ਡੇਰਾਬੱਸੀ ਵਿਖੇ ਘੱਗਰ ਦਾ ਪਾਣੀ ਖ਼ਤਰੇ ਦੇ ਨਿਸ਼ਾਨ ਤੋਂ ਉੱਪਰ ਪੁੱਜਿਆ
ਅਜੀਤ ਡੈਸਕ
11-07-2026
ਕਿਸੇ ਸਮੇਂ ਵੀ ਟੁੱਟ ਸਕਦੈ ਘੱਗਰ ‘ਤੇ ਬਣਿਆ ਕਾਜ਼ਵੇਅ- ਘੱਗਰ ਪਾਰ ਕਰਨ ਲਈ ਕਰੋੜਾਂ ਰੁ. ਖ਼ਰਚ ਕੇ ਬਣਾਇਆ ਕਾਜ਼ਵੇ ਕਿਸੇ ਸਮੇਂ ਵੀ ਟੁੱਟ ਸਕਦਾ ਹੈ। ਇਸ ਦੇ ਹੇਠੋਂ ਮਿੱਟੀ ਨਿਕਲਣ ਕਰਕੇ ਇਹ ਖੋਖਲਾ ਹੋ ਚੁੱਕਾ ਹੈ, ਪਰ ਇਸ ਦੇ ਬਾਵਜੂਦ ਇਸ ਦੇ ਉੱਪਰੋਂ ਵਾਹਨ ਨਿਕਲ ਰਹੇ ਹਨ। ਅਜਿਹੇ ‘ਚ ਹਰ ਸਮੇਂ ਜਾਨ-ਮਾਲ ਦਾ ਖ਼ਤਰਾ ਬਣਿਆ ਰਹਿੰਦਾ ਹੈ। ਕਰੀਬ ਢਾਈ ਸਾਲ ਪਹਿਲਾਂ ਆਏ ਹੜ੍ਹਾਂ ਦੌਰਾਨ ਕਾਜ਼ਵੇਅ ਦੇ ਹੇਠੋਂ ਮਿੱਟੀ ਨਿਕਲ ਗਈ ਸੀ, ਜਿਸ ਨੂੰ ਢਕੌਲੀ ਵਲੋਂ ਆਉਂਦੀ ਸੜਕ ਵਾਲੇ ਪਾਸੇ ਤੋਂ ਬੋਰੀਆਂ ਲਗਾ ਕੇ ਅਸਥਾਈ ਤੌਰ ‘ਤੇ ਠੀਕ ਕੀਤਾ ਗਿਆ ਸੀ, ਲੇਕਿਨ ਕਾਜ਼ਵੇਅ ਦੇ ਹੋਰਨਾਂ ਹਿੱਸਿਆਂ ‘ਤੇ ਕਿਸੇ ਵਲੋਂ ਧਿਆਨ ਨਹੀਂ ਦਿੱਤਾ ਗਿਆ। ਡੇਰਾਬੱਸੀ ਤੋਂ ਢਕੌਲੀ ਵੱਲ ਨੂੰ ਜਾਂਦੇ ਖੱਬੇ ਪਾਸੇ ਵੀ ਕਾਜ਼ਵੇਅ ਹੇਠ ਤੋਂ ਖਾਲੀ ਹੋ ਚੁੱਕਾ ਹੈ, ਜੋ ਕਿ ਡੇਰਾਬੱਸੀ ਦੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦੀ ਵੱਡੀ ਲਾਪ੍ਰਵਾਹੀ ਨੂੰ ਉਜਾਗਰ ਕਰਦਾ ਹੈ।
ਕਾਰ ਡਿੱਗਣ ਮਗਰੋਂ ਵੀ ਨਹੀਂ ਜਾਗੇ ਅਧਿਕਾਰੀ- ਕਾਜ਼ਵੇਅ ਦੇ ‘ਤੇ ਸੁਰੱਖਿਆ ਰੈਲਿੰਗ ਨਾ ਹੋਣ ਕਰਕੇ ਕੁਝ ਸਮਾਂ ਪਹਿਲਾਂ ਇਕ ਕਾਰ ਘੱਗਰ ‘ਚ ਡਿੱਗ ਚੁੱਕੀ ਹੈ। ਇਸ ਤੋਂ ਬਾਅਦ ਕਾਜ਼ਵੇਅ ‘ਤੇ ਆਰਜ਼ੀ ਪਿੱਲਰ ਬਣਾਏ ਗਏ ਸਨ, ਜੋ ਕਿ ਕੁਝ ਦਿਨਾਂ ਬਾਅਦ ਹੀ ਟੁੱਟ ਗਏ ਸਨ ਅਤੇ ਇਨ੍ਹਾਂ ਨੂੰ ਦੁਬਾਰਾ ਠੀਕ ਨਹੀਂ ਕੀਤਾ ਗਿਆ। ਇਸ ਤਰ੍ਹਾਂ ਪ੍ਰਸ਼ਾਸਨ ਦੀ ਲਾਪ੍ਰਵਾਹੀ ਕਿਸੇ ਸਮੇਂ ਵੀ ਵੱਡੇ ਹਾਦਸੇ ਦਾ ਕਾਰਨ ਬਣ ਸਕਦੀ ਹੈ। ਖੇਤਰ ਦੇ ਲੋਕਾਂ ਨੇ ਮੰਗ ਕੀਤੀ ਹੈ ਕਿ ਕਿਸੇ ਹਾਦਸੇ ਤੋਂ ਪਹਿਲਾਂ ਡੇਰਾਬੱਸੀ ਪ੍ਰਸ਼ਾਸਨ ਨੂੰ ਇਸ ਪਾਸੇ ਧਿਆਨ ਦਿੰਦੇ ਹੋਏ ਬਣਦੀ ਕਾਰਵਾਈ ਕਰਨੀ ਚਾਹੀਦੀ ਹੈ।
