ਲੁਧਿਆਣਾ, 23 ਜੁਲਾਈ (ਜਤਿੰਦਰ ਭੰਬੀ)-ਫੈਡਰੇਸ਼ਨ ਆਫ ਇੰਡਸਟਰੀਅਲ ਐਂਡ ਕਮਰਸ਼ੀਅਲ ਆਰਗੇਨਾਈਜ਼ੇਸ਼ਨ (ਫਿਕੋ) ਦਾ ਇਕ ਵਫ਼ਦ ਆਰਗੇਨਾਈਜ਼ੇਸ਼ਨ ਦੇ ਪ੍ਰਧਾਨ ਗੁਰਮੀਤ ਸਿੰਘ ਕੁਲਾਰ ਦੀ ਅਗਵਾਈ ਹੇਠ ਰਣਧੀਰ ਕੌਰ ਡਿਪਟੀ ਕਮਿਸ਼ਨਰ ਸਟੇਟ ਟੈਕਸ ਲੁਧਿਆਣਾ ਡਿਵੀਜ਼ਨ ਨੂੰ ਮਿਲਿਆ ਅਤੇ ਉਦਯੋਗਾਂ ਨਾਲ ਸੰਬੰਧਿਤ ਵੱਖ-ਵੱਖ ਕਰ ਸਬੰਧੀ ਮੁੱਦਿਆਂ ਬਾਰੇ ਇਕ ਮੰਗ-ਪੱਤਰ ਸੌਂਪਿਆ। ਵਫ਼ਦ ਵਿਚ ਰਾਜੀਵ ਜੈਨ, ਅਵਤਾਰ ਸਿੰਘ ਭੋਗਲ, ਸਤਨਾਮ ਸਿੰਘ ਮੱਕੜ, ਅਜੀਤ ਲਾਕੜਾ, ਯਾਦਵਿੰਦਰ ਸਿੰਘ ਮਣਕੂ ਅਤੇ ਦਿਨੇਸ਼ ਵਰਮਾ ਸ਼ਾਮਲ ਸਨ। ਇਸ ਮੌਕੇ ਉਨ੍ਹਾਂ ਲੰਬਿਤ ਜੀ.ਐਸ.ਟੀ. ਰਿਫੰਡਾਂ ਦਾ ਜਲਦ ਨਿਪਟਾਰਾ ,ਚਾਰ-ਪੜਾਅ ਵਾਲੀ ਜਾਂਚ ਪ੍ਰਕਿਰਿਆ ਨੂੰ ਸਰਲ ਬਣਾਇਆ ਜਾਵੇ, ਮੋਬਾਈਲ ਵਿੰਗ ਵਲੋਂ ਉਦਯੋਗਾਂ ਦੀ ਬੇਲੋੜੀ ਪਰੇਸ਼ਾਨੀ ਦਾ ਬੋਝ ਨਾ ਪਾਇਆ ਜਾਵੇ, ਇਨਵਰਟਡ ਡਿਊਟੀ ਸਟਰੱਕਚਰ ਦਾ ਤਰਕਸੰਗਤ ਹੱਲ ਕੱਢਣ ਸਬੰਧੀ ਗੱਲਬਾਤ ਕਰਦਿਆਂ ਕਿਹਾ ਕਿ ਸਾਈਕਲ, ਸਾਈਕਲ ਪਾਰਟਸ, ਸਿਲਾਈ ਮਸ਼ੀਨ, ਖੇਤੀਬਾੜੀ ਦੇ ਸੰਦ ਅਤੇ ਹੋਰ ਉਦਯੋਗਾਂ ਵਿਚ ਕੱਚੇ ਮਾਲ ‘ਤੇ 18 ਫ਼ੀਸਦੀ ਜੀ.ਐਸ.ਟੀ. ਅਤੇ ਤਿਆਰ ਮਾਲ ‘ਤੇ ਕੇਵਲ 5 ਫ਼ੀਸਦੀ ਜੀ.ਐਸ.ਟੀ. ਹੋਣ ਕਾਰਨ ਇਨਪੁੱਟ ਟੈਕਸ ਕਰੈਡਿਟ ਲਗਾਤਾਰ ਇਕੱਠਾ ਹੁੰਦਾ ਰਹਿੰਦਾ ਹੈ ਅਤੇ ਉਦਯੋਗਾਂ ਦੀ ਵਰਕਿੰਗ ਕੈਪੀਟਲ ਫਸ ਜਾਂਦੀ ਹੈ। ਫਿਕੋ ਨੇ ਇਸ ਮੁੱਦੇ ਨੂੰ ਉਚ ਅਧਿਕਾਰੀਆਂ ਕੋਲ ਉਠਾ ਕੇ ਜੀ.ਐਸ.ਟੀ. ਦਰਾਂ ਵਿਚ ਤਰਕਸੰਗਤ ਸੋਧ ਕਰਨ ਦੀ ਮੰਗ ਕੀਤੀ। ਇਸ ਮੌਕੇ ਰਣਧੀਰ ਕੌਰ ਡਿਪਟੀ ਕਮਿਸ਼ਨਰ ਸਟੇਟ ਟੈਕਸ ਲੁਧਿਆਣਾ ਡਿਵੀਜ਼ਨ ਨੇ ਵਫ਼ਦ ਨੂੰ ਭਰੋਸਾ ਦਿੱਤਾ ਕਿ ਲੰਬਿਤ ਰਿਫੰਡਾਂ ਅਤੇ ਪ੍ਰਕਿਰਿਆ ਨਾਲ ਸੰਬੰਧਿਤ ਅਸਲ ਸਮੱਸਿਆਵਾਂ ਧਿਆਨ ਨਾਲ ਸੁਣਿਆ।
