ਪਾਬੰਦੀਸ਼ੁਦਾ ਚਾਈਨਾ ਡੋਰ ਦੇ 30 ਗੁੱਟਾ ਸਮੇਤ ਕਾਬੂ <br/>

ਸੰਗਰੂਰ, 4 ਜਨਵਰੀ (ਅਮਨਦੀਪ ਸਿੰਘ ਬਿੱਟਾ) - ਸੰਗਰੂਰ ਪੁਲਿਸ ਨੇ ਪਾਬੰਦੀਸ਼ੁਦਾ ਚਾਈਨਾ ਡੋਰ ਮੋਨੋ ਕੇ.ਟੀ.ਸੀ ਫਾਈਟਰ ਦੇ 30 ਗੁੱਟ ਬਰਾਮਦ ਕਰਨ ਦਾ ਦਾਅਵਾ ਕੀਤਾ ਹੈ | ਐਸ.ਐਚ.ਓ ਸਿਟੀ ਇੰਸਪੈਕਟਰ ਕਰਮਜੀਤ ਸਿੰਘ ਨੇ ਦੱਸਿਆ ਕਿ ਪੁਲਿਸ ਪਾਰਟੀ ਨੇ ਗਸਤ ਦੌਰਾਨ ਸਟੇਡੀਅਮ ਰੋਡ ਦੀ ਪਿਛਲੀ ਸੜਕ ਤੋਂ ਇੱਕ ਵਿਅਕਤੀ ਮੁਕੇਸ਼ ਵਾਲੀਆ ਉਰਫ਼ ਬਾਵਾ ਨੂੰ ਪਤੰਗ ਚੜ੍ਹਾਉਣ ਵਾਲੀ ਸਿੰਥੈਟਿਕ, ਪਲਾਸਟਿਕ ਦੀ ਬਣੀ ਚਾਈਨਾ ਡੋਰ ਦੇ 30 ਬੰਡਲ ਗੁੱਟਾਂ ਸਮੇਤ ਕਾਬੂ ਕਰ ਲਿਆ ਗਿਆ | ਸੰਗਰੂਰ ਦੀ ਮੈਗਜਿਨ ਕਲੋਨੀ ਦਾ ਰਹਿਣਾ ਵਾਲਾ ਮੁਕੇਸ਼ ਵਾਲੀਆ ਬਾਵਾ ਨੇ ਇਹ ਪਾਬੰਦੀਸ਼ੁਦਾ ਡੋਰ ਲੁਧਿਆਣਾ ਤੋਂ ਮੰਗਵਾਈ ਸੀ | ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ਮੁਕੇਸ਼ ਵਾਲੀਆ ਬਾਵਾ ਨੇ ਉਪਰੋਕਤ ਚਾਈਨਾ ਡੋਰ 230 ਰੁਪਏ ਪ੍ਰਤੀ ਗੁੱਟ ਲੁਧਿਆਣਾ ਤੋਂ ਮੰਗਵਾਈ ਸੀ ਅਤੇ ਸੰਗਰੂਰ ਵਿਚ ਇਹ ਡੋਰ 600-700 ਰੁਪਏ ਪ੍ਰਤੀ ਗੁੱਟ ਦੇ ਹਿਸਾਬ ਨਾਲ ਵੇਚਣ ਲਈ ਯਤਨਸ਼ੀਲ ਸੀ ਕਿ ਵੇਚਣ ਤੋਂ ਪਹਿਲਾ ਹੀ ਪੁਲਿਸ ਦੇ ਹੱਥੀ ਚੜ੍ਹ ਗਿਆ | ਪੁਲਿਸ ਅਧਿਕਾਰੀ ਅਨੁਸਾਰ ਮੁਕੇਸ਼ ਵਾਲੀਆ ਬਾਵਾ ਨੂੰ ਐਸ.ਡੀ.ਐਮ ਸੰਗਰੂਰ ਦੀ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ | ਫਿਲਹਾਲ ਉਸ ਖ਼ਿਲਾਫ਼ ਥਾਣਾ ਸਿਟੀ ਵਿਚ ਮੁਕੱਦਮਾ ਦਰਜ ਕਰ ਲਿਆ ਗਿਆ ਹੈ | ਇਸ ਮੌਕੇ ਸਹਾਇਕ ਥਾਣੇਦਾਰ ਜਗਤਾਰ ਸਿੰਘ, ਗੁਰਤੇਜ ਸਿੰਘ ਅਤੇ ਗੁਰਦੀਪ ਸਿੰਘ ਗੱਗੂ ਆਦਿ ਪੁਲਿਸ ਅਧਿਕਾਰੀ ਮੌਜੂਦ ਸਨ |