ਵ੍ਹਾਈਟ ਹਾਊਸ ਦੇ ਨੇੜੇ ਗੋਲੀਬਾਰੀ 'ਚ ਸ਼ੱਕੀ ਹਲਾਕ

ਅ

ਅਜੀਤ ਡੈਸਕ 06-05-2026

ਵਾਸ਼ਿੰਗਟਨ ਡੀ.ਸੀ., 5 ਮਈ (ਇੰਟ.)-ਸੀਕਰੇਟ ਸਰਵਿਸ ਦੇ ਅਧਿਕਾਰੀਆਂ ਨੇ ਸੋਮਵਾਰ ਨੂੰ ਵ੍ਹਾਈਟ ਹਾਊਸ ਦੇ ਨੇੜੇ ਇਕ ਹਥਿਆਰਬੰਦ ਵਿਅਕਤੀ ਨੂੰ ਮੁਕਾਬਲੇ ਦੌਰਾਨ ਮਾਰ ਦਿੱਤਾ | ਇਸ ਮੁਕਾਬਲੇ 'ਚ ਇਕ ਨਾਬਾਲਗ ਦੇ ਵੀ ਜ਼ਖਮੀ ਹੋਣ ਦੀ ਖ਼ਬਰ ਹੈ | ਇਹ ਘਟਨਾ ਵ੍ਹਾਈਟ ਹਾਊਸ ਦੇ ਦੱਖਣ ਵਿਚ ਕੁਝ ਬਲਾਕਾਂ 'ਚ ਨੈਸ਼ਨਲ ਮਾਲ ਦੇ ਨਾਲ ਤੇ ਵਾਸ਼ਿੰਗਟਨ ਸਮਾਰਕ ਦੇ ਨੇੜੇ ਵਾਪਰੀ, ਜਦੋਂ ਗਸ਼ਤ 'ਤੇ ਮੌਜੂਦ ਸਾਦੇ ਕੱਪੜਿਆਂ ਵਾਲੇ ਏਜੰਟਾਂ ਨੇ ਇਕ ਸ਼ੱਕੀ ਵਿਅਕਤੀ ਦੀ ਪਛਾਣ ਕੀਤੀ ਜਿਸ ਕੋਲ ਬੰਦੂਕ ਸੀ | ਸੀਕਰੇਟ ਸਰਵਿਸ ਦੇ ਡਿਪਟੀ ਡਾਇਰੈਕਟਰ ਮੈਥਿਊ ਕੁਇਨ ਨੇ ਇਕ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਸ਼ੱਕੀ ਦੇ ਕੋਲ ਹਥਿਆਰ ਦੇਖਣ ਤੋਂ ਬਾਅਦ ਏਜੰਟਾਂ ਨੇ ਵਰਦੀਧਾਰੀ ਸੀਕਰੇਟ ਸਰਵਿਸ
ਪੁਲਿਸ ਤੋਂ ਸਹਾਇਤਾ ਮੰਗੀ | ਇਸ ਦੌਰਾਨ ਸ਼ੱਕੀ ਨੇ ਏਜੰਟਾਂ ਤੇ ਅਧਿਕਾਰੀਆਂ 'ਤੇ ਗੋਲੀਆਂ ਚਲਾ ਦਿੱਤੀਆਂ | ਸੀਕਰੇਟ ਸਰਵਿਸ ਦੇ ਅਧਿਕਾਰੀਆਂ ਵਲੋਂ ਕੀਤੀ ਗਈ ਜਵਾਬੀ ਗੋਲੀਬਾਰੀ ਦੌਰਾਨ ਸ਼ੱਕੀ ਮਾਰਿਆ ਗਿਆ | ਉਨ੍ਹਾਂ ਦੱਸਿਆ ਕਿ ਨਾਬਾਲਗ ਖਤਰੇ ਤੋਂ ਬਾਹਰ ਹੈ, ਉਸਦਾ ਹਸਪਤਾਲ 'ਚ ਇਲਾਜ ਕੀਤਾ ਜਾ ਰਿਹਾ ਸੀ | ਜਦੋਂ ਇਹ ਘਟਨਾ ਵਾਪਰੀ, ਉਸ ਸਮੇਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵ੍ਹਾਈਟ ਹਾਊਸ ਵਿਚ ਮੌਜੂਦ ਸਨ ਤੇ ਇਕ ਸਮਾਗਮ ਵਿਚ ਹਿੱਸਾ ਲੈ ਰਹੇ ਸਨ |