ਪੰਜਾਬ / ਜਨਰਲ

ਲਸ਼ਕਰ-ਏ-ਤਾਇਬਾ ਪਾਕਿ 'ਚ 'ਜਲ ਅੱਤਵਾਦੀ ਨੈੱਟਵਰਕ' ਨੂੰ ਕਰ ਰਿਹਾ ਸਰਗਰਮ ਅੱਤਵਾਦੀਆਂ ਨੂੰ ਪਾਣੀ ਰਸਤੇ ਘੁਸਪੈਠ ਤੇ ਸਮੁੰਦਰੀ ਹਮਲਿਆਂ ਲਈ ਕੀਤਾ ਜਾ ਰਿਹਾ ਤਿਆਰ <br/>

ਲਸ਼ਕਰ-ਏ-ਤਾਇਬਾ ਤੇ ਜੰਮੂ-ਕਸ਼ਮੀਰ ਯੂਨਾਈਟਿਡ ਮੂਵਮੈਂਟ ਵਲੋਂ ਚਲਾਏ ਜਾ ਰਹੇ ਪਾਣੀ ਆਧਾਰਿਤ ਸਿਖਲਾਈ ਕੈਂਪ ਦਾ ਦਿ੍ਸ਼ | ਤਸਵੀਰ ਰਾਹੀਂ : ਸੁਰਿੰਦਰ ਕੋਛੜ <br/> 05-01-2026

ਅੰਮਿ੍ਤਸਰ, 4 ਜਨਵਰੀ (ਸੁਰਿੰਦਰ ਕੋਛੜ)-ਮੁੰਬਈ ਹਮਲਿਆਂ ਦੇ ਸਾਜ਼ਿਸ਼ਕਾਰ ਮੌਲਾਨਾ ਹਾਫ਼ਿਜ਼ ਸਈਦ ਦੀ ਅਗਵਾਈ ਵਾਲਾ ਲਸ਼ਕਰ-ਏ-ਤੋਇਬਾ ਸਮੂਹ ਪਾਕਿਸਤਾਨ 'ਚ ਜਲ ਅੱਤਵਾਦੀ ਨੈੱਟਵਰਕ ਨੂੰ ਸਰਗਰਮ ਕਰ ਰਿਹਾ ਹੈ | ਖ਼ੁਫ਼ੀਆ ਰਿਪੋਰਟ 'ਚ ਖ਼ੁਲਾਸਾ ਹੋਇਆ ਹੈ ਕਿ ਲਸ਼ਕਰ-ਏ-ਤੋਇਬਾ ਅਤੇ ਇਸ ਦਾ ਸਹਿਯੋਗੀ ਸੰਗਠਨ ਜੇ. ਕੇ. ਯੂ. ਐੱਮ. (ਜੰਮੂ-ਕਸ਼ਮੀਰ ਯੂਨਾਈਟਿਡ ਮੂਵਮੈਂਟ) ਯੋਜਨਾਬੱਧ ਢੰਗ ਨਾਲ ਪੂਰੇ ਪਾਕਿਸਤਾਨ 'ਚ ਵਿਸ਼ਾਲ ਗੁਪਤ ਜਲ ਅੱਤਵਾਦੀ ਸਮਰੱਥਾ ਬਣਾ ਰਿਹਾ ਹੈ | ਇਨ੍ਹਾਂ ਅੱਤਵਾਦੀ ਸੰਗਠਨਾਂ ਵਲੋਂ ਇਸ ਨੈੱਟਵਰਕ ਨੂੰ ਖ਼ਾਸ ਤੌਰ 'ਤੇ ਘੁਸਪੈਠ ਅਤੇ ਸਮੁੰਦਰੀ ਅੱਤਵਾਦੀ ਹਮਲਿਆਂ ਲਈ ਤਿਆਰ ਕੀਤਾ ਜਾ ਰਿਹਾ ਹੈ | ਖ਼ੁਫ਼ੀਆ ਰਿਪੋਰਟ ਅਨੁਸਾਰ ਲਸ਼ਕਰ ਕੋਲ ਹੁਣ ਏਸ਼ੀਆ ਦੇ ਕਿਸੇ ਵੀ ਹੋਰ ਅੱਤਵਾਦੀ ਸੰਗਠਨ ਨਾਲੋਂ ਵਧੇਰੇ ਸਿਖਲਾਈ ਪ੍ਰਾਪਤ ਸਕੂਬਾ ਗੋਤਾਖੋਰ ਅਤੇ ਪੇਸ਼ੇਵਰ ਤੈਰਾਕ ਹਨ | ਇਸ ਬਾਰੇ ਸਾਹਮਣੇ ਆਈਆਂ ਵੀਡੀਓਜ਼ 'ਚ ਸਪਸ਼ਟ ਵਿਖਾਈ ਦੇ ਰਿਹਾ ਹੈ ਕਿ ਕਈ ਵੱਡੇ ਪਾਕਿਸਤਾਨੀ ਸ਼ਹਿਰਾਂ ਅਤੇ ਪਾਕਿਸਤਾਨ ਦੇ ਕਬਜ਼ੇ ਵਾਲੇ ਕਸ਼ਮੀਰ (ਪੀ. ਓ. ਕੇ.) 'ਚ ਲਗਾਤਾਰ ਪਾਣੀ ਆਧਾਰਿਤ ਸਿਖਲਾਈ ਕੈਂਪ ਚਲਾਏ ਜਾ ਰਹੇ ਹਨ | ਉਕਤ ਰਿਪੋਰਟ 'ਚ ਇਹ ਵੀ ਕਿਹਾ ਗਿਆ ਹੈ ਕਿ ਸੁਰੱਖਿਆ ਏਜੰਸੀਆਂ ਦੇ ਧਿਆਨ ਤੋਂ ਬਚਣ ਲਈ ਨਕਲੀ ਜਲ ਬਚਾਅ ਅਤੇ ਰਾਹਤ ਕਾਰਜਾਂ ਦੀ ਆੜ 'ਚ ਤੈਰਾਕੀ ਅਤੇ ਗ਼ੋਤਾਖ਼ੋਰੀ ਦੇ ਕੋਰਸ ਖੁੱਲ੍ਹੇਆਮ ਕਰਵਾਏ ਜਾ ਰਹੇ ਹਨ | ਇਨ੍ਹਾਂ ਸਿਖਲਾਈ ਸਥਾਨਾਂ 'ਤੇ ਬਿਨਾਂ ਕਿਸੇ ਪਾਬੰਦੀ ਦੇ ਸਪੀਡ ਬੋਟਾਂ ਅਤੇ ਆਧੁਨਿਕ ਤੇ ਮਹਿੰਗੇ ਸਕੂਬਾ ਉਪਕਰਨਾਂ ਦੀ ਵਰਤੋਂ ਕੀਤੀ ਜਾ ਰਹੀ ਹੈ | ਸੁਰੱਖਿਆ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਕੋਈ ਮਾਨਵਤਾਵਾਦੀ ਜਾਂ ਬਚਾਅ ਕਾਰਜ ਨਹੀਂ ਹੈ, ਸਗੋਂ ਸਿੱਧੀ ਲੜਾਈ ਦੀ ਤਿਆਰੀ ਹੈ, ਜਿਸ ਦਾ ਉਦੇਸ਼ ਸਮੁੰਦਰੀ ਰਸਤੇ ਰਾਹੀਂ ਘੁਸਪੈਠ ਕਰਨਾ ਅਤੇ ਭਵਿੱਖ 'ਚ ਵੱਡੇ ਹਮਲੇ ਕਰਨਾ ਹੈ | ਮਾਹਿਰਾਂ ਦਾ ਇਹ ਵੀ ਮੰਨਣਾ ਹੈ ਕਿ ਉਕਤ ਅੱਤਵਾਦੀ ਸੰਗਠਨਾਂ ਦੀ ਇਹ ਕਾਰਵਾਈ ਦਰਸਾਉਂਦੀ ਹੈ ਕਿ ਅੱਤਵਾਦੀ ਖ਼ਤਰਾ ਹੁਣ ਜ਼ਮੀਨੀ ਸਰਹੱਦਾਂ ਤੱਕ ਸੀਮਤ ਨਹੀਂ ਹੈ, ਸਗੋਂ ਪਾਣੀ ਅਤੇ ਸਮੁੰਦਰੀ ਮੋਰਚਿਆਂ ਤੱਕ ਵੀ ਤੇਜ਼ੀ ਨਾਲ ਫੈਲ ਰਿਹਾ ਹੈ |