ਸਾਦਿਕ, 13 ਮਈ (ਗੁਰਭੇਜ ਸਿੰਘ ਚੌਹਾਨ)-ਬੀਤੀ ਰਾਤ ਸਾਦਿਕ-ਫ਼ਰੀਦਕੋਟ ਸੜਕ 'ਤੇ ਸਾਦਿਕ ਵਾਲੇ ਪਾਸਿਉਂ ਜਾ ਰਹੀ ਤੂੜੀ ਦੀ ਓਵਰਲੋਡ ਟਰੈਕਟਰ ਟਰਾਲੀ ਪਲਟ ਜਾਣ ਨਾਲ ਇਸ ਰਸਤੇ ਤੋਂ ਆਵਾਜਾਈ ਪੂਰੀ ਤਰ੍ਹਾਂ ਬੰਦ ਹੋ ਗਈ | ਟਰਾਲੀ ਪਲਟਣ ਦਾ ਕਾਰਨ ਰਾਤ ਸਮੇਂ ਕਿਸੇ ਵਹੀਕਲ ਨਾਲ ਸਾਈਡ ਲੱਗਣ ਕਾਰਨ ਇਹ ਘਟਨਾ ਵਾਪਰੀ ਲੱਗਦੀ ਹੈ ਪਰ ਟਰੈਕਟਰ ਚਾਲਕ ਦਾ ਬਚਾਅ ਹੋਇਆ ਦੱਸਿਆ ਜਾ ਰਿਹਾ ਹੈ | ਪਲਟੀ ਟਰਾਲੀ ਦੇ ਬਰਾਬਰੋਂ ਲੰਘਣ ਦੀ ਕੋਸ਼ਿਸ਼ ਕਰ ਰਿਹਾ ਇਕ ਘੋੜਾ ਟਰਾਲਾ ਸੜਕ 'ਤੇ ਪਲਟੀ ਟਰਾਲੀ ਦੇ ਐਨ ਬਰਾਬਰ ਆ ਕੇ ਫ਼ਸ ਗਿਆ ਜੋ ਸਾਦਿਕ ਵਾਲੇ ਪਾਸਿਉਂ ਹੀ ਲੋਡ ਹੋਇਆ ਫ਼ਰੀਦਕੋਟ ਵੱਲ ਜਾ ਰਿਹਾ ਸੀ | ਇਸ ਕਾਰਨ ਰਸਤਾ ਪੂਰੀ ਤਰ੍ਹਾਂ ਬੰਦ ਹੋ ਗਿਆ ਅਤੇ ਪਾਸੇ ਦੀ ਲੰਘਣ ਲਈ ਕੋਈ ਥਾਂ ਨਹੀਂ ਬਚੀ | ਇਸ ਰਸਤੇ ਤੋਂ ਆਵਾਜਾਈ ਬਹਾਲ ਰੱਖਣ ਲਈ ਇਸ ਹਾਦਸੇ ਦੇ ਥੋੜ੍ਹਾ ਪਿੱਛੇ ਸਾਦਿਕ ਵਾਲੇ ਪਾਸੇ ਤੋਂ ਇਕ ਲਿੰਕ ਰੋਡ ਜੋ ਗੁਰਦੁਆਰਾ ਬਾਉਲੀ ਸਾਹਿਬ ਨੂੰ ਜਾਂਦੀ ਹੈ, ਉਸ ਰਸਤੇ ਤੋਂ ਅੱਗੇ ਚੁਰਾਹੇ ਤੋਂ ਖੱਬੇ ਮੁੜਕੇ ਪਿੰਡ ਮਹਿਮੂਆਣਾ ਵਿਚ ਦੀ ਆਵਾਜਾਈ ਚੱਲ ਰਹੀ ਹੈ | ਹਾਲਾਤਾਂ ਮੁਤਾਬਿਕ ਰਸਤਾ ਜਲਦੀ ਖੁੱਲ੍ਹਣਾ ਨਹੀਂ, ਕਿਉਂਕਿ ਤੂੜੀ ਉਤਾਰਕੇ ਨਵੀਂ ਟਰਾਲੀ ਵਿਚ ਭਰਕੇ ਫੇਰ ਹੀ ਪਲਟੀ ਟਰਾਲੀ ਸਿੱਧੀ ਹੋਵੇਗੀ ਤਾਂ ਹੀ ਕਿਤੇ ਜਾਕੇ ਰਸਤਾ ਬਹਾਲ ਹੋ ਸਕਣਾ ਹੈ |
