ਅਹਿਮਦਗੜ੍ਹ, 20 ਫਰਵਰੀ (ਰਵਿੰਦਰ ਪੁਰੀ)-ਪੰਜਾਬ ਦੇ ਸਿਆਸੀ ਗਲਿਆਰਿਆਂ 'ਚ ਰਿਸ਼ਤਿਆਂ ਦੀ ਗਰਮਜੋਸ਼ੀ, ਸਿਧਾਂਤਕ ਸਾਂਝ ਅਤੇ ਦਹਾਕਿਆਂ ਦੀ ਵਫ਼ਾਦਾਰੀ ਆਪਣੀ ਇੱਕ ਵੱਖਰੀ ਇਬਾਰਤ ਲਿਖਦੀ ਆ ਰਹੀ ਹੈ | ਇਸੇ ਇਬਾਰਤ ਨੂੰ ਅੱਜ ਉਸ ਵੇਲੇ ਇੱਕ ਸੁਨਹਿਰਾ ਅਧਿਆਇ ਨਸੀਬ ਹੋਇਆ, ਜਦੋਂ ਹਲਕਾ ਅਮਰਗੜ੍ਹ 'ਚ ਵਿਚਰ ਰਹੇ ਸੀਨੀਅਰ ਕਾਂਗਰਸੀ ਆਗੂ ਤੇ ਇਲਾਕੇ ਦੀ ਹਰਮਨ-ਪਿਆਰੀ ਸਿਆਸੀ ਸ਼ਖ਼ਸੀਅਤ ਕਮਲਪ੍ਰੀਤ ਸਿੰਘ ਧਾਲੀਵਾਲ ਨੇ ਆਪਣੇ ਪਰਿਵਾਰ ਸਮੇਤ ਕਾਂਗਰਸ ਦੇ ਰੂਹੇ-ਰਵਾਂ ਰਾਹੁਲ ਗਾਂਧੀ ਨਾਲ ਇੱਕ ਉੱਚ-ਪੱਧਰੀ ਵਿਸ਼ੇਸ਼ ਮੁਲਾਕਾਤ ਕੀਤੀ | ਇਹ ਮੁਲਾਕਾਤ ਕੋਈ ਸਾਧਾਰਨ ਸਿਆਸੀ ਸ਼ਿਸ਼ਟਾਚਾਰ ਨਹੀਂ ਸੀ, ਸਗੋਂ ਇਹ ਉਸ ਅਟੁੱਟ ਵਿਸ਼ਵਾਸ ਦੀ ਗਵਾਹੀ ਸੀ ਜੋ ਧਾਲੀਵਾਲ ਵਲੋਂ ਦਹਾਕਿਆਂ ਤੋਂ ਕਾਂਗਰਸ ਪਾਰਟੀ ਤੇ ਗਾਂਧੀ ਪਰਿਵਾਰ ਪ੍ਰਤੀ ਨਿਭਾਇਆ ਗਿਆ ਹੈ | ਸਿਆਸੀ ਮਾਹਿਰ ਇਸ ਮਿਲਣੀ ਨੂੰ ਬਹੁਤ ਅਹਿਮ ਮੰਨ ਰਹੇ ਹਨ, ਕਿਉਂਕਿ ਰਾਹੁਲ ਗਾਂਧੀ ਵਲੋਂ ਧਾਲੀਵਾਲ ਪਰਿਵਾਰ ਨੂੰ ਦਿੱਤਾ ਗਿਆ ਲੰਬਾ ਸਮਾਂ ਤੇ ਨਿੱਘ ਇਹ ਸਾਬਤ ਕਰਦਾ ਹੈ ਕਿ ਕਮਲਪ੍ਰੀਤ ਸਿੰਘ ਧਾਲੀਵਾਲ ਸਿਰਫ਼ ਇੱਕ ਆਗੂ ਵਜੋਂ ਹੀ ਨਹੀਂ, ਸਗੋਂ ਕਾਂਗਰਸ ਹਾਈਕਮਾਂਡ ਦੇ ਇੱਕ ਭਰੋਸੇਮੰਦ ਸਿਪਾਹੀ ਤੇ ਪਰਿਵਾਰਕ ਜੀਅ ਵਾਂਗ ਸਥਾਪਤ ਹੋ ਚੁੱਕੇ ਹਨ | ਕਮਲਪ੍ਰੀਤ ਸਿੰਘ ਧਾਲੀਵਾਲ ਅਤੇ ਰਾਹੁਲ ਗਾਂਧੀ ਦੀਆਂ ਲਗਾਤਾਰ ਹੋ ਰਹੀਆਂ ਇਹ ਮੁਲਾਕਾਤਾਂ ਪੰਜਾਬ ਅਤੇ ਖ਼ਾਸ ਕਰ ਕੇ ਹਲਕਾ ਅਮਰਗੜ੍ਹ ਦੀ ਸਿਆਸਤ 'ਚ ਨਵੇਂ ਅਧਿਆਇ ਲਿਖਣ ਦਾ ਸੰਕੇਤ ਹਨ | ਮੁਲਾਕਾਤ ਦੌਰਾਨ ਰਾਹੁਲ ਗਾਂਧੀ ਦਾ ਸਹਿਜ ਸੁਭਾਅ ਅਤੇ ਧਾਲੀਵਾਲ ਪਰਿਵਾਰ ਦੇ ਬੱਚਿਆਂ ਤੇ ਮੈਂਬਰਾਂ ਨਾਲ ਗੂੜ੍ਹੀਆਂ ਗੱਲਾਂ ਕਰਨਾ ਉਨ੍ਹਾਂ ਦੇ ਆਪਸੀ ਨਿੱਘ ਅਤੇ ਸਤਿਕਾਰ ਨੂੰ ਬਾਖ਼ੂਬੀ ਬਿਆਨ ਕਰ ਰਿਹਾ ਸੀ | ਕਮਲ ਧਾਲੀਵਾਲ ਨੇ ਮੁਲਾਕਾਤ ਦੇ ਅੰਸ਼ ਸਾਂਝੇ ਕਰਦਿਆਂ ਦੱਸਿਆ ਕਿ ਗਾਂਧੀ ਪਰਿਵਾਰ ਨਾਲ ਉਨ੍ਹਾਂ ਦਾ ਰਿਸ਼ਤਾ ਸਿਆਸਤ ਤੋਂ ਉੱੱਪਰ ਉੱਠ ਕੇ ਜਜ਼ਬਾਤਾਂ ਅਤੇ ਸਿਧਾਂਤਾਂ 'ਤੇ ਟਿਕਿਆ ਹੋਇਆ ਹੈ | ਰਾਹੁਲ ਗਾਂਧੀ ਨਾਲ ਜਿੱਥੇ ਦੇਸ਼ ਦੀ ਮੌਜੂਦਾ ਸਥਿਤੀ ਅਤੇ ਕਾਂਗਰਸ ਦੀ ਮਜ਼ਬੂਤੀ ਬਾਰੇ ਚਰਚਾ ਹੋਈ, ਉੱਥੇ ਹੀ ਮੈਂ ਅਮਰਗੜ੍ਹ ਹਲਕੇ ਦੀਆਂ ਮੁਸ਼ਕਲਾਂ, ਲੋਕਾਂ ਦੀਆਂ ਭਾਵਨਾਵਾਂ ਅਤੇ ਇਲਾਕੇ ਦੇ ਵਿਕਾਸ ਦੇ ਮੁੱਦਿਆਂ ਨੂੰ ਬੜੇ ਪ੍ਰਭਾਵਸ਼ਾਲੀ ਢੰਗ ਨਾਲ ਉਨ੍ਹਾਂ ਦੇ ਸਨਮੁੱਖ ਰੱਖਿਆ ਹੈ | ਇਸ ਮੁਲਾਕਾਤ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੁੰਦਿਆਂ ਹੀ ਹਲਕਾ ਅਮਰਗੜ੍ਹ ਦੇ ਕਾਂਗਰਸੀ ਵਰਕਰਾਂ ਵਿਚ ਜਸ਼ਨ ਦਾ ਮਾਹੌਲ ਹੈ | ਵਰਕਰਾਂ ਦਾ ਮੰਨਣਾ ਹੈ ਕਿ ਧਾਲੀਵਾਲ ਦੀ ਹਾਈਕਮਾਂਡ ਤੱਕ ਇਹ ਸਿੱਧੀ ਅਤੇ ਮਜ਼ਬੂਤ ਪਹੁੰਚ ਆਉਣ ਵਾਲੇ ਸਮੇਂ ਵਿਚ ਹਲਕਾ ਅਮਰਗੜ੍ਹ ਦੀ ਨੁਹਾਰ ਬਦਲਣ ਵਿਚ ਸਹਾਈ ਹੋਵੇਗੀ | ਦੂਜੇ ਪਾਸੇ ਸਿਆਸੀ ਪੰਡਤਾ ਦਾ ਕਹਿਣਾ ਹੈ ਕਿ ਕਮਲਪ੍ਰੀਤ ਸਿੰਘ ਧਾਲੀਵਾਲ ਦਾ ਵਧਦਾ ਸਿਆਸੀ ਕੱਦ ਆਉਣ ਵਾਲੀਆਂ ਚੋਣਾਂ ਅਤੇ ਪਾਰਟੀ ਦੇ ਜਥੇਬੰਦਕ ਢਾਂਚੇ ਵਿਚ ਉਨ੍ਹਾਂ ਦੀ ਵੱਡੀ ਭੂਮਿਕਾ ਵੱਲ ਸਾਫ਼ ਇਸ਼ਾਰਾ ਕਰ ਰਿਹਾ ਹੈ | ਇਹ ਮੁਲਾਕਾਤ ਇਸ ਗੱਲ ਦੀ ਤਸਦੀਕ ਕਰਦੀ ਹੈ ਕਿ ਜਦੋਂ ਨਿਸ਼ਠਾ ਅਤੇ ਮਿਹਨਤ ਦਾ ਮੇਲ ਹੁੰਦਾ ਹੈ, ਤਾਂ ਸਿਆਸਤ ਦੇ ਕਾਫ਼ਲੇ ਆਪਣੇ ਆਪ ਬਣਦੇ ਚਲੇ ਜਾਂਦੇ ਹਨ |
