ਮੌਨਸੂਨ ’ਚ ਦੇਰੀ ਤੇ ਗਰਮੀ ਕਾਰਨ ਬਿਜਲੀ ਦੀ ਮੰਗ ’ਚ ਹੋ ਰਿਹਾ ਰਿਕਾਰਡਤੋੜ ਵਾਧਾ

ਪਟਿਆਲਾ, 16 ਜੁਲਾਈ (ਧਰਮਿੰਦਰ ਸਿੰਘ ਸਿੱਧੂ)-ਸੂਬੇ ’ਚ ਵੱਧ ਰਹੇ ਤਾਪਮਾਨ ਅਤੇ ਮਾਨਸੂਨ ਦੀ ਆਮਦ ’ਚ ਹੋ ਰਹੀ ਦੇਰੀ ਕਾਰਨ ਬਿਜਲੀ ਦੀ ਮੰਗ ਵਿਚ ਰਿਕਾਰਡਤੋੜ ਵਾਧਾ ਹੋ ਰਿਹਾ ਹੈ, ਜਿਸ ਕਾਰਨ ਬਿਜਲੀ ਦੀ ਮੰਗ ਦੇ ਆਪਣੇ ਹੀ ਪੁਰਾਣੇ ਰਿਕਾਰਡ ਟੁੱਟਦੇ ਜਾ ਰਹੇ ਹਨ । ਇਸ ਸਾਲ ਦੀ 14 ਜੁਲਾਈ ਨੂੰ ਸੂਬੇ ਦੀ ਸੱਭ ਤੋਂ ਵੱਧ ਬਿਜਲੀ ਦੀ ਮੰਗ 17366 ਮੈਗਾਵਾਟ ਨੋਟ ਕੀਤੀ ਗਈ ਸੀ। ਪ੍ਰੰਤੂ ਅੱਜ ਵੀ 17362 ਮੈਗਾਵਾਟ ਨਾਲ ਸੂਬੇ ਦੀ ਬਿਜਲੀ ਦੀ ਮੰਗ ’ਤੇ ਟਿੱਕੀ ਹੋਈ ਹੈ ਅਤੇ ਬਿਜਲੀ ਨਿਗਮ ਵਲੋਂ ਵੀ ਇਕਾ ਦੁੱਕਾ ਥਾਵਾਂ ’ਤੇ ਬਿਜਲੀ ਕੱਟਾਂ ਨੂੰ ਛੱਡ ਕੇ ਸੂਬੇ ਨੂੰ ਬਿਜਲੀ ਮੁਹੱਈਆ ਕਰਵਾਉਣ ਵਿਚ ਸਫਲਤਾ ਹਾਸਲ ਕੀਤੀ ਹੈ । ਲੰਘੇ ਦੋ ਸਾਲਾਂ ਦੀ ਗੱਲ ਕੀਤੀ ਜਾਵੇ ਤਾਂ ਇਸ ਮਹੀਨੇ ਦੀ 2025 ਦੀ ਵੱਧ ਤੋਂ ਵੱਧ ਬਿਜਲੀ ਦੀ ਮੰਗ 17233 ਮੈਗਾਵਾਟ ਜਦੋਂ ਕਿ 2024 ਵਿਚ 16017 ਮੈਗਾਵਾਟ ਬਿਜਲੀ ਦੀ ਮੰਗ ਰਹੀ ਸੀ । ਪ੍ਰੰਤੂ ਇਸ ਸਾਲ ਦੀ ਮੰਗ ਪਿਛਲੇ ਦੋਵਾਂ ਸਾਲਾਂ ਦੇ ਹੁਣ ਤੱਕ ਰਿਕਾਰਡ ਨੂੰ ਪਾਰ ਕਰ ਚੁੱਕੀ ਹੈ। ਇਸ ਸਮੇਂ ਬਿਜਲੀ ਨਿਗਮ ਆਪਣੇ ਸਰੋਤਾਂ ਤੋਂ 5422 ਮੈਗਾਵਾਟ ਪ੍ਰਾਪਤ ਕਰ ਰਿਹਾ ਹੈ ਜਦੋਂ ਕਿ 10645 ਮੈਗਾਵਾਟ ਬਾਹਰੋਂ ਬਿਜਲੀ ਖਰੀਦ ਰਿਹਾ ਹੈ । ਇਸ ਸਮੇਂ ਬਿਜਲੀ ਨਿਗਮ ਦੇ ਆਪਣੇ ਥਰਮਲਾਂ ਵਿਚੋਂ ਰੋਪੜ ਥਰਮਲ ਪਲਾਂਟ ਦੇ ਇਕ ਯੂਨਿਟ ਨੂੰ ਛੱਡ ਕੇ ਸਾਰੇ ਥਰਮਲ ਪਲਾਟਾਂ ਦੇ 9 ਯੂਨਿਟਾਂ ਤੋਂ 1686 ਮੈਗਾਵਾਟ ਅਤੇ ਦੋਵੇਂ ਰਾਜਪੁਰਾ ਅਤੇ ਤਲਵੰਡੀ ਸਾਬੋ ਨਿੱਜੀ ਥਰਮਲ ਪਲਾਟਾਂ ਦੇ 5 ਯੂਨਿਟਾਂ ਤੋਂ 3 ਹਜਾਰ ਮੈਗਾਵਾਟ ਤੋਂ ਇਲਾਵਾ ਪਣ ਬਿਜਲੀ ਤੋਂ 442 ਅਤੇ ਸੌਰ ਊਰਜਾ ਤੋਂ 297 ਮੈਗਾਵਾਟ ਬਿਜਲੀ ਦੀ ਪ੍ਰਾਪਤੀ ਹੋ ਰਹੀ ਹੈ।