ਚੰਡੀਗੜ, 3 ਜੂਨ (ਰਾਮ ਸਿੰਘ ਬਰਾੜ) - ਹਰਿਆਣਾ ਸਰਕਾਰ ਰਾਜ ਦੇ ਛੇ ਜ਼ਿਲਿਆਂ ਵਿਚ ਲਗਭਗ 15.70 ਕਰੋੜ ਰੁਪਏ ਦੀ ਅੰਦਾਜ਼ਾ ਲਾਗਤ ਨਾਲ 26 ਨਵੀਆਂ ਸਰਕਾਰੀ ਆਯੁਰਵੈਦਿਕ ਡਿਸਪੈਂਸਰੀਆਂ ਦਾ ਨਿਰਮਾਣ ਕਰੇਗੀ | ਇਸ ਪਹਿਲਕਦਮੀ ਦਾ ਉਦੇਸ਼ ਆਯੁਸ਼ ਸਿਹਤ ਸੇਵਾ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨਾ ਅਤੇ ਪੇਂਡੂ ਖੇਤਰਾਂ ਵਿਚ ਰਵਾਇਤੀ ਸਿਹਤ ਸੇਵਾਵਾਂ ਤੱਕ ਲੋਕਾਂ ਦੀ ਪਹੁੰਚ ਵਿਚ ਸੁਧਾਰ ਕਰਨਾ ਹੈ | ਸਿਹਤ ਅਤੇ ਪਰਿਵਾਰ ਭਲਾਈ ਅਤੇ ਆਯੁਸ਼ ਵਿਭਾਗ ਦੀ ਵਧੀਕ ਮੁੱਖ ਸਕੱਤਰ ਡਾ. ਸੁਮਿਤਾ ਮਿਸ਼ਰਾ ਨੇ ਅੱਜ ਇੱਥੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਹ ਡਿਸਪੈਂਸਰੀਆਂ ਯਮੁਨਾਨਗਰ ਵਿਚ 10, ਮਹਿੰਦਰਗੜ ਵਿਚ 6, ਰੇਵਾੜੀ ਵਿਚ 5, ਕੁਰੂਕਸ਼ੇਤਰ ਵਿਚ 3, ਕਰਨਾਲ ਵਿਚ 1 ਅਤੇ ਗੁਰੂਗ੍ਰਾਮ ਵਿਚ 1 ਬਣਾਈਆਂ ਜਾਣਗੀਆਂ | ਅਨਾਵਰਤੀ ਨਾਗਰਿਕ ਕਾਰਜ ਸ਼੍ਰੇਣੀ ਦੇ ਤਹਿਤ ਇਸ ਪ੍ਰੋਜੈਕਟ ਦੀ ਕੁੱਲ ਲਾਗਤ 1,570.22 ਲੱਖ ਰੁਪਏ (15.70 ਕਰੋੜ ਰੁਪਏ) ਅਨੁਮਾਨਿਤ ਹੈ | ਡਾ. ਸੁਮਿਤਾ ਮਿਸ਼ਰਾ ਨੇ ਦੱਸਿਆ ਕਿ ਇਹਨਾਂ 26 ਸਰਕਾਰੀ ਆਯੁਰਵੈਦਿਕ ਡਿਸਪੈਂਸਰੀਆਂ ਦੇ ਨਿਰਮਾਣ ਲਈ ਲਾਗਤ ਅਨੁਮਾਨ ਹਰਿਆਣਾ ਦੇ ਵਿਕਾਸ ਅਤੇ ਪੰਚਾਇਤ ਵਿਭਾਗ ਤੋਂ ਪ੍ਰਾਪਤ ਹੋ ਚੁੱਕੇ ਹਨ | ਯਮੁਨਾਨਗਰ ਜ਼ਿਲੇ ਵਿਚ ਭਾਂਗੇਰਾ, ਤਾਜੇਵਾਲਾ, ਖੁਰਦਬਨ, ਤਲਕੌਰ, ਮਹੀਉਦੀਨਪੁਰ, ਦਾਰਪੁਰ, ਢਾਕਵਾਲਾ, ਦਾਦੂਪੁਰ ਹੈਡ, ਦਮੋਲੀ ਅਤੇ ਲੇੜਾ ਖਾਦਰ ਪਿੰਡਾਂ ਵਿਚ 10 ਡਿਸਪੈਂਸਰੀਆਂ ਬਣਾਈਆਂ ਜਾਣਗੀਆਂ, ਜਿਨਾਂ ਵਿਚੋਂ ਹਰੇਕ ਡਿਸਪੈਂਸਰੀ ਦੀ ਅਨੁਮਾਨਿਤ ਲਾਗਤ 59.17 ਲੱਖ ਰੁਪਏ ਹੈ | ਰੇਵਾੜੀ ਜ਼ਿਲੇ ਵਿਚ ਰੋਹਰਾਈ, ਝਾਬੂਆ, ਜੈ ਸਿੰਘਪੁਰ ਖੇੜਾ ਅਤੇ ਕਰਾਵਰਾ ਮਾਣਕਪੁਰ ਪਿੰਡਾਂ ਵਿਚ 59.17 ਲੱਖ ਰੁਪਏ ਪ੍ਰਤੀ ਡਿਸਪੈਂਸਰੀ ਦੀ ਲਾਗਤ ਨਾਲ ਚਾਰ, ਅਤੇ ਲੀਸਾਨ ਪਿੰਡ ਵਿਚ 59.00 ਲੱਖ ਰੁਪਏ ਦੀ ਲਾਗਤ ਨਾਲ ਇੱਕ ਡਿਸਪੈਂਸਰੀ ਬਣਾਈ ਜਾਵੇਗੀ | ਮਹਿੰਦਰਗੜ ਜ਼ਿਲੇ ਵਿਚ ਗੁੜਾ, ਬਾਵਨੀਆ, ਰਸੂਲਪੁਰ, ਬੁਚਾਵਾਸ, ਸੁਰਜਨਵਾਸ ਅਤੇ ਰਾਮਬਾਸ ਪਿੰਡਾਂ ਵਿਚ ਛੇ ਡਿਸਪੈਂਸਰੀਆਂ ਬਣਾਈਆਂ ਜਾਣਗੀਆਂ, ਜਿਨਾਂ ਵਿਚੋਂ ਹਰੇਕ ਡਿਸਪੈਂਸਰੀ ਦੀ ਨਿਰਮਾਣ ਲਾਗਤ 64.50 ਲੱਖ ਰੁਪਏ ਅਨੁਮਾਨਿਤ ਹੈ | ਗੁਰੂਗ੍ਰਾਮ ਜ਼ਿਲੇ ਵਿਚ ਸਹਜਾਵਸ ਪਿੰਡ ਵਿਚ 58.63 ਲੱਖ ਰੁਪਏ ਦੀ ਅਨੁਮਾਨਿਤ ਲਾਗਤ ਨਾਲ ਇੱਕ ਡਿਸਪੈਂਸਰੀ ਸਥਾਪਿਤ ਕੀਤੀ ਜਾਵੇਗੀ |
