ਚੰਡੀਗੜ੍ਹ, 23 ਫ਼ਰਵਰੀ (ਕਪਿਲ ਵਧਵਾ)ਚੰਡੀਗੜ੍ਹ ਦੇ ਥਾਣਾ ਸੈਕਟਰ-31 ਦੀ ਟੀਮ ਨੇ ਬੀਤੀ ਰਾਤ ਵਾਪਰੇ ਇਰਾਦਾ ਕਤਲ ਦੇ ਮਾਮਲੇ ਵਿਚ ਦੋ ਮੁਲਜ਼ਮਾਂ ਨੂੰ ਕਾਬੂ ਕਰ ਲਿਆ, ਜਿਨ੍ਹਾਂ ਦੀ ਪਛਾਣ ਵਾਂਸ਼ੂ (19) ਵਾਸੀ ਇੰਦਰ ਆਵਾਸ ਕਾਲੋਨੀ, ਫੇਜ਼-1, ਰਾਮਦਰਬਾਰ ਅਤੇ ਅੰਕਿਤ (22) ਵਾਸੀ ਰਾਮਦਰਬਾਰ ਫੇਜ਼-2 ਵਜੋਂ ਹੋਈ ਹੈ | ਪੁਲਿਸ ਤੋਂ ਮਿਲੀ ਜਾਣਕਾਰੀ ਇਹ ਮਾਮਲਾ ਦੀਪਕ ਕੁਮਾਰ ਉਰਫ਼ ਦੀਪੂ ਵਾਸੀ ਹੱਲੋਮਾਜਰਾ ਦੀ ਸ਼ਿਕਾਇਤ 'ਤੇ ਦਰਜ ਕੀਤਾ ਗਿਆ | ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ 22-23 ਫ਼ਰਵਰੀ ਦੀ ਦਰਮਿਆਨੀ ਰਾਤ ਕਰੀਬ 12:30 ਵਜੇ ਉਹ ਆਪਣੇ ਸਾਥੀਆਂ ਵਰੁਣ ਮੋਗਲੀ ਅਤੇ ਤੁਸ਼ਾਰ ਨਾਲ ਇੰਦਰ ਆਵਾਸ, ਫੇਜ਼-1 ਰਾਮਦਰਬਾਰ ਸਥਿਤ ਕ੍ਰੇਚ ਦੇ ਨੇੜੇ ਮੋਟਰਸਾਈਕਲ ਲੈਣ ਗਏ ਸਨ | ਉੱਥੇ ਪਹਿਲਾਂ ਹੀ ਬੈਠੇ ਵਾਂਸ਼ੂ ਅਤੇ ਅੰਕਿਤ ਨੇ ਉਨ੍ਹਾਂ ਨੂੰ ਗਾਲ੍ਹਾਂ ਕੱਢਣੀਆਂ ਸ਼ੁਰੂ ਕਰ ਦਿੱਤੀਆਂ ਅਤੇ ਰਾਹ ਰੋਕ ਲਿਆ | ਦੋਸ਼ ਹੈ ਕਿ ਵਾਂਸ਼ੂ ਨੇ ਤੁਸ਼ਾਰ ਦੀ ਛਾਤੀ 'ਤੇ ਮੁੱਕਾ ਮਾਰਿਆ ਅਤੇ ਝਗੜਾ ਸ਼ੁਰੂ ਕਰ ਦਿੱਤਾ | ਇਸ ਤੋਂ ਬਾਅਦ ਵਾਂਸ਼ੂ ਅਤੇ ਉਸਦੇ 4-5 ਸਾਥੀ ਛੁਰੀ, ਤਲਵਾਰਾਂ, ਡੰਡਿਆਂ ਅਤੇ ਇੱਟਾਂ ਨਾਲ ਲੈਸ ਹੋ ਕੇ ਤੁਸ਼ਾਰ ਦੇ ਪਿੱਛੇ ਭੱਜੇ ਅਤੇ ਉਸ ਨੂੰ ਘੇਰ ਕੇ ਹਮਲਾ ਕਰ ਦਿੱਤਾ | ਵਾਂਸ਼ੂ ਨੇ ਕਈ ਵਾਰ ਉਸਤੇ ਛੁਰੀ ਨਾਲ ਵਾਰ ਕੀਤੇ ਜਦਕਿ ਹੋਰਾਂ ਨੇ ਤਲਵਾਰਾਂ ਅਤੇ ਡੰਡਿਆਂ ਦੀ ਵਰਤੋਂ ਕੀਤੀ | ਸ਼ਿਕਾਇਤਕਰਤਾ ਮੁਤਾਬਕ ਇਸੇ ਦੌਰਾਨ ਵਰੁਣ ਘਰ ਅੰਦਰੋਂ ਤਲਵਾਰ ਲੈ ਕੇ ਆਇਆ ਅਤੇ ਉਸ ਦੇ ਸਿਰ 'ਤੇ ਕਤਲ ਦੀ ਨੀਅਤ ਨਾਲ ਵਾਰ ਕੀਤਾ | ਹਮਲਾਵਰਾਂ ਨੇ ਉਨ੍ਹਾਂ ਨੂੰ ਜਾਨੋਂ ਮਾਰਣ ਦੀ ਧਮਕੀ ਦਿੰਦਿਆ ਮੌਕੇ ਤੋਂ ਫਰਾਰ ਹੋ ਗਏ | ਤਫ਼ਤੀਸ਼ ਦੌਰਾਨ ਪੁਲਿਸ ਨੇ ਦੋਵੇਂ ਮੁਲਜ਼ਮਾਂ ਨੂੰ ਗਿ੍ਫ਼ਤਾਰ ਕਰ ਲਿਆ ਹੈ ਅਤੇ ਉਨ੍ਹਾਂ ਨੂੰ ਅਦਾਲਤ ਵਿਚ ਪੇਸ਼ ਕਰਕੇ ਰਿਮਾਂਡ ਕੀਤਾ ਜਾਵੇਗਾ ਹੈ | ਪੁਲਿਸ ਮੁਤਾਬਕ ਵਾਂਸ਼ੂ ਖ਼ਿਲਾਫ਼ ਪਹਿਲਾਂ ਵੀ ਦੋ ਮਾਮਲੇ ਦਰਜ ਹਨ, ਜਿਨ੍ਹਾਂ ਵਿਚ ਧਾਰਾ 307 ਆਈ.ਪੀ.ਸੀ. ਸਮੇਤ ਗੰਭੀਰ ਧਾਰਾਵਾਂ ਸ਼ਾਮਲ ਹਨ | ਅੰਕਿਤ ਖ਼ਿਲਾਫ਼ ਵੀ ਪਹਿਲਾ ਤੋਂ ਇਕ ਮਾਮਲਾ ਦਰਜ ਹੈ | ਹੋਰ ਮੁਲਜ਼ਮਾਂ ਦੀ ਭਾਲ ਜਾਰੀ ਹੈ |
