ਮਲੌਦ, 3 ਫਰਵਰੀ (ਦਿਲਬਾਗ ਸਿੰਘ ਚਾਪੜਾ)- ਸ਼ੋ੍ਰਮਣੀ ਅਕਾਲੀ ਦਲ ਦੇ ਹਲਕਾ ਪਾਇਲ ਤੋਂ ਇੰਚਾਰਜ ਮਨਜੀਤ ਸਿੰਘ ਮਦਨੀਪੁਰ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਲੋਕਾਂ ਨਾਲ ਝੂਠੇ ਵਾਅਦੇ ਕਰਕੇ ਸੱਤਾ ਦੇ ਵਿਚ ਆਈ ਅਤੇ ਪੰਜਾਬ ਦੇ ਲੋਕਾਂ ਨੇ 92 ਦੇ ਕਰੀਬ ਐਮ ਐਲ ਏ ਜਿਤਾ ਕੇ ਪੰਜਾਬ ਦੀ ਵਿਧਾਨ ਸਭਾ ਭੇਜੇ | ਉਨ੍ਹਾਂ ਦੇ ਵਿਚੋਂ ਹੀ ਇਕ ਹਲਕਾ ਪਾਇਲ ਤੋਂ ਵਿਧਾਇਕ ਮਨਵਿੰਦਰ ਸਿੰਘ ਗਿਆਸਪੁਰਾ ਵੀ ਹਨ, ਜੋ ਕਿ ਆਪਣੇ ਮੁੱਖ ਮੰਤਰੀ ਦੀ ਤਰ੍ਹਾਂ ਵਿਕਾਸ ਕਾਰਜਾਂ ਜਾਂ ਪ੍ਰਾਪਤੀਆਂ ਦੀ ਬਜਾਏ ਜ਼ਿਆਦਾਤਰ ਵਿਰੋਧੀਆਂ 'ਤੇ ਤੰਝ ਕਸਦੇ ਨਜ਼ਰ ਆਉਂਦੇ ਹਨ | ਜਥੇ. ਮਦਨੀਪੁਰ ਨੇ ਕਿਹਾ ਕਿ ਜਦੋਂ ਗਿਆਸਪੁਰਾ ਨੇ ਆਪਣੀ ਸਿਆਸਤ ਚਮਕਾਉਣੀ ਹੁੰਦੀ ਹੈ ਜਾਂ ਕੋਈ ਰਾਜਸੀ ਲਾਹਾ ਖੱਟਣਾ ਹੁੰਦਾ ਹੈ ਤਾਂ ਉਹ ਹੋਂਦ ਚਿੱਲੜ ਦੇ ਮਹਾਨ ਸ਼ਹੀਦਾਂ ਨੂੰ ਇਨਸਾਫ਼ ਦਿਵਾਉਣ ਦੀ ਗੱਲ ਕਰਦੇ ਹਨ |
