ਕਿਸ਼ਨਪੁਰਾ ਕਲਾਂ, 4 ਫਰਵਰੀ (ਅਮੋਲਕ ਸਿੰਘ ਕਲਸੀ, ਪਰਮਿੰਦਰ ਸਿੰਘ ਗਿੱਲ)-ਬੀਤੇ ਦਿਨ ਗੁਰਵਿੰਦਰ ਸਿੰਘ (7 ਸਾਲ) ਪੁੱਤਰ ਲਖਦੀਪ ਸਿੰਘ ਵਾਸੀ ਕਿਸ਼ਨਪੁਰਾ ਕਲਾਂ ਦੀ ਉਂਗਲ 'ਤੇ ਚਾਈਨਾ ਡੋਰ ਨਾਲ ਕੱਟ ਲੱਗਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਗੁਰਵਿੰਦਰ ਸਿੰਘ ਦੇ ਪਿਤਾ ਲਖਦੀਪ ਸਿੰਘ ਨੇ ਦੱਸਿਆ ਕਿ ਸਾਡਾ ਘਰ ਮੇਨ ਸੜਕ ਦੇ ਕੋਲ ਹੈ | ਪਤੰਗਾਂ ਕਾਰਨ ਡੋਰ ਦਰੱਖਤਾਂ ਅਤੇ ਬਿਜਲੀ ਦੀਆਂ ਤਾਰਾਂ 'ਤੇ ਲਮਕਦੀਆਂ ਨਜ਼ਰ ਆਉਂਦੀਆਂ ਹਨ ਤਾਂ ਗੁਰਵਿੰਦਰ ਸਿੰਘ ਵੀ ਦਰੱਖਤ ਤੋਂ ਡੋਰ ਖਿੱਚਣ ਲੱਗਾ ਤਾਂ ਚਾਈਨਾ ਡੋਰ ਨੇ ਉਂਗਲ ਦੀ ਹੱਡੀ ਤੱਕ ਕੱਟ ਲਗਾ ਦਿੱਤਾ | ਉਨ੍ਹਾਂ ਦੱਸਿਆ ਜੇਕਰ ਬੱਚਾ ਥੋੜ੍ਹਾ ਹੋਰ ਜ਼ੋਰ ਲਗਾ ਦਿੰਦਾ ਤਾਂ ਉਂਗਲ ਹੀ ਕੱਟੀ ਜਾਣੀ ਸੀ | ਡਾਕਟਰ ਗੁਰਪ੍ਰੀਤ ਸਿੰਘ ਢਿੱਲੋਂ ਨੇ ਬੱਚੇ ਦੀ ਮਰਹਮ ਪੱਟੀ ਕੀਤੀ | ਉਨ੍ਹਾਂ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਸਖਤੀ ਨਾਲ ਚਾਈਨਾ ਡੋਰ ਬੰਦ ਕਰਾਈ ਜਾਵੇ |
