ਮਮਦੋਟ-ਮਾਤਾ ਬਖ਼ਸ਼ੀਸ਼ ਕੌਰ ਦਾ ਜਨਮ 1954 ਵਿਚ ਪਿਤਾ ਸ. ਨਿਰੰਜਨ ਸਿੰਘ ਅਤੇ ਮਾਤਾ ਤੇਜ਼ ਕੌਰ ਦੇ ਘਰ ਪਿੰਡ ਰਾਉ ਕੇ ਹਿਠਾੜ ਜ਼ਿਲ੍ਹਾ ਫ਼ਿਰੋਜਪੁਰ ਵਿਖੇ ਹੋਇਆ | ਆਪ ਦਾ ਵਿਆਹ 1980 ਵਿਚ ਮਮਦੋਟ ਨਿਵਾਸੀ ਭਗਵਾਨ ਸਿੰਘ ਸਿੱਧੂ ਸਪੁੱਤਰ ਸਰਦਾਰ ਗੁਰਬਚਨ ਸਿੰਘ ਸਿੱਧੂ ਨਾਲ ਹੋਇਆ | ਆਪ ਦੇ ਘਰ ਇਕ ਸਪੁੱਤਰ ਲਖਵਿੰਦਰ ਸਿੰਘ ਅਤੇ ਸਪੁੱਤਰੀ ਕਰਮਜੀਤ ਕੌਰ ਨੇ ਜਨਮ ਲਿਆ | ਸਾਲ 2001 ਵਿਚ ਆਪ ਦੇ ਪਤੀ ਭਗਵਾਨ ਸਿੰਘ ਸਿੱਧੂ ਜ਼ਿੰਦਗੀ ਦਾ ਸਾਥ ਛੱਡ ਕੇ ਗੁਰੂ ਚਰਨਾਂ ਵਿਚ ਜਾ ਬਿਰਾਜੇ, ਉਨ੍ਹਾਂ ਦੇ ਜਾਣ ਤੋਂ ਬਾਅਦ ਵੀ ਆਪ ਨੇ ਹੌਸਲਾ ਨਹੀਂ ਹਾਰਿਆ | ਆਪ ਨੇ ਆਪਣੇ ਬੱਚਿਆਂ ਨੂੰ ਚੰਗੀ ਪਰਵਰਿਸ਼ ਅਤੇ ਚੰਗੀ ਸਿੱਖਿਆ ਦੇ ਨਾਲ-ਨਾਲ ਅੱਗੇ ਵਧਣ ਦੀ ਪੇ੍ਰਰਨਾ ਦਿੰਦਿਆਂ ਆਪਣੇ ਲੜਕੇ ਲਖਵਿੰਦਰ ਸਿੰਘ ਸਿੱਧੂ ਨੂੰ ਪਿਤਾ ਪੁਰਖੀ ਖੇਤੀਬਾੜੀ ਦੇ ਧੰਦੇ ਦੇ ਨਾਲ-ਨਾਲ ਕਾਰੋਬਾਰ ਵੱਲ ਵੀ ਪ੍ਰੇਰਿਤ ਕੀਤਾ | ਜਿਸ ਦੇ ਚੱਲਦਿਆਂ ਆਪ ਦੇ ਲੜਕੇ ਲਖਵਿੰਦਰ ਸਿੰਘ ਸਿੱਧੂ ਨੇ ਮਮਦੋਟ ਵਿਖੇ ਪ੍ਰਨੀਤ ਐਗਰੀਕਲਚਰ ਸਟੋਰ ਦੀ ਸਥਾਪਨਾ ਕਰਕੇ ਇਲਾਕੇ ਵਿਚ ਖ਼ੂਬ ਨਾਮਣਾ ਖੱਟਿਆ | ਇਲਾਕੇ ਦੇ ਸਮੁੱਚੇ ਕਿਸਾਨ ਵਰਗ ਅਤੇ ਕਾਰੋਬਾਰੀਆਂ ਵਿਚ ਆਪ ਦੇ ਲੜਕੇ ਲਖਵਿੰਦਰ ਸਿੰਘ ਸਿੱਧੂ ਨੂੰ ਨੇਕ ਸੁਭਾਅ,ਮਿੱਠ ਬੋਲੜੇ ਅਤੇ ਸਨਮਾਨਯੋਗ ਸ਼ਖ਼ਸੀਅਤ ਵਜੋਂ ਪਹਿਚਾਣਿਆ ਜਾਂਦਾ ਹੈ | ਆਪ ਦੀ ਨੂੰਹ ਅਧਿਆਪਕਾ ਕੁਲਵਿੰਦਰ ਕੌਰ, ਸਪੁੱਤਰੀ ਕਰਮਜੀਤ ਕੌਰ ਅਤੇ ਜਵਾਈ ਹਰਜਿੰਦਰ ਸਿੰਘ ਦਾ ਵੀ ਇਲਾਕੇ ਵਿਚ ਪੂਰਾ ਮਾਣ ਸਤਿਕਾਰ ਹੈ | ਬਹੁਤ ਹੀ ਠੰਢੇ ਸੁਭਾਅ ਦੇ ਮਾਲਕ ਮਾਤਾ ਬਖ਼ਸ਼ੀਸ਼ ਕੌਰ ਸਾਰੇ ਹੀ ਧਰਮਾਂ ਦਾ ਸਤਿਕਾਰ ਕਰਦੇ ਸਨ ਅਤੇ ਹਰੇਕ ਧਾਰਮਿਕ ਕਾਰਜ ਵਿਚ ਵਧ-ਚੜ੍ਹ ਕੇ ਹਿੱਸਾ ਪਾਉਂਦੇ ਸਨ | ਪਿਛਲੇ ਕੁੱਝ ਮਹੀਨਿਆਂ ਤੋਂ ਬਿਮਾਰ ਰਹਿਣ ਉਪਰੰਤ ਬੀਤੇ ਦਿਨੀ ਗੁਰੂ ਚਰਨਾਂ ਵਿਚ ਜਾ ਬਿਰਾਜੇ ਮਾਤਾ ਬਖ਼ਸ਼ੀਸ਼ ਕੌਰ ਨਮਿਤ ਸ੍ਰੀ ਸਹਿਜ ਪਾਠ ਦਾ ਭੋਗ ਅਤੇ ਅੰਤਿਮ ਅਰਦਾਸ ਅੱਜ 7 ਜੂਨ ਦਿਨ ਐਤਵਾਰ ਨੂੰ ਅਨਾਜ ਮੰਡੀ ਮਮਦੋਟ ਵਿਖੇ ਦੁਪਹਿਰ 12 ਤੋਂ 1 ਵਜੇ ਦਰਮਿਆਨ ਹੋਵੇਗੀ | -ਰਾਜਿੰਦਰ ਸਿੰਘ ਹਾਂਡਾ
