ਗੱਗੋਮਾਹਲ, 22 ਜੁਲਾਈ (ਬਲਵਿੰਦਰ ਸਿੰਘ ਸੰਧੂ)- ਸਰਹੱਦੀ ਪਿੰਡ ਡਿਆਲ ਭੱਟੀ ਦੇ ਵਸਨੀਕ ਮਿਹਨਤ ਮਜ਼ਦੂਰੀ ਦਾ ਕੰਮ ਕਰਦੇ ਯਕੂਬ ਮਸੀਹ ਦਾ ਬੀਤੀ ਰਾਤ ਹੋਈ ਭਾਰੀ ਵਰਖਾ ਕਾਰਨ ਮਕਾਨ ਢਹਿ ਢੇਰੀ ਹੋ ਗਿਆ । ਮਕਾਨ ਅੰਦਰ ਯਕੂਬ ਮਸੀਹ ਸਮੇਤ ਉਨ੍ਹਾਂ ਦੀ ਪਤਨੀ ਤੇ ਪੁੱਤਰ ਸੁੱਤੇ ਹੋਏ ਸਨ, ਸਮੇਂ ਸਿਰ ਪਤਾ ਲੱਗਣ ਕਾਰਨ ਪਰਿਵਾਰ ਮਕਾਨ ਤੋਂ ਬਾਹਰ ਆ ਗਿਆ ਤੇ ਉਸੇ ਵਕਤ ਮਕਾਨ ਦੀ ਪੂਰੀ ਛੱਤ ਢਹਿ ਢੇਰੀ ਹੋ ਗਈ । ਮਕਾਨ ਅੰਦਰ ਪਿਆ ਘਰੇਲੂ ਸਾਮਾਨ ਵੀ ਬਰਬਾਦ ਹੋ ਗਿਆ । ਪਿੰਡ ਵਾਸੀਆਂ ਦੀ ਮਦਦ ਨਾਲ ਸਾਮਾਨ ਕੱਢਣ ਦੀ ਕੋਸ਼ਿਸ ਕੀਤੀ ਗਈ ਪ੍ਰੰਤੂ ਘਰ ਦਾ ਸਾਰਾ ਸਾਮਾਨ ਬੁਰੀ ਤਰ੍ਹਾਂ ਨੁਕਸਾਨਿਆ ਗਿਆ । ਮੌਕੇ ’ਤੇ ਪਹੁੰਚੇ ਪੇਂਡੂ ਮਜ਼ਦੂਰ ਯੂਨੀਅਨ ਪੰਜਾਬ ਦੇ ਪ੍ਰਧਾਨ ਸੈਮੂਏਲ ਹੰਸ ਚਮਿਆਰੀ ਨੇ ਪੰਜਾਬ ਸਰਕਾਰ ਤੇ ਸਿਵਲ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਇਸ ਗਰੀਬ ਪਰਿਵਾਰ ਦੀ ਮਦਦ ਕੀਤੀ ਜਾਵੇ ਤਾਂ ਜੋ ਇਹ ਘਰ ਦੀ ਛੱਤ ਬਣਾ ਸਕਣ । ਇਸ ਮੌਕੇ ਵਿੱਕੀ ਜੋਹਲ, ਖਾਲਕ ਮਸੀਹ, ਨਿਆਮਤ ਮਸੀਹ, ਵਿਲੀਅਮ ਮਸੀਹ, ਸੱਤਾ ਮਸੀਹ, ਸ਼ਿੰਦੋ, ਬੀਰੋ, ਕਮਲੇਸ਼ ਤੋਂ ਇਲਾਵਾ ਕਈ ਪਿੰਡ ਵਾਸੀ ਹਾਜ਼ਰ ਸਨ।
