ਚੰਡੀਗੜ੍ਹ, 24 ਮਈ (ਅਜੀਤ ਬਿਊਰੋ)- ਸਤਿਗੁਰੂ ਵਲੋਂ ਬਖ਼ਸ਼ੇ ਜਾ ਰਹੇ ਬ੍ਰਹਮਗਿਆਨ ਅਤੇ ਸਿੱਖਿਆਵਾਂ ਰਾਹੀਂ ਬੱਚਿਆਂ ਵਿੱਚ ਮਰਿਆਦਾ, ਅਨੁਸ਼ਾਸਨ, ਸ਼ੁਕਰਾਨਾ ਤੇ ਮਨੁੱਖਤਾ ਦੇ ਸੰਸਕਾਰ ਵਿਕਸਿਤ ਹੁੰਦੇ ਹਨ | ਅੱਜ ਦੇ ਯੁੱਗ ਵਿੱਚ ਜੇਕਰ ਬੱਚੇ ਸਤਸੰਗ ਤੇ ਸਤਿਗੁਰੂ ਦੀਆਂ ਸਿੱਖਿਆਵਾਂ ਨਾਲ ਜੁੜੇ ਰਹਿਣ ਤਾਂ ਉਹ ਸੰਸਾਰ ਅਤੇ ਦੇਸ਼ ਲਈ ਚੰਗੇ ਨਾਗਰਿਕ ਬਣ ਸਕਦੇ ਹਨ | ਇਹ ਵਿਚਾਰ ਅੱਜ ਇੱਥੇ ਸੰਤ ਨਿਰੰਕਾਰੀ ਸਤਸੰਗ ਭਵਨ, ਸੈਕਟਰ-15 ਵਿੱਚ ਕਰਵਾਏ ਪ੍ਰੇਰਣਾਦਾਇਕ ਬਾਲ ਸਮਾਗਮ ਦੌਰਾਨ ਵੱਡੀ ਗਿਣਤੀ ਵਿਚ ਹਾਜ਼ਰ ਬੱਚਿਆਂ, ਮਹਿਲਾਵਾਂ, ਨੌਜਵਾਨਾਂ ਤੇ ਬਜ਼ੁਰਗਾਂ ਨੂੰ ਸੰਬੋਧਨ ਕਰਦੇ ਹੋਏ ਮਨੀਮਾਜਰਾ ਦੇ ਮੁਖੀ ਅਮਰਜੀਤ ਸਿੰਘ ਨੇ ਪ੍ਰਗਟ ਕੀਤੇ | ਸਮਾਗਮ ਵਿਚ ਹਰ ਉਮਰ ਦੇ ਬੱਚਿਆਂ ਨੇ ਪਾਵਨ ਸੰਦੇਸ਼ਾਂ ਨੂੰ ਗੀਤ, ਕਵਿਤਾ, ਭਾਸ਼ਣ, ਕਵਾਲੀ, ਸਕਿੱਟ ਤੇ ਹੋਰ ਸੱਭਿਆਚਾਰਕ ਪ੍ਰਸਤੁਤੀਆਂ ਰਾਹੀਂ ਬਹੁਤ ਹੀ ਸੁੰਦਰ ਢੰਗ ਨਾਲ ਪੇਸ਼ ਕੀਤਾ |
