ਫ਼ਿਰੋਜ਼ਪੁਰ, 16 ਅਪ੍ਰੈਲ (ਗੁਰਿੰਦਰ ਸਿੰਘ)-ਅਜੋਕੇ ਸਮੇਂ ਅੰਦਰ ਅਗਰ ਅਸੀਂ ਆਪਣੇ ਬੱਚਿਆਂ ਨੂੰ ਸਹੀ ਸੇਧ, ਮਾਨਸਿਕ, ਸਰੀਰਕ ਅਤੇ ਸਮਾਜਿਕ ਤੌਰ 'ਤੇ ਤਾਕਤਵਰ ਬਣਾਉਣਾ ਚਾਹੁੰਦੇ ਹਾਂ ਤਾਂ ਖੇਡਾਂ ਦਾ ਅਹਿਮ ਯੋਗਦਾਨ ਹੈ | ਅਜਿਹੇ ਵਿਚ ਖੇਡਾਂ ਨੂੰ ਪ੍ਰਫੁੱਲਿਤ ਕਰਨ ਲਈ ਜਿੱਥੇ ਸਰਕਾਰਾਂ ਜ਼ੋਰ ਸ਼ੋਰ ਨਾਲ ਲੱਗੀਆਂ ਹੋਈਆਂ ਹਨ | ਉੱਥੇ ਪੁਰਾਣੇ ਖਿਡਾਰੀ ਅਤੇ ਸਮਾਜ ਸੇਵੀ ਵੀ ਆਪਣਾ ਬਣਦਾ ਯੋਗਦਾਨ ਪਾ ਰਹੇ ਹਨ | ਅੱਜ ਇੱਥੇ ਬਾਬਾ ਸ਼ੇਰ ਸ਼ਾਹ ਹਾਕੀ ਅਕੈਡਮੀ ਵਿਖੇ ਫ਼ਿਰੋਜ਼ਪੁਰ ਦੇ ਜੰਮਪਲ ਅਤੇ ਹਾਕੀ ਓਲੰਪੀਅਨ ਗਗਨ ਅਜੀਤ ਸਿੰਘ ਵਲ਼ੋਂ ਗੋਲ-ਕੀਪਰ ਵਾਸਤੇ ਮਹਿੰਗੀ ਕਿੱਟ ਭੇਜੀ ਹੈ ਜੋ ਅੰਤਰਰਾਸ਼ਟਰੀ ਮੁਕਾਬਲਿਆਂ ਵਿਚ ਹੀ ਵਰਤੀ ਜਾਂਦੀ ਹੈ | ਮਾਨਸ ਸੇਵਾ ਸਮਿਤੀ ਫ਼ਿਰੋਜ਼ਪੁਰ ਦੇ ਪੰਡਿਤ ਅੰਸ਼ ਦੇਵਗਨ ਅਤੇ ਜੀਵਨ ਸ਼ਰਮਾ ਵਲੋਂ ਐੱਸ.ਐੱਸ.ਪੀ ਗਗਨ ਅਜੀਤ ਸਿੰਘ ਵਲੋਂ ਭੇਜੀ ਇਹ ਕਿੱਟ ਅੱਜ ਹਾਕੀ ਕੋਚ ਮਨਮੀਤ ਸਿੰਘ ਰੂਬਲ ਨੂੰ ਭੇਟ ਕੀਤੀ ਗਈ | ਇਸ ਮੌਕੇ ਕੋਚ ਮਨਮੀਤ ਸਿੰਘ ਰੂਬਲ ਨੇ ਕਿਹਾ ਕਿ ਇਸ ਕਿੱਟ ਦੀ ਕੀਮਤ ਇਕ ਲੱਖ ਤੋਂ ਉੱਪਰ ਹੈ ਅਤੇ ਆਮ ਤੌਰ ਤੇ ਅੰਤਰਰਾਸ਼ਟਰੀ ਮੈਚਾਂ ਵਿਚ ਹੀ ਵਰਤੀ ਜਾਂਦੀ ਹੈ | ਉਨ੍ਹਾਂ ਕਿਹਾ ਕਿ ਫ਼ਿਰੋਜ਼ਪੁਰ ਵਿਖੇ ਬਹੁਤ ਸਾਰੇ ਗ਼ਰੀਬ ਘਰਾਂ ਦੇ ਬੱਚੇ ਹਾਕੀ ਦੀ ਪ੍ਰੈਕਟਿਸ ਕਰਦੇ ਹਨ | ਜਿੰਨਾ ਵਾਸਤੇ ਏਨੀ ਮਹਿੰਗੀ ਕਿੱਟ ਖ਼ਰੀਦ ਸਕਣਾ ਅਸੰਭਵ ਸੀ | ਪੰਡਿਤ ਅੰਸ਼ ਦੇਵਗਨ ਅਤੇ ਜੀਵਨ ਸ਼ਰਮਾ ਨੇ ਓਲੰਪੀਅਨ ਗਗਨ ਅਜੀਤ ਸਿੰਘ ਦੇ ਇਸ ਉਪਰਾਲੇ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ | ਇਸ ਮੌਕੇ ਰੇਲਵੇ ਦੇ ਸਪੋਰਟਸ ਸੈਕਟਰੀ ਸੁਨੀਲ ਕੈਟ, ਕਰਨ ਆਨੰਦ, ਹਾਕੀ ਖਿਡਾਰੀ ਮਨਿੰਦਰ ਹਾਂਡਾ, ਸਿਵਾਏ ਸ਼ਰਮਾ, ਜਸਪ੍ਰੀਤ ਸਿੰਘ ਬਾਬਾ, ਡਾਕਟਰ ਸਿਮਰਜੀਤ ਸਿੰਘ, ਹਾਕੀ ਖਿਡਾਰੀ ਅਤੇ ਖੇਡ ਪ੍ਰੇਮੀ ਹਾਜ਼ਰ ਸਨ |
