ਲੁਧਿਆਣਾ, 19 ਜੁਲਾਈ (ਪਰਮਿੰਦਰ ਸਿੰਘ ਆਹੂਜਾ)-ਜਵੱਦੀ ਟਕਸਾਲ ਵਿਖੇ ਨਾਮ ਸਿਮਰਨ ਸਮਾਗਮ ‘ਚ ਜੁੜੀਆਂ ਸੰਗਤਾਂ ਸਨਮੁੱਖ ਮੌਜੂਦਾ ਮੁਖੀ ਸੰਤ ਬਾਬਾ ਅਮੀਰ ਸਿੰਘ ਨੇ ਗੁਰਮਤਿ ਵਿਚਾਰਾਂ ਦੀ ਸਾਂਝ ਪਾਉਂਦਿਆਂ ਸਮਝਾਇਆ ਕਿ ਗਿਆਨ ਖੰਡ ਪ੍ਰਕਾਸ਼ ਦਾ ਖੰਡ-ਸਮਝ ਸੂਝ ਦਾ ਖੰਡ ਹੈ। ਇਸ ਅਵਸਥਾ ਵਿਚ ਪਹੁੰਚ ਕੇ ਮਨੁੱਖ ਆਕਾਰਾਂ ਦਾ ਪੁਜਾਰੀ ਨਹੀਂ ਰਹਿ ਜਾਂਦਾ, ਵਿਅਕਤੀ ਦਾ ਪੁਜਾਰੀ ਵੀ ਨਹੀਂ ਰਹਿ ਜਾਂਦਾ ਕਿਉਂਕਿ ਉਸ ਨੂੰ ਚਾਨਣ ਦੇ ਖੰਡ ਵਿਚ ਪਹੁੰਚ ਕੇ ਐਸਾ ਪ੍ਰਤੀਤ ਹੋਣ ਲੱਗਦਾ ਹੈ ਕਿ ਅਵਤਾਰ ਵੀ ਤੁੱਛ ਹਨ। ਮਹਾਂਪੁਰਸ਼ਾਂ ਨੇ ਗੁਰਬਾਣੀ ਸ਼ਬਦ ਦੇ ਹਵਾਲੇ ਨਾਲ ਸਮਝਾਇਆ ਕਿ ਰੱਬ ਨਾਲ ਜੁੜਨ ਵਾਸਤੇ ਜੇਕਰ ਅਵਤਾਰ ਵੀ ਵਿਚਕਾਰ ਦੀਵਾਰ ਬਣੇ ਤਾਂ ਉਸ ਨੂੰ ਵੀ ਪਾਸੇ ਇਕ ਪਾਸੇ ਕਰ ਦਿਓ, ਇੱਥੇ ਪਹੁੰਚ ਕੇ ਹੀ ਇਹ ਸਮਝ ਪੈ ਜਾਂਦੀ ਹੈ ਕਿ ਪ੍ਰਮਾਤਮਾ ਵਿਅਕਤੀ ਨਹੀਂ ਉਹ ਇਕ ਪਰਮ ਸ਼ਕਤੀ ਹੈ ਅਤੇ ਉਸ ਸ਼ਕਤੀ ਤੋਂ ਕਿੱਡਾ ਵੱਡਾ ਪਸਾਰਾ ਹੈ। ਉਹ ਪ੍ਰਮਾਤਮਾ ਜੇਕਰ ਇਕ ਵਿਅਕਤੀ ਹੈ, ਉਸ ਦੀ ਕਲਪਨਾ ਇਕ ਥਾਂ ‘ਤੇ ਕਰਨੀ ਪਵੇਗੀ।
