ਫ਼ਰੀਦਕੋਟ, 8 ਮਈ (ਜਸਵੰਤ ਸਿੰਘ ਪੁਰਬਾ)-ਮਾਂ ਦੇ ਪਿਆਰ, ਤਿਆਗ ਤੇ ਸਤਿਕਾਰ ਨੂੰ ਸਲਾਮ ਕਰਦੇ ਹੋਏ ਬਾਬਾ ਫ਼ਰੀਦ ਪਬਲਿਕ ਸਕੂਲ ਦੇ ਕਿੰਡਰਗਾਰਟਨ ਵਿੰਗ ਨੇ 'ਮਦਰਜ਼ ਡੇ' ਮੌਕੇ ਬਾਬਾ ਫ਼ਰੀਦ ਆਡੀਟੋਰੀਅਮ ਵਿਚ ਸ਼ਾਨਦਾਰ ਸਮਾਗਮ ਰਚਾਇਆ | ਇਸ ਮੌਕੇ ਰਾਜਪਾਲ ਕੌਰ ਸੇਖੋਂ ਬਤੌਰ ਮੁੱਖ ਮਹਿਮਾਨ ਅਤੇ ਵੀਨਾ ਰਾਣੀ-ਯੂਰੋਕਿਡਜ਼ ਤੇ ਮਿਸਿਜ਼ ਅੰਨਨਇਆ ਅਰੌੜਾ-ਡਿਜ਼ਨੀ ਵਰਲਡ, ਹਰਲੀਨ ਕੌਰ ਬਤੌਰ ਖਾਸ ਮਹਿਮਾਨ ਸ਼ਾਮਿਲ ਹੋਏ | ਨੰਨ੍ਹੇ ਬੱਚਿਆਂ ਨੇ ਨਾਚ, ਗੀਤ ਤੇ ਭਾਵੁਕ ਪੇਸ਼ਕਾਰੀਆਂ ਨਾਲ ਮਾਵਾਂ ਦੀਆਂ ਅੱਖਾਂ ਨਮ ਕਰ ਦਿੱਤੀਆਂ | ਸਮਾਗਮ ਦਾ ਆਗਾਜ਼ ਯੂ.ਕੇ.ਜੀ ਰੋਜ਼ ਸੈਕਸ਼ਨ ਦੇ ਬੱਚਿਆਂ ਦੇ ਮਨਮੋਹਕ ਵੈਲਕਮ ਡਾਂਸ ਨਾਲ ਹੋਇਆ | 'ਤੇਰੀ ਉਂਗਲੀ ਪਕੜ ਕੇ ਚੱਲਾ, 'ਜਨਮ ਜਨਮ ਓ ਮਾਂ' ਤੇ 'ਐਸੀ ਹੋਤੀ ਹੈ ਮਾਂ' ਵਰਗੀਆਂ ਪੇਸ਼ਕਾਰੀਆਂ ਨੇ ਪੂਰੇ ਆਡੀਟੋਰੀਅਮ ਨੂੰ ਭਾਵਨਾਵਾਂ ਦੇ ਰੰਗ ਵਿਚ ਰੰਗ ਦਿੱਤਾ | ਮਾਂ-ਬੱਚੇ ਦੀ ਜੋੜੀ ਵਲੋਂ ਰੈਂਪ ਵਾਕ ਤੇ ਖੇਡਾਂ ਨੇ ਮਾਹੌਲ ਨੂੰ ਤਾੜੀਆਂ ਨਾਲ ਗੂੰਜਾ ਦਿੱਤਾ | ਸਕੂਲ ਵਲੋਂ ਬੱਚਿਆਂ ਦੀ 100% ਸ਼ਮੂਲੀਅਤ ਯਕੀਨੀ ਬਣਾਈ ਗਈ, ਜਿਸ ਨਾਲ ਹਰ ਬੱਚੇ ਨੂੰ ਮੰਚ 'ਤੇ ਆਪਣੀ ਪ੍ਰਤਿਭਾ ਦਿਖਾਉਣ ਦਾ ਮੌਕਾ ਮਿਲਿਆ ਤੇ ਸਮਾਗਮ ਹੋਰ ਵੀ ਪ੍ਰਭਾਵਸ਼ਾਲੀ ਬਣਿਆ | ਅਜਿਹਾ ਉਪਰਾਲਾ ਬੱਚਿਆਂ ਦੀ ਸਰਵਪੱਖੀ ਸ਼ਖ਼ਸੀਅਤ ਦੇ ਵਿਕਾਸ ਲਈ ਬਾਬਾ ਫ਼ਰੀਦ ਸਕੂਲ ਦੀ ਖਾਸੀਅਤ ਹੈ | ਕਾ .ਪਿ੍ੰਸੀਪਲ ਸੁਖਦੀਪ ਕੌਰ ਨੇ ਕਿਹਾ ਕਿ ਮਾਂ ਬੱਚੇ ਦੀ ਪਹਿਲੀ ਅਧਿਆਪਕ ਹੈ | ਮਾਂ ਦਾ ਸਤਿਕਾਰ ਹਰ ਬੱਚੇ ਦਾ ਧਰਮ ਹੈ | ਅਜਿਹੇ ਸਮਾਗਮ ਬੱਚਿਆਂ ਵਿਚ ਸੰਸਕਾਰਾਂ ਦਾ ਬੀਜ ਬੀਜਦੇ ਹਨ | ਕਾ. ਵਾਈਸ ਪਿ੍ੰਸੀਪਲ ਹਰਸਿਮਰਨ ਕੌਰ ਨੇ ਕਿਹਾ ਕਿ ਮਾਂ ਦੀ ਕੁਰਬਾਨੀ ਨੂੰ ਸ਼ਬਦਾਂ ਵਿਚ ਬੰਨ੍ਹਣਾ ਨਾਮੁਮਕਿਨ ਹੈ | ਬੱਚਿਆਂ ਤੇ ਅਧਿਆਪਕਾਂ ਦੀ ਮਿਹਨਤ ਸ਼ਲਾਘਾਯੋਗ ਹੈ | ਵੱਡੀ ਗਿਣਤੀ ਵਿਚ ਪਹੁੰਚੇ ਮਾਪਿਆਂ ਨੇ ਬੱਚਿਆਂ ਦੀ ਪੇਸ਼ਕਾਰੀ ਨੂੰ ਸਲਾਹਿਆ ਤੇ ਇਸ ਪਲ ਨੂੰ ਕੈਮਰਿਆਂ ਵਿਚ ਕੈਦ ਕੀਤਾ |
