧੀਰ ਸਿੰਘ ਇੰਚਾਰਜ ਡਾਇਲੈਸਿਸ ਯੂਨਿਟ ਅਤੇ ਸਿਖਲਾਈ ਨਿਰਦੇਸ਼ਕ, ਜਿਨ੍ਹਾਂ ਦੇ ਮੋਹਰੀ ਯੋਗਦਾਨ ਨੇ ਵੈਟਰਨਰੀ ਵਰਸਿਟੀ ਨੂੰ ਵਿਸ਼ਵ ਪੱਧਰ 'ਤੇ ਵੈਟਰਨਰੀ ਨੈਫਰੋਲੋਜੀ ਸਿੱਖਿਆ ਦੇ ਨਕਸ਼ੇ 'ਤੇ ਸਥਾਨ ਦਵਾਇਆ ਹੈ | ਉਨ੍ਹਾਂ ਨੇ ਡਾ. ਰਾਜਸੁਖਬੀਰ ਸਿੰਘ, ਡਾ. ਗੁਰਪ੍ਰੀਤ ਸਿੰਘ, ਡਾ. ਜਸਨੀਤ ਸਿੰਘ, ਡਾ. ਸਚਿਨ ਸਮੇਤ ਪ੍ਰਸਿੱਧ ਮਾਹਿਰਾਂ ਡਾ. ਵਿਕਾਸ ਮੱਕੜ, ਪ੍ਰੋਫੈਸਰ ਅਤੇ ਮੁਖੀ, ਨੈਫਰੋਲੋਜੀ ਵਿਭਾਗ, ਦਯਾਨੰਦ ਮੈਡੀਕਲ ਕਾਲਜ ਅਤੇ ਹਸਪਤਾਲ, ਲੁਧਿਆਣਾ ਅਤੇ ਕੋਨਕੁਕ ਯੂਨੀਵਰਸਿਟੀ, ਦੱਖਣੀ ਕੋਰੀਆ ਤੋਂ ਪ੍ਰੋਫੈਸਰ ਐਚ.ਐਮ. ਪਾਰਕ ਕੋਲੋਂ ਸਿਖਲਾਈ ਵਿਚ ਸਹਿਯੋਗ ਪ੍ਰਾਪਤ ਕੀਤਾ |
