ਰਾਜਪੁਰਾ, 28 ਜਨਵਰੀ (ਰਣਜੀਤ ਸਿੰਘ)-ਰਾਜਪੁਰਾ ਦੀ ਐਨ ਵੱਖੀ 'ਚ ਵਸੇ ਪਿੰਡ ਸ਼ਾਮਦੂ ਦੀ ਸੜਕ ਦਾ ਬਹੁਤ ਹੀ ਜ਼ਿਆਦਾ ਬੁਰਾ ਹਾਲ ਹੋਇਆ ਪਿਆ ਹੈ | ਹਲਕੇ ਵਿਚ ਹੋਈ ਬਾਰਸ਼ ਕਾਰਨ ਸੜਕ 'ਤੇ ਪਏ ਫੁੱਟ ਫੁੱਟ ਦੇ ਕਰੀਬ ਡੂੰਘੇ ਟੋਇਆਂ ਵਿਚ ਭਰੇ ਪਾਣੀ ਨੇ ਤਲਾਬ ਦਾ ਰੂਪ ਧਾਰ ਲਿਆ ਹੈ | ਸੜਕ 'ਤੇ ਖੜੇ ਪਾਣੀ ਕਾਰਨ ਰਾਹਗੀਰਾਂ ਦੇ ਨਾਲ ਨਾਲ ਸਕੂਲਾਂ ਵਿਚ ਜਾਣ ਆਉਣ ਵਾਲੇ ਬੱਚੇ ਅੱਜ ਸਕੂਲ ਨਹੀਂ ਜਾ ਸਕੇ | ਉਨ੍ਹਾਂ ਦਾ ਭਵਿਖ ਬਾਰਸ਼ ਦੇ ਪਾਣੀ ਵਿਚ ਡੁੱਬਦਾ ਨਜ਼ਰ ਆ ਰਿਹਾ ਹੈ ਜਦ ਕਿ ਸਰਕਾਰ ਅੱਖਾਂ ਦੇ ਪੱਟੀ ਬੰਨ੍ਹੀ ਬੈਠੀ ਸ਼ਾਇਦ ਕਿਸੇ ਵੱਡੀ ਅਣਹੋਣੀ ਦਾ ਇੰਤਜਾਰ ਕਰ ਰਹੀ ਹੈ | ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਸਾਬਕਾ ਵਿਧਾਇਕ ਹਰਦਿਆਲ ਸਿੰਘ ਕੰਬੋਜ਼ ਨੇ ਸ਼ਾਮਦੂ ਲਿੰਕ ਸੜਕ 'ਤੇ ਖੜੇ ਪਾਣੀ ਸੰਬੰਧੀ ਪੱਤਰਕਾਰਾਂ ਨੰੂ ਜਾਣਕਾਰੀ ਦਿੰਦੇ ਹੋਏ ਕੀਤਾ | ਹਰਦਿਆਲ ਸਿੰਘ ਕੰਬੋਜ਼ ਨੇ ਕਿਹਾ ਕਿ ਸਰਕਾਰ ਨੂੰ ਬਣਿਆ ਚਾਰ ਸਾਲ ਬੀਤ ਗਏ ਹਨ ਪਰ ਸ਼ਹਿਰ ਦੇ ਨਾਲ ਲੱਗਦੀ ਸੜਕ ਦਾ ਅਤਿ ਮੰਦਾ ਹਾਲ ਹੈ | ਇਸ ਸੜਕ ਤੋਂ ਦੀ ਹੋ ਕੇ ਲੰਘਣ ਵਾਲੇ ਲੋਕਾਂ ਦੀ ਜਿੰਦਗੀ ਨਰਕ ਭਰੀ ਬਣੀ ਪਈ ਹੈ | ਬਾਰਸ਼ ਦੇ ਖੜੇ ਪਾਣੀ ਕਾਰਨ ਅੱਜ ਜਿਆਦਾਤਰ ਸਕੂਲੀ ਬੱਚੇ ਸਕੂਲਾਂ ਵਿਚ ਨਹੀਂ ਗਏ ਅਤੇ ਇਕ ਤਰ੍ਹਾਂ ਨਾਲ ਸੱਤਾਧਾਰੀ ਧਿਰ ਦੀ ਕੁੰਭਕਰਨੀ ਨੀਂਦ ਕਾਰਨ ਬੱਚਿਆਂ ਦਾ ਭਵਿੱਖ ਪਾਣੀ ਵਿਚ ਡੁੱੱਬਣ ਕਿਨਾਰੇ ਪਹੁੰਚਿਆ ਪਿਆ ਹੈ | ਸ. ਕੰਬੋਜ਼ ਨੇ ਦੱਸਿਆ ਕਿ ਇਸੇ ਪਿੰਡ ਵਿਚ ਬੀਤੇ ਸਾਲ ਬਾਰਸ਼ ਦਾ ਗੰਦੇ ਪਾਣੀ ਲੋਕਾਂ ਦੇ ਘਰਾਂ ਵਿਚ ਜਾ ਵੜਿਆ ਸੀ ਅਤੇ ਇਸੇ ਕਾਰਨ ਡਾਇਰੀਆ ਫੈਲ ਗਿਆ ਸੀੇ ਜਿਸ ਕਾਰਨ ਕਈ ਮੋਤਾਂ ਹੋ ਗਈਆਂ ਸਨ | ਇਸ ਤੋਂ ਬਾਅਦ ਸਰਕਾਰ ਨੇ ਅੱਖਾਂ 'ਤੇ ਬੰਨੀ ਪੱਟੀ ਖੋਲੀ ਸੀ ਅਤੇ ਪਿੰਡ ਵਿਚ ਮੈੇੇਡੀਕਲ ਕੈਂਪ ਲਾ ਕੇ ਖਾਨਾ ਪੂਰਤੀ ਜਿਹੀ ਕੀਤੀ ਸੀ, ਕੰਬੋਜ਼ ਨੇ ਕਿਹਾ ਕਿ ਜਿਹੜੇ ਲੋਕੀ ਬਾਰਸ਼ ਦੇ ਗੰਦੇ ਪਾਣੀ ਕਾਰਨ ਅਣਆਈ ਮੋਤ ਮਾਰੇ ਗਏ ਸਨ ਉਨ੍ਹਾਂ ਦਾ ਕੌਣ ਜਿੰਮੇਵਾਰ ਹੈ | ਉਨ੍ਹਾਂ ਨੇ ਕਿਹਾ ਕਿ ਪ੍ਰਸ਼ਾਸ਼ਨ ਅਤੇ ਸਰਕਾਰ ਲੋਕਾਂ ਨੂੰ ਮੁੱਢਲੀਆਂ ਸਹੂਲਤਾਂ ਦੇਣ ਤੋਂ ਵੀ ਭੱਜ ਰਹੇ ਹਨ | ਸ. ਕੰਬੋਜ਼ ਨੇ ਦੱਸਿਆ ਕਿ ਹੁਣ ਵੀ ਪਾਣੀ ਲੋਕਾਂ ਦੇ ਘਰਾਂ ਅਤੇ ਗਲੀਆਂ ਵਿਚ ਦਾਖਲ ਹੋਇਆ ਪਿਆ ਹੈ | ਇਸ ਕਾਰਨ ਕਿਸੇ ਵਕਤ ਵੀ ਮਲੇਰੀਆ, ਡਾਇਰੀਆਂ ਜਾਂ ਕੋਈ ਹੋਰ ਘਾਤਕ ਬੀਮਾਰੀ ਸਿਰ ਚੁੱੱਕ ਸਕਦੀ ਹੈ | ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਸਰਕਾਰ ਨੇ ਅੱਖਾਂ 'ਤੇ ਬੰਨ੍ਹੀ ਪੱਟੀ ਨਾ ਖੋਲ੍ਹੀ ਤਾਂ ਕਾਂਗਰਸ ਪਾਰਟੀ ਵੱਡੇ ਪੱਧਰ 'ਤੇ ਮੋਰਚਾ ਖੋਲ੍ਹ ਦੇਵੇਗੀ | ਇਸ ਮੌਕੇ ਬਲਾਕ ਸੰਮਤੀ ਮੈਂਬਰ ਸੰਨੀ, ਸਾਬਕਾ ਸਰਪੰਚ ਗੌਰਵ, ਮਲਕੀਤ ਸਿੰਘ ਉਪਲਹੇੜੀ, ਗੁਰਪ੍ਰੀਤ ਸਿੰਘ ਜੰਡੋਲੀ ਅਤੇ ਸਾਬਕਾ ਸਰਪੰਚ ਰਣਜੀਤ ਅਤੇ ਹੋਰ ਪਾਰਟੀ ਵਰਕਰ ਹਾਜਰ ਸਨ |
