ਮੰਡੀ ਗੋਬਿੰਦਗੜ੍ਹ, 10 ਜੁਲਾਈ (ਮੋਹਿਤ ਸਿੰਗਲਾ)-ਭਾਰਤੀ ਖੁਰਾਕ ਸੁਰੱਖਿਆ ਅਤੇ ਮਿਆਰ ਅਥਾਰਟੀ (ਐਫ.ਐਸ.ਐਸ.ਏ.ਆਈ.) ਨੇ ਖਾਦ ਸੁਰੱਖਿਆ ਅਤੇ ਮਿਆਰ ਨਿਯਮ, 2018 ਦੀ ਉਲੰਘਣਾ ਦੇ ਦੋਸ਼ਾਂ ਤਹਿਤ ਕਈ ਸ਼ਰਾਬ ਕੰਪਨੀਆਂ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤੇ ਹਨ। ਅਥਾਰਟੀ ਦਾ ਕਹਿਣਾ ਹੈ ਕਿ ਕੁਝ ਕੰਪਨੀਆਂ ਬਿਨਾਂ ਮਨਜ਼ੂਰੀ ਸ਼ਰਾਬ ਵਿਚ ਵਾਧੂ ਫਲੇਵਰ ਦੀ ਵਰਤੋਂ ਕਰ ਰਹੀਆਂ ਹਨ ਅਤੇ ਉਤਪਾਦ ਦੀ ਉਮਰ ਸੰਬੰਧੀ ਭੁਲੇਖੇ ਵਾਲੇ ਦਾਅਵੇ ਕਰਕੇ ਖਪਤਕਾਰਾਂ ਨੂੰ ਗੁੰਮਰਾਹ ਕਰ ਰਹੀਆਂ ਹਨ।ਐਫ.ਐਸ.ਐਸ.ਏ.ਆਈ. ਅਨੁਸਾਰ ਰਮ, ਬ੍ਰਾਂਡੀ, ਜਿਨ, ਵਿਸਕੀ, ਵਾਈਨ ਅਤੇ ਬੀਅਰ ਵਰਗੇ ਉਤਪਾਦਾਂ ਵਿਚ ਅਸਲੀ ਸੁਆਦ ਵਰਗਾ ਅਨੁਭਵ ਦੇਣ ਲਈ ਵਾਧੂ ਫਲੇਵਰ ਮਿਲਾਉਣਾ ਨਿਯਮਾਂ ਦੇ ਅਨੁਕੂਲ ਨਹੀਂ ਹੈ। ਇਸ ਸੰਬੰਧੀ ਸੰਬੰਧਿਤ ਕੰਪਨੀਆਂ ਤੋਂ ਸਪਸ਼ਟੀਕਰਨ ਮੰਗਦਿਆਂ ਪੁੱਛਿਆ ਗਿਆ ਹੈ ਕਿ ਉਨ੍ਹਾਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਕਿਉਂ ਨਾ ਕੀਤੀ ਜਾਵੇ।ਨੋਟਿਸ ਜਾਰੀ ਹੋਣ ਤੋਂ ਬਾਅਦ ਕਨਫੈਡਰੇਸ਼ਨ ਆਫ ਇੰਡੀਅਨ ਅਲਕੋਹਲਿਕ ਬੇਵਰੇਜ ਕੰਪਨੀਜ਼ (ਸੀ.ਆਈ.ਏ.ਬੀ.ਸੀ.) ਨੇ ਕਿਹਾ ਹੈ ਕਿ ਉਸ ਦੇ ਮੈਂਬਰ ਐਫ. ਐਸ. ਐਸ. ਏ. ਆਈ. ਦੇ ਸਾਰੇ ਦਿਸ਼ਾ-ਨਿਰਦੇਸ਼ਾਂ ਦੀ ਪਾਲਣਾ ਕਰਦੇ ਹਨ। ਹਾਲਾਂਕਿ, ਐਫ.ਐਸ.ਐਸ.ਏ.ਆਈ. ਨੇ ਇਹ ਸਪਸ਼ਟ ਨਹੀਂ ਕੀਤਾ ਕਿ ਹੁਣ ਤੱਕ ਕਿੰਨੀਆਂ ਕੰਪਨੀਆਂ ਨੂੰ ਨੋਟਿਸ ਜਾਰੀ ਕੀਤੇ ਗਏ ਹਨ।ਅਥਾਰਟੀ ਨੇ ਸ਼ਰਾਬ ਦੀਆਂ ਬੋਤਲਾਂ ’ਤੇ ਉਤਪਾਦ ਦੀ ਉਮਰ ਸੰਬੰਧੀ ਕੀਤੇ ਜਾਣ ਵਾਲੇ ਦਾਅਵਿਆਂ ’ਤੇ ਵੀ ਇਤਰਾਜ਼ ਜਤਾਇਆ ਹੈ। ਨਿਯਮਾਂ ਅਨੁਸਾਰ ਕਿਸੇ ਵੀ ਬਲੈਂਡਡ ਸ਼ਰਾਬ ਦੀ ਉਮਰ ਉਸ ਵਿਚ ਸ਼ਾਮਿਲ ਸਭ ਤੋਂ ਘੱਟ ਉਮਰ ਵਾਲੀ ਸਪਿਰਿਟ ਦੇ ਆਧਾਰ ’ਤੇ ਮੰਨੀ ਜਾਵੇਗੀ। ਜੇਕਰ ਇਹ ਜਾਣਕਾਰੀ ਖਪਤਕਾਰਾਂ ਨੂੰ ਸਪਸ਼ਟ ਤੌਰ ’ਤੇ ਨਹੀਂ ਦਿੱਤੀ ਜਾਂਦੀ ਤਾਂ ਇਸ ਨੂੰ ਭੁਲੇਖਾ ਪੈਂਦਾ ਕਰਨ ਵਾਲਾ ਦਾਅਵਾ ਮੰਨਿਆ ਜਾਵੇਗਾ। ਐਫ. ਐਸ. ਐਸ. ਏ. ਆਈ. ਨੇ ਇਸ ਪੂਰੇ ਮਾਮਲੇ ਅਤੇ ਸੰਬੰਧਿਤ ਨਿਯਮਾਂ ’ਤੇ ਵਿਚਾਰ-ਵਟਾਂਦਰੇ ਲਈ 14 ਜੁਲਾਈ ਨੂੰ ਸਾਰੇ ਹਿੱਸੇਦਾਰਾਂ ਦੀ ਮੀਟਿੰਗ ਬੁਲਾਈ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਇਸ ਮੀਟਿੰਗ ਵਿਚ ਲੇਬਲਿੰਗ, ਫਲੇਵਰਿੰਗ ਅਤੇ ਗੁਣਵੱਤਾ ਮਿਆਰਾਂ ਦੀ ਪਾਲਣਾ ਨੂੰ ਲੈ ਕੇ ਅਗਲੀ ਰਣਨੀਤੀ ਤੈਅ ਕੀਤੀ ਜਾਵੇਗੀ।
