ਸੁਨਾਮ ਊਧਮ ਸਿੰਘ ਵਾਲਾ, 27 ਮਈ (ਹਰਚੰਦ ਸਿੰਘ ਭੁੱਲਰ, ਸਰਬਜੀਤ ਸਿੰਘ ਧਾਲੀਵਾਲ) - ਪੈਪਸੂ ਰੋਡ ਟਰਾਂਸਪੋਰਟ ਕਾਰਪੋਰੇਸ਼ਨ ਦੇ ਅਧਿਕਾਰੀਆਂ ਦੀ ਅਣਦੇਖੀ ਅਤੇ ਪੀ ਆਰ ਟੀ ਸੀ ਦੇ ਹੀ ਕੁਝ ਮੁਲਾਜ਼ਮਾਂ ਦੀਆਂ ਮਨਮਰਜ਼ੀਆਂ ਕਾਰਨ ਜਿੱਥੇ ਆਮ ਲੋਕ ਖੱਜਲ-ਖੁਵਾਰ ਹੋ ਰਹੇ ਹਨ ਉੱਥੇ ਹੀ ਮਹਿਕਮੇ ਦਾ ਵਿੱਤੀ ਨੁਕਸਾਨ ਵੀ ਹੋ ਰਿਹਾ ਹੈ | ਮਿਲੀ ਜਾਣਕਾਰੀ ਅਨੁਸਾਰ ਸੁਨਾਮ ਊਧਮ ਸਿੰਘ ਵਾਲਾ ਦੇ ਬੱਸ ਸਟੈਂਡ ਤੋਂ ਸੁਨਾਮ- ਪਟਿਆਲਾ ਜਾਣ ਲਈ ਨਿੱਜੀ ਕੰਪਨੀ ਦੀ ਬੱਸ ਦਾ ਆਖ਼ਰੀ ਸਮਾਂ ਸ਼ਾਮ 5.36 ਵਜੇ ਦਾ ਹੈ | ਇਸ ਤੋਂ ਬਾਅਦ ਪਟਿਆਲੇ ਲਈ ਪੀ ਆਰ ਟੀ ਸੀ ਦੀਆਂ ਬੱਸਾਂ ਹੀ ਜਾਂਦੀਆਂ ਹਨ ਪਰ ਇਸ ਦੌਰਾਨ ਸ਼ਾਮ ਨੂੰ 7 ਵਜੇ ਬਠਿੰਡਾ ਤੋਂ ਪਟਿਆਲਾ ਜਾਣ ਵਾਲੀ ਪੀ ਆਰ ਟੀ ਸੀ ਦੀ ਬੱਸ ਆਪਣੇ ਸਮੇਂ ਤੋਂ ਪਹਿਲਾਂ ਹੀ 6.40 ਤੇ ਹੀ ਪਟਿਆਲੇ ਨੂੰ ਚਲੀ ਜਾਂਦੀ ਹੈ | ਇਸ ਤੋਂ ਬਾਅਦ ਸ਼ਾਮ 7.30 ਵਜੇ ਸਿਰਸਾ-ਚੰਡੀਗੜ੍ਹ ਬੱਸ ਸੁਨਾਮ ਬੱਸ ਸਟੈਂਡ ਵਿਚ ਆਉਣ ਦੀ ਬਜਾਏ ਬਾਹਰੋਂ ਬਾਹਰੀ ਚਲੀ ਜਾਂਦੀ ਹੈ | ਜਿਸ ਕਾਰਨ ਭਵਾਨੀਗੜ੍ਹ, ਪਟਿਆਲਾ, ਚੰਡੀਗੜ੍ਹ, ਨਾਭਾ ਆਦਿ ਜਾਣ ਵਾਲੀਆਂ ਸਵਾਰੀਆਂ ਸਥਾਨਕ ਬੱਸ ਸਟੈਂਡ ਵਿਚ ਹੀ ਖੱਜਲ-ਖੁਵਾਰ ਹੁੰਦੀਆਂ ਰਹਿੰਦੀਆਂ ਹਨ ਜਾਂ ਫਿਰ ਉਨ੍ਹਾਂ ਨੂੰ ਕਰੀਬ ਇਕ ਕਿੱਲੋਮੀਟਰ ਪੈਦਲ ਤੁਰਕੇ ਸੁਨਾਮ ਆਈ.ਟੀ.ਆਈ ਚੌਂਕ ਵਿਚ ਜਾਣਾ ਪੈਂਦਾ ਹੈ | ਇਸ ਤਰ੍ਹਾਂ ਜਿੱਥੇ ਬਜ਼ੁਰਗ ਵਿਅਕਤੀ ਜਾਂ ਨਿੱਕੇ ਨਿੱਕੇ ਬੱਚਿਆਂ ਵਾਲੀਆਂ ਬੀਬੀਆਂ ਅਕਸਰ ਹੀ ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਕੋਸਦੀਆਂ ਸੁਣੀਆਂ ਜਾ ਸਕਦੀਆਂ ਹਨ | ਲੋਕਾਂ ਦੀ ਪੰਜਾਬ ਸਰਕਾਰ ਅਤੇ ਪੀ ਆਰ ਟੀ ਸੀ ਅਧਿਕਾਰੀਆਂ ਤੋਂ ਮੰਗ ਹੈ ਕਿ ਸ਼ਾਮ 7 ਵਜੇ ਸੁਨਾਮ ਤੋ ਚੱਲਣ ਵਾਲੀ ਬਠਿੰਡਾ ਤੋਂ ਪਟਿਆਲਾ ਜਾਣ ਵਾਲੀ ਪੀ ਆਰ ਟੀ ਸੀ ਦੀ ਬੱਸ ਨੂੰ ਟਾਈਮ ਟੇਬਲ ਅਨੁਸਾਰ ਸਹੀ ਸਮੇਂ ਤੇ ਸ਼ਾਮ 7 ਵਜੇ ਚੱਲਣ ਅਤੇ ਸ਼ਾਮ 7.30 ਤੇ ਸਿਰਸਾ-ਚੰਡੀਗੜ੍ਹ ਜਾਣ ਵਾਲੀ ਬੱਸ ਨੂੰ ਸੁਨਾਮ ਬੱਸ ਸਟੈਂਡ ਵਿਚ ਆਉਣ ਨੂੰ ਹਰ ਹਾਲਤ ਵਿਚ ਯਕੀਨੀ ਬਣਾਇਆ ਜਾਵੇ ਤਾਂ ਜੋ ਲੋਕਾਂ ਨੂੰ ਰਾਹਤ ਮਿਲ ਸਕੇ | ਜਦੋਂ ਇਸ ਮਸਲੇ ਨੂੰ ਲੈ ਕੇ ਜਨਰਲ ਮੈਨੇਜਰ ਪੀ ਆਰ ਟੀ ਸੀ ਬਠਿੰਡਾ ਅਤੇ ਮੈਨੇਜਿੰਗ ਡਾਇਰੈਕਟਰ ਪੀ ਆਰ ਟੀ ਸੀ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਆਪਣਾ ਫ਼ੋਨ ਚੁੱਕਣਾ ਮੁਨਾਸਬ ਨਹੀ ਸਮਝਿਆ |
