ਰਾਮਾਂ ਮੰਡੀ, 5 ਮਾਰਚ (ਤਰਸੇਮ ਸਿੰਗਲਾ)-ਰਾਮਾਂ ਮੰਡੀ ਇਲਾਕੇ ਵਿਚ ਹੋਲੀ ਦਾ ਤਿਉਹਾਰ ਲੋਕਾਂ ਵਲੋਂ ਬਹੁਤ ਹੀ ਉਤਸ਼ਾਹ ਨਾਲ ਮਨਾਇਆ ਗਿਆ | ਜਿੱਥੇ ਨੌਜਵਾਨਾਂ ਨੇ ਟੋਲੀਆਂ ਦੇ ਰੂਪ ਵਿਚ ਇਕੱਠੇ ਹੋ ਕੇ ਘਰ ਘਰ ਜਾ ਕੇ ਇਕ, ਦੂਸਰੇ ਨੂੰ ਰੰਗ ਲਾਕੇ ਹੋਲੀ ਦੀਆਂ ਵਧਾਈਆਂ ਦਿੱਤੀਆਂ, ਉਥੇ ਨਵੀਂ ਬਸਤੀ ਵਿਚ ਮਹਿਲਾਵਾਂ ਨੇ ਇਕ ਦੂਜੀ ਨੂੰ ਰੰਗ ਲਾਕੇ ਨੱਚ ਟੱਪ ਕੇ ਖੁਸ਼ੀ ਸਾਂਝੀ ਕੀਤੀ | ਸ਼ਰਾਰਤੀ ਅਨਸਰਾਂ ਨੂੰ ਹੁੱਲੜਬਾਜ਼ੀ ਕਰਕੇ ਰੰਗ 'ਚ ਭੰਗ ਪਾਉਣ ਤੋਂ ਰੋਕਣ ਲਈ ਥਾਣਾ ਮੁਖੀ ਕੌਰ ਸਿੰਘ ਵਲੋਂ ਪੁਲਿਸ ਦੇ ਸਖ਼ਤ ਪ੍ਰਬੰਧ ਕੀਤੇ ਗਏ ਸਨ ਅਤੇ ਸ਼ਹਿਰ ਦੇ ਚੌਕਾਂ ਵਿਚ ਪੁਲਿਸ ਨਾਕੇ ਅਤੇ ਗਸ਼ਤ ਲਗਾਈ ਗਈ ਸੀ | ਥਾਣਾ ਮੁਖੀ ਕੌਰ ਸਿੰਘ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਲੋਕਾਂ ਵਲੋਂ ਹੋਲੀ ਦਾ ਤਿਉਹਾਰ ਮਿਲਜੁਲ ਕੇ ਪੂਰੇ ਉਤਸ਼ਾਹ ਨਾਲ ਸ਼ਾਂਤੀਪੂਰਵਕ ਮਨਾਇਆ ਹੈ, ਜੋ ਕਿ ਇਕ ਚੰਗੀ ਰੀਤ ਹੈ |
