ਅਮਰੀਕਾ ਇਜ਼ਰਾਈਲ ਤੇ ਈਰਾਨ ਜੰਗ ਦਾ ਸਿੱਧਾ ਅਸਰ ਪੰਜਾਬ ਦੇ ਬਾਸਮਤੀ ਉਤਪਾਦਕ ਕਿਸਾਨਾਂ 'ਤੇ ਪਵੇਗਾ-ਡਾ. ਅਜਨਾਲਾ <br/>

ਅਜਨਾਲਾ, 3 ਮਾਰਚ (ਗੁਰਪ੍ਰੀਤ ਸਿੰਘ ਢਿੱਲੋਂ)-ਸਮਾਜ ਚਿੰਤਕ ਡਾ. ਸਤਨਾਮ ਸਿੰਘ ਅਜਨਾਲਾ ਸੂਬਾ ਪ੍ਰਧਾਨ ਜਮਹੂਰੀ ਕਿਸਾਨ ਸਭਾ ਨੇ ਪ੍ਰੈੱਸ ਨੂੰ ਬਿਆਨ ਜਾਰੀ ਕਰਦਿਆਂ ਦੱਸਿਆ ਕਿ ਅਮਰੀਕਾ ਆਪਣੀ ਆਧੁਨਿਕ ਜੰਗੀ-ਐਟਮੀ ਤਾਕਤ ਦੇ ਬਲਬੂਤੇ ਯੂ.ਐੱਨ.ਓ. ਦੇ ਸਾਰੇ ਜੰਗੀ ਅਸੂਲਾਂ ਤੇ ਪਰੰਪਰਾਵਾਂ ਨੂੰ ਛਿੱਕੇ 'ਤੇ ਟੰਗ ਕੇ ਦੁਨੀਆਂ ਭਰ ਦੀ ਕੋਈ ਪ੍ਰਵਾਹ ਨਾ ਕਰਦੇ ਹੋਏ 28 ਫਰਵਰੀ ਨੂੰ ਇਜ਼ਰਾਈਲ ਟਰੰਪ ਜੁੰਡਲੀ ਨੇ ਈਰਾਨ ਉੱਤੇ ਮਿਜ਼ਾਈਲਾਂ ਤੇ ਘਾਤਕ ਬੰਬਾਂ ਨਾਲ ਹਮਲਾ ਕਰਕੇ ਈਰਾਨ ਦੇ ਪ੍ਰਮੁੱਖ ਰਾਜਸੀ ਆਗੂਆਂ ਤੇ ਫ਼ੌਜੀ ਜਰਨੈਲਾਂ ਸਮੇਤ ਜਾਨ ਮਾਲ ਦਾ ਭਾਰੀ ਨੁਕਸਾਨ ਕਰ ਦਿੱਤਾ ਹੈ ਅਤੇ ਅੱਗੇ ਤੋਂ ਵੀ ਅਜਿਹੇ ਘਾਤਕ ਹਮਲੇ ਜਾਰੀ ਹਨ | ਉਨ੍ਹਾਂ ਕਿਹਾ ਕਿ ਜੇਕਰ ਇਹ ਲੜਾਈ ਅੱਗੇ ਵਧੀ ਤਾਂ ਤੇਲ ਦੀਆਂ ਕੀਮਤਾਂ 70 ਡਾਲਰ ਪ੍ਰਤੀ ਬੈਰਲ ਤੋਂ ਵੱਧ ਕੇ 100 ਡਾਲਰ ਹੋ ਜਾਵੇਗੀ ਜਿਸ ਨਾਲ ਭਾਰਤ ਦਾ ਦਰਾਮਦ ਬਿੱਲ 13-14 ਬਿਲੀਅਨ ਡਾਲਰ ਤੱਕ ਵੱਧ ਜਾਵੇਗਾ ਅਜਿਹਾ ਹੋਣ ਨਾਲ ਜਿੱਥੇ ਪੈਟਰੋਲ ਡੀਜ਼ਲ ਦੀਆਂ ਕੀਮਤਾਂ ਵਧਣਗੀਆਂ, ਸੋਨਾ ਹੋਰ ਮਹਿੰਗਾ ਹੋ ਜਾਵੇਗਾ ਅਤੇ ਹੋਰ ਪ੍ਰਚੂਨ ਵਸਤਾਂ ਹੋਰ ਮਹਿੰਗੀਆਂ ਹੋ ਜਾਣਗੀਆਂ ਅਤੇ ਕਾਲਾਬਾਜ਼ਾਰੀ ਜ਼ੋਰ ਫੜੇਗੀ, ਇਸ ਤੋਂ ਇਲਾਵਾ ਖੇਤੀ ਦੀ ਬਾਸਮਤੀ ਦੀ ਬਰਾਮਦ ਤੇ ਹੁਣੇ ਅਸਰ ਪੈਣਾ ਸ਼ੁਰੂ ਹੋ ਗਿਆ ਹੈ ਕਿਉਂਕਿ ਬਹੁਤੀ ਬਾਸਮਤੀ ਈਰਾਨ ਤੇ ਹੋਰ ਮੱਧ ਪੂਰਬ ਦੇਸ਼ਾਂ ਨੂੰ ਜਿਹੜੀ ਭੇਜੀ ਜਾ ਰਹੀ ਹੈ ਉਹ ਲੜਾਈ ਕਾਰਨ ਰਸਤਿਆਂ ਵਿਚ ਹੀ ਰੁਕ ਗਈ ਹੈ, ਜਿਸ ਦਾ ਸਿੱਧਾ ਅਸਰ ਪੰਜਾਬ ਦੇ ਬਾਸਮਤੀ ਉਤਪਾਦਕ ਕਿਸਾਨਾਂ 'ਤੇ ਪਵੇਗਾ |