ਅੰਮ੍ਰਿਤਸਰ, 13 ਜੁਲਾਈ (ਸੁਰਿੰਦਰ ਕੋਛੜ)-ਪਾਕਿਸਤਾਨ ‘ਚ ਇਕ ਹੋਰ ਅੱਤਵਾਦੀ ਦੀ ਭੇਦਭਰੇ ਹਾਲਾਤ ‘ਚ ਮੌਤ ਹੋਣ ਬਾਰੇ ਜਾਣਕਾਰੀ ਮਿਲੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਹਿਜ਼ਬੁਲ ਮੁਜ਼ਾਹਦੀਨ ਦੇ ਅੱਤਵਾਦੀ ਅਬਦੁਲ ਮਜ਼ੀਦ ਦੀ ਮੌਤ ਪਾਕਿ ਦੀ ਰਾਜਧਾਨੀ ਇਸਲਾਮਾਬਾਦ ‘ਚ ਹੋਈ। ਉਹ ਮੂਲ ਰੂਪ ‘ਚ ਭਾਰਤੀ ਜੰਮੂ-ਕਸ਼ਮੀਰ ਦੇ ਪੁਣਛ ਦਾ ਰਹਿਣ ਵਾਲਾ ਸੀ ਅਤੇ ਸਾਲ 1990 ਤੋਂ 2000 ਦੇ ਵਿਚਕਾਰ ਕੰਟਰੋਲ ਰੇਖਾ ਪਾਰ ਕਰਕੇ ਪਾਕਿ ਚਲਾ ਗਿਆ ਅਤੇ ਇਸਲਾਮਾਬਾਦ ‘ਚ ਵੱਸ ਗਿਆ। ਅਬਦੁਲ ਮਜ਼ੀਦ ਦੀ ਪਤਨੀ ਅਤੇ ਚਾਰ ਛੋਟੇ ਬੱਚੇ ਪਾਕਿ ‘ਚ ਰਹਿ ਰਹੇ ਹਨ। ਉਸ ਦੀ ਮ੍ਰਿਤਕ ਦੇਹ ਇਸਲਾਮਾਬਾਦ ਦੇ ਬਰਮਾ ਟਾਊਨ ‘ਚੋਂ ਮਿਲੀ। ਅੱਤਵਾਦੀ ਸਮੂਹ ਹਿਜ਼ਬੁਲ ਮੁਜ਼ਾਹਦੀਨ ਦਾ ਦਾਅਵਾ ਹੈ ਕਿ ਪੌੜੀਆਂ ਤੋਂ ਡਿੱਗਣ ਕਾਰਨ ਅਬਦੁਲ ਮਜ਼ੀਦ ਦੇ ਸਿਰ ‘ਚ ਘਾਤਕ ਸੱਟ ਲੱਗੀ ਸੀ, ਜਦਕਿ ਉਸ ਦੇ ਸਾਥੀਆਂ ਦਾ ਦਾਅਵਾ ਹੈ ਕਿ ਉਸ ਦੀ ਮੌਤ ਬਿਜਲੀ ਦੇ ਝਟਕੇ ਨਾਲ ਹੋਈ। ਹਿਜ਼ਬੁਲ ਕਮਾਂਡਰ ਤਾਜ ਅਲੀ ਸ਼ਾਹ ਨੇ ਖ਼ੁਦ ਮਾਰੇ ਗਏ ਅੱਤਵਾਦੀ ਦੇ ਅੰਤਿਮ ਜਨਾਜ਼ੇ ਦੀ ਅਗਵਾਈ ਕੀਤੀ।
