ਲੌਂਗੋਵਾਲ, 25 ਜਨਵਰੀ (ਵਿਨੋਦ, ਖੰਨਾ) - ਪਿੰਡ ਸ਼ੇਰੋਂ ਵਿਖੇ ਵੱਡੇ ਬੱਸ ਸਟੈਂਡ ਨੂੰ ਜਾਂਦਾ ਰਸਤਾ ਨਿਕਾਸੀ ਨਾਲੀਆਂ ਦੀ ਸਫ਼ਾਈ ਨਾ ਹੋਣ ਕਾਰਨ ਨਰਕ ਦਾ ਨਮੂਨਾ ਬਣਿਆ ਹੋਇਆ ਹੈ | ਇਹ ਰਸਤਾ ਬੱਸ ਸਟੈਂਡ ਨੂੰ ਜਾਣ ਵਾਲਾ ਪ੍ਰਮੁੱਖ ਰਸਤਾ ਹੈ ਬਾਹਰ ਅੰਦਰ ਜਾਣ ਲਈ ਅਤੇ ਬਾਹਰੋਂ ਪਿੰਡ ਚ ਆਉਣ ਲਈ ਲੋਕਾਂ ਦਾ ਇਸ ਰਸਤਿਓਾ ਗੁਜ਼ਰਨਾ ਮਜਬੂਰੀ ਹੈ | ਸਕੂਲੇ ਜਾਣ ਵਾਲੇ ਨਿੱਕੇ ਨਿੱਕੇ ਨਿਆਣੇ ਅਤੇ ਕੰਮ ਧੰਦੇ ਤੇ ਜਾਣ ਵਾਲੇ ਰਾਹਗੀਰ ਗੰਦੇ ਪਾਣੀ ਵਿਚੋਂ ਦੀ ਹੀ ਲੰਘਣ ਲਈ ਮਜਬੂਰ ਹਨ | ਸਕੂਲ ਜਾਣ ਵਾਲੇ ਬੱਚਿਆਂ ਦੀਆਂ ਵਰਦੀਆਂ ਅਤੇ ਰਾਹਗੀਰਾਂ ਦੇ ਕੱਪੜੇ ਇੱਥੋਂ ਲੰਘਣ ਵੇਲੇ ਖ਼ਰਾਬ ਹੋ ਜਾਂਦੇ ਹਨ | ਇਸ ਗੰਦੇ ਪਾਣੀ ਉੱਪਰ ਪੈਦਾ ਹੋਏ ਮੱਛਰ ਅਤੇ ਮੱਖੀਆਂ ਕਿਸੇ ਵੱਡੀ ਬਿਮਾਰੀ ਨੂੰ ਸੱਦਾ ਦੇ ਰਹੀਆਂ ਹਨ ਪਰ ਕੋਈ ਵੀ ਪੰਚਾਇਤੀ ਜਾਂ ਸਰਕਾਰ ਦਾ ਨੁਮਾਇੰਦਾ ਇਸ ਅਹਿਮ ਮਸਲੇ ਵੱਲ ਧਿਆਨ ਨਹੀਂ ਦੇ ਰਿਹਾ | ਇੱਥੋਂ ਦੇ ਰਹਿਣ ਵਾਲੇ ਅਗਾਂਹਵਧੂ ਨੌਜਵਾਨ ਸਤਿੰਦਰਪਾਲ ਸਿੰਘ ਕਿੱਕੀ ਅਤੇ ਹੋਰਨਾਂ ਲੋਕਾਂ ਨੇ ਦੱਸਿਆ ਕਿ ਕੁਝ ਸਮਾਂ ਪਹਿਲਾਂ ਇੱਥੇ ਪੰਚਾਇਤੀ ਮੋਟਰ ਲਾਈ ਸੀ ਉਸ ਦਾ ਸਾਰਾ ਮਲਬਾ ਨਾਲੀਆਂ ਚ ਚਲਾ ਗਿਆ ਅਤੇ ਨਾਲੀਆਂ ਬੰਦ ਹੋ ਗਈਆਂ | ਇਸ ਤੋਂ ਇਲਾਵਾ ਮੇਨ ਨਿਕਾਸੀ ਨਾਲਾ ਹੈ ਉਸ ਦੀ ਦੀ ਵੀ ਲੰਮੇ ਅਰਸੇ ਤੋਂ ਸਫ਼ਾਈ ਨਹੀਂ ਕਰਵਾਈ ਗਈ | ਇਨ੍ਹਾਂ ਹੀ ਨਹੀਂ ਇੱਥੇ ਜੋ ਅੱਧ ਅਧੂਰੀਆਂ ਪੁਲੀਆਂ ਬਣੀਆਂ ਹਨ ਉਹ ਵੀ ਨਿੱਤ ਦਿਨ ਹਾਦਸਿਆਂ ਦਾ ਸਬੱਬ ਬਣੀਆਂ ਹੋਈਆਂ ਹਨ | ਇਹ ਪਿੰਡ ਦਾ ਪ੍ਰਮੁੱਖ ਰਸਤਾ ਹੋਣ ਦੇ ਬਾਵਜੂਦ ਵੀ ਇਸ ਸਮੱਸਿਆ ਦਾ ਹੱਲ ਨਹੀਂ ਕੱਢਿਆ ਜਾ ਰਿਹਾ ਉਨ੍ਹਾਂ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਜਲਦੀ ਤੋਂ ਜਲਦੀ ਇਸ ਸਮੱਸਿਆ ਦਾ ਨਿਪਟਾਰਾ ਕੀਤਾ ਜਾਵੇ |
