ਫਿਰੋਜ਼ਪੁਰ, 6 ਮਈ (ਰਾਕੇਸ਼ ਚਾਵਲਾ)-ਬੀਤੇ ਦਿਨ ਰੇਲ ਗੱਡੀ ਨੰਬਰ 22317 ਜੰਮੂ ਤਵੀ ਹਮਸਫ਼ਰ ਐਕਸਪੈੱ੍ਰਸ 'ਚ ਲੁਧਿਆਣਾ ਤੋਂ ਜੰਮੂ ਤਵੀ ਦੇ ਵਿਚਕਾਰ ਟਿਕਟ ਚੈਕਿੰਗ ਸਟਾਫ਼ ਰਾਜਿੰਦਰ ਸਿੰਘ, ਸੁਖਵਿੰਦਰ ਸਿੰਘ, ਅਮਰਜੀਤ ਸਿੰਘ ਸੰਧੂ, ਰਾਜੇਸ਼ ਕੁਮਾਰ ਰਜਕ ਅਤੇ ਰਾਜਵੀਰ ਸਿੰਘ ਸਲੀਪਰ ਕੋਚਾਂ ਵਿਚ ਟਿਕਟ ਚੈਕਿੰਗ ਦੀ ਡਿਊਟੀ 'ਤੇ ਤਾਇਨਾਤ ਸਨ | ਟਿਕਟ ਚੈਕਿੰਗ ਸਟਾਫ਼ ਰਾਜਵੀਰ ਸਿੰਘ ਨੇ ਐੱਸ-2 ਕੋਚ ਵਿਚ ਛੇ ਬੱਚਿਆਂ ਨੂੰ ਟਰੇਨ ਵਿਚ ਇਕੱਲੇ ਸਫ਼ਰ ਕਰਦੇ ਹੋਏ ਦੇਖਿਆ | ਉਨ੍ਹਾਂ ਨੇ ਆਪਣੀ ਚੌਕਸੀ ਅਤੇ ਮੁਸਤੈਦੀ ਦਾ ਸਬੂਤ ਦਿੰਦੇ ਹੋਏ ਜਦੋਂ ਬੱਚਿਆਂ ਤੋਂ ਪੁੱਛਗਿੱਛ ਕੀਤੀ, ਤਾਂ ਬੱਚਿਆਂ ਨੇ ਦੱਸਿਆ ਕਿ ਉਹ ਘਰੋਂ ਭੱਜ ਕੇ ਆਏ ਹਨ | ਇਕ ਬੱਚੇ ਵਲੋਂ ਦਿੱਤੇ ਗਏ ਮੋਬਾਈਲ ਨੰਬਰ ਦੇ ਆਧਾਰ 'ਤੇ ਉਸ ਦੇ ਮਾਪਿਆਂ ਨਾਲ ਤੁਰੰਤ ਸੰਪਰਕ ਕੀਤਾ ਗਿਆ ਅਤੇ ਉਨ੍ਹਾਂ ਨੂੰ ਸਥਿਤੀ ਬਾਰੇ ਜਾਣਕਾਰੀ ਦਿੱਤੀ ਗਈ | ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਟਰੇਨ ਕੰਡਕਟਰ ਰਾਜਿੰਦਰ ਸਿੰਘ ਨੇ ਤੁਰੰਤ ਕਮਰਸ਼ੀਅਲ ਕੰਟਰੋਲ ਰੂਮ ਜੰਮੂ ਨੂੰ ਸੂਚਿਤ ਕੀਤਾ | ਟਰੇਨ ਦੇ ਜੰਮੂ ਤਵੀ ਸਟੇਸ਼ਨ ਪਹੁੰਚਣ 'ਤੇ ਬੱਚਿਆਂ ਨੂੰ ਸੁਰੱਖਿਅਤ ਰੂਪ ਵਿਚ ਰੇਲਵੇ ਸੁਰੱਖਿਆ ਬਲ ਅਤੇ ਚਾਈਲਡ ਕੇਅਰ ਸਟਾਫ਼ ਦੇ ਹਵਾਲੇ ਕਰ ਦਿੱਤਾ ਗਿਆ | ਇਸ ਦੇ ਨਾਲ ਹੀ ਬੱਚਿਆਂ ਦੀ ਸੁਰੱਖਿਅਤ ਘਰ ਵਾਪਸੀ ਯਕੀਨੀ ਬਣਾਉਣ ਲਈ ਉਨ੍ਹਾਂ ਦੇ ਮਾਪਿਆਂ ਨਾਲ ਦੁਬਾਰਾ ਸੰਪਰਕ ਕੀਤਾ ਗਿਆ | ਮਾਪਿਆਂ ਨੇ ਦੱਸਿਆ ਕਿ ਉਹ ਬੱਚਿਆਂ ਨੂੰ ਲੈਣ ਲਈ ਜੰਮੂ ਤਵੀ ਸਟੇਸ਼ਨ ਪਹੁੰਚ ਰਹੇ ਹਨ | ਸੀਨੀਅਰ ਡਵੀਜ਼ਨਲ ਕਮਰਸ਼ੀਅਲ ਮੈਨੇਜਰ ਬਸੰਤ ਕੁਮਾਰ ਨੇ ਦੱਸਿਆ ਕਿ ਟਿਕਟ ਚੈਕਿੰਗ ਸਟਾਫ਼ ਨੇ ਆਪਣੀ ਡਿਊਟੀ ਨਿਭਾਉਂਦੇ ਹੋਏ ਬਹੁਤ ਤੱਤਪਰਤਾ ਅਤੇ ਜ਼ਿੰਮੇਵਾਰੀ ਦਾ ਪ੍ਰਦਰਸ਼ਨ ਕੀਤਾ ਹੈ, ਜੋ ਰੇਲਵੇ ਦੇ ਅਕਸ ਨੂੰ ਮਾਣਮੱਤਾ ਬਣਾਉਂਦਾ ਹੈ ਅਤੇ ਨਾਲ ਹੀ ਇਹ ਸਮੂਹ ਰੇਲ ਕਰਮਚਾਰੀਆਂ ਲਈ ਇਕ ਮਿਸਾਲੀ ਉਦਾਹਰਨ ਵੀ ਪੇਸ਼ ਕਰਦਾ ਹੈ |