ਪੰਜਾਬ ਦੀ ਧੀ ਹਰਪ੍ਰੀਤ ਕੌਰ ਨੇ ਜਿੱਤਿਆ ‘ਮਿਸ ਕੈਨੇਡੀਅਨ ਵਰਲਡਵਾਈਡ 2026-2027’ ਦਾ ਤਾਜ

ਹੁਣ ਫਰਾਂਸ ਦੇ ਅੰਤਰਰਾਸ਼ਟਰੀ ਮੰਚ ’ਤੇ ਚਮਕੇਗੀ ਪੰਜਾਬ ਦੀ ਸ਼ਾਨ
ਭੂੰਦੜੀ, 22 ਜੂਨ (ਕੁਲਦੀਪ ਸਿੰਘ ਮਾਨ)– ਪੰਜਾਬ ਦੇ ਲੁਧਿਆਣਾ ਵਿਚ ਜਨਮੀ ਅਤੇ ਸਾਬਕਾ ਸੈਨਿਕ ਕਰਮਜੀਤ ਸਿੰਘ ਦੀ ਧੀ ਹਰਪ੍ਰੀਤ ਕੌਰ ਨੇ ਕੈਨੇਡਾ ਵਿਚ ਕਰਵਾਏ ਪ੍ਰਸਿੱਧ ਕੈਨੇਡਾ ਲਾਤੀਨਾ ਐਂਡ ਵਰਲਡ ਸੁੰਦਰਤਾ ਮੁਕਾਬਲੇ ਵਿਚ ‘ਮਿਸ ਕੈਨੇਡੀਅਨ ਵਰਲਡਵਾਈਡ 2026–2027’ ਦਾ ਖਿਤਾਬ ਜਿੱਤ ਕੇ ਪੰਜਾਬ, ਭਾਰਤ ਅਤੇ ਵਿਸ਼ਵ ਭਰ ਵਿਚ ਵੱਸਦੇ ਪੰਜਾਬੀਆਂ ਦਾ ਮਾਣ ਵਧਾਇਆ ਹੈ। ਪੰਜਾਬ ਦੀ ਮਿੱਟੀ ਵਿਚ ਪਲੀ ਹਰਪ੍ਰੀਤ ਕੌਰ ਦਾ ਇਹ ਸਫ਼ਰ ਮਿਹਨਤ, ਸੰਘਰਸ਼ ਅਤੇ ਦ੍ਰਿੜ ਇਰਾਦੇ ਦੀ ਪ੍ਰੇਰਣਾਦਾਇਕ ਮਿਸਾਲ ਹੈ। ਕੈਨੇਡਾ ਵਿਚ ਪਰਵਾਸ ਕਰਨ ਤੋਂ ਬਾਅਦ ਉਸ ਨੇ ਤਕਨੀਕੀ ਅਤੇ ਕਾਰੋਬਾਰੀ ਖੇਤਰ ਵਿਚ ਆਪਣੀ ਵੱਖਰੀ ਪਛਾਣ ਬਣਾਈ ਅਤੇ ਫਿਰ ਅੰਤਰਰਾਸ਼ਟਰੀ ਸੁੰਦਰਤਾ ਮੁਕਾਬਲਿਆਂ ਦੇ ਮੰਚ ਤੱਕ ਪਹੁੰਚ ਕੇ ਇਹ ਵੱਡੀ ਉਪਲੱਬਧੀ ਹਾਸਲ ਕੀਤੀ। ਹਰਪ੍ਰੀਤ ਕੌਰ ਨੇ ਆਪਣੀ ਉੱਚ ਸਿੱਖਿਆ ਚੰਡੀਗੜ੍ਹ ਯੂਨੀਵਰਸਿਟੀ ਤੋਂ ਬੀ.ਕਾਮ. ਅਤੇ ਕੈਨੇਡਾ ਦੀ ਅਲਗੋਮਾ ਯੂਨੀਵਰਸਿਟੀ ਤੋਂ ਵਪਾਰ ਵਿਸ਼ੇ ਵਿਚ ਸਨਾਤਕੋਤਰ ਪ੍ਰਮਾਣ ਪੱਤਰ ਪ੍ਰਾਪਤ ਕੀਤਾ। ਮੁਕਾਬਲੇ ਦੌਰਾਨ ਵੱਖ-ਵੱਖ ਦੇਸ਼ਾਂ ਦੀਆਂ ਪ੍ਰਤੀਯੋਗੀਆਂ ਵਿਚਕਾਰ ਹਰਪ੍ਰੀਤ ਨੇ ਆਪਣੀ ਪ੍ਰਭਾਵਸ਼ਾਲੀ ਮੰਚੀ ਪੇਸ਼ਕਾਰੀ, ਬੁੱਧੀਮਾਨ ਜਵਾਬਾਂ ਅਤੇ ਆਕਰਸ਼ਕ ਵਿਅਕਤੀਤਵ ਨਾਲ ਨਿਰਣਾਇਕਾਂ ਨੂੰ ਪ੍ਰਭਾਵਿਤ ਕੀਤਾ । ਹਰਪ੍ਰੀਤ ਕੌਰ ਨੇ ਕਿਹਾ ਕਿ ਇਹ ਤਾਜ ਸਿਰਫ਼ ਸੁੰਦਰਤਾ ਦਾ ਪ੍ਰਤੀਕ ਨਹੀਂ, ਸਗੋਂ ਮਿਹਨਤ, ਅਨੁਸ਼ਾਸਨ ਅਤੇ ਔਰਤ ਦੀ ਅੰਦਰੂਨੀ ਤਾਕਤ ਦੀ ਜਿੱਤ ਹੈ। ਹੁਣ ‘ਮਿਸ ਕੈਨੇਡੀਅਨ ਵਰਲਡਵਾਈਡ 2026–2027’ ਦਾ ਤਾਜ ਜਿੱਤਣ ਤੋਂ ਬਾਅਦ ਹਰਪ੍ਰੀਤ ਕੌਰ ਅਗਲੇ ਸਾਲ ਫਰਾਂਸ ਵਿਚ ਹੋਣ ਵਾਲੇ ਅੰਤਰਰਾਸ਼ਟਰੀ ਸੁੰਦਰਤਾ ਮੁਕਾਬਲੇ ਦੇ ਮਹਾਨ ਅੰਤਿਮ ਦੌਰ ਵਿੱਚ ਹਿੱਸਾ ਲਵੇਗੀ। ਜਿੱਥੇ ਉਹ ਪੰਜਾਬ, ਭਾਰਤ ਅਤੇ ਕੈਨੇਡਾ ਦੀ ਨੁਮਾਇੰਦਗੀ ਕਰੇਗੀ। ਹਰਪ੍ਰੀਤ ਕੌਰ ਦੀ ਇਹ ਉਪਲੱਬਧੀ ਪੰਜਾਬ ਲਈ ਮਾਣ ਵਾਲਾ ਪਲ ਹੈ।