ਨੰਗਲ, 8 ਮਈ (ਗੁਰਪ੍ਰੀਤ ਸਿੰਘ ਗਰੇਵਾਲ)- 'ਐਨ.ਜੀ.ਟੀ. ਦੀਆਂ ਸਖ਼ਤ ਹਿਦਾਇਤਾਂ ਦੇ ਬਾਵਜੂਦ ਸਵਾਂ ਨਦੀ ਅਤੇ ਹੋਰਨੀ ਥਾਈਾ ਹੋ ਰਹੀ ਨਜਾਇਜ਼ ਮਾਈਨਿੰਗ ਨੇ ਇਲਾਕੇ ਦਾ ਚੌਗਿਰਦਾ ਸੰਤੁਲਨ ਹੀ ਨਹੀਂ ਵਿਗਾੜਿਆ ਸਗੋਂ ਅਪਰਾਧ ਨੂੰ ਵੀ ਹੱਲਾਸ਼ੇਰੀ ਦਿੱਤੀ ਹੈ', ਇਹ ਵਿਚਾਰ ਪੰਜਾਬ ਕਾਂਗਰਸ ਦੇ ਬੁਲਾਰੇ ਸੁਖਦੇਵ ਸਿੰਘ, ਰੋਟੇਰੀਅਨ ਪਰਦੀਪ ਸੋਨੀ, ਡਾ. ਰਵਿੰਦਰ ਦੀਵਾਨ, ਰਾਜ ਸਿੰਘ, ਪਰਤਾਪ ਸੈਣੀ, ਦਿਲਬਾਗ ਸਿੰਘ ਚੰਦੇਲ ਨੇ ਇਕ ਪੱਤਰਕਾਰ ਸੰਮੇਲਨ ਦੌਰਾਨ ਪ੍ਰਗਟ ਕੀਤੇ | ਖੇੜਾ, ਕਲਮੋਟ, ਸੁਆੜਾ, ਭਲਾਣ, ਹਰਸਾ ਬੇਲਾ, ਅਗੰਮਪੁਰ ਆਦਿ ਥਾਵਾਂ ਤੋਂ ਹਰ ਰੋਜ਼ ਹਜ਼ਾਰਾਂ ਟਿੱਪਰ ਨਿਕਲ ਰਹੇ ਹਨ ਤੇ ਵੱਡੀ ਗਿਣਤੀ 'ਚ ਟਿੱਪਰਾਂ ਦੀਆਂ ਨੰਬਰ ਪਲੇਟਾਂ ਵੀ ਨਹੀਂ ਹਨ | ਅਸੀਂ ਜਨ ਚੇਤਨਾ ਮੰਚ ਵਲੋਂ ਨਜਾਇਜ਼ ਮਾਈਨਿੰਗ ਦਾ ਮੁੱਦਾ ਨਿਰੰਤਰ ਉਠਾਵਾਂਗੇਂ | ਸੁਖਦੇਵ ਸਿੰਘ ਨੇ ਸਪਸ਼ਟ ਕੀਤਾ ਕਿ ਜਨ ਚੇਤਨਾ ਮੰਚ ਕਾਂਗਰਸ ਪਾਰਟੀ ਵਿਰੁੱਧ ਜਾਂ ਵੱਖਰਾ ਫਰੰਟ ਨਹੀਂ ਕਿਉਂਕਿ ਇਸ 'ਚ ਸ਼ਾਮਿਲ ਆਗੂ ਕਾਂਗਰਸੀ ਵਿਚਾਰਧਾਰਾ ਦੇ ਹਨ | ਇੱਕ ਸਵਾਲ ਦੇ ਜਵਾਬ 'ਚ ਉਨ੍ਹਾਂ ਕਿਹਾ ਕਿ ਅਸੀਂ ਕਾਂਗਰਸ ਹਾਈ ਕਮਾਂਡ ਤੋਂ ਮੰਗ ਕਰਦੇ ਹਾਂ ਕਿ 2027 'ਚ ਵਿਧਾਨ ਸਭਾ ਟਿੱਕਟ ਲੋਕਲ ਉਮੀਦਵਾਰ ਨੂੰ ਦਿੱਤੀ ਜਾਵੇ | ਪੈਰਾਸ਼ੂਟ ਰਾਹੀਂ ਉਤਰਿਆ ਉਮੀਦਵਾਰ ਇਲਾਕੇ ਦਾ ਭਲਾ ਨਹੀਂ ਕਰ ਸਕਦਾ | ਜਨ ਚੇਤਨਾ ਮੰਚ ਨਿਧੱੜਕ ਲੀਡਰ ਗੌਰਵ ਰਾਣਾ ਤੇ ਐਡਵੋਕੇਟ ਪਰਮਜੀਤ ਪੰਮਾ ਦੇ ਨਾਲ ਹੈ ਜਿਹੜੇ ਨਿਰੰਤਰ ਹਿਮਾਚਲ ਐਂਟਰੀ ਟੈਕਸ ਵਿਰੁੱਧ ਸੰਘਰਸ਼ ਕਰ ਰਹੇ ਹਨ | ਨੇੜ ਭਵਿੱਖ 'ਚ ਹੋਣ ਵਾਲੀਆਂ ਨੰਗਲ ਨਗਰ ਕੌਂਸਲ ਬਾਰੇ ਸੁਖਦੇਵ ਸਿੰਘ ਨੇ ਕਿਹਾ ਕਿ ਪਾਰਟੀ ਹਾਈਕਮਾਂਡ ਨੂੰ ਬੇਨਤੀ ਹੈ ਕਿ ਟਿੱਕਟਾਂ ਅਸਲੀ ਕਾਂਗਰਸੀਆਂ ਨੂੰ ਹੀ ਦਿੱਤੀਆਂ ਜਾਣ | ਪੱਤਰਕਾਰ ਸੰਮੇਲਨ 'ਚ ਬੀ.ਬੀ.ਐਮ.ਬੀ. ਦੇ ਸੇਵਾ ਮੁਕਤ ਕਾਰਜਕਾਰੀ ਇੰਜੀਨੀਅਰ ਰਮੇਸ਼ ਕੁਮਾਰ, ਇੰਟਕ ਆਗੂ ਕਸ਼ਮੀਰੀ ਲਾਲ, ਉਮ ਪ੍ਰਕਾਸ਼, ਤਿਲਕ ਰਾਜ, ਕੇ.ਐਲ. ਬੁੱਧੀਰਾਜਾ ਆਦਿ ਹਾਜ਼ਰ ਸਨ |
