ਖੰਨਾ, 7 ਮਾਰਚ (ਹਰਜਿੰਦਰ ਸਿੰਘ ਲਾਲ)-ਅੱਜ ਭਾਰਤੀ ਕਿਸਾਨ ਯੂਨੀਅਨ ਲੱਖੋਵਾਲ ਦੇ ਸੂਬਾ ਪ੍ਰਧਾਨ ਹਰਿੰਦਰ ਸਿੰਘ ਲੱਖੋਵਾਲ ਨੇ ਕਿਸਾਨਾਂ ਨਾਲ ਕੰਟਰੈਕਟ ਕਰਕੇ, ਮਹਿੰਗੇ ਭਾਅ ਬੀਜ ਦੇ ਕੇ, 12 ਰੁਪਏ ਕਿੱਲੋ ਆਲੂ ਖ਼ਰੀਦਣ ਦਾ ਵਾਅਦਾ ਕਰਨ ਤੇ ਹੁਣ ਆਲੂ ਖ਼ਰੀਦਣ ਤੋਂ ਭੱਜ ਰਹੀਆਂ ਕੰਪਨੀਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ | ਲੱਖੋਵਾਲ ਨੇ ਕਿਹਾ ਕਿ ਹੁਣ ਇਹ ਕੰਪਨੀਆਂ ਆਲੂ ਖ਼ਰੀਦਣ ਤੋਂ ਕੋਰਾ ਜਵਾਬ ਹੀ ਨਹੀਂ ਦੇ ਰਹੀਆਂ ਸਗੋਂ ਧੋਖੇ ਨਾਲ ਆਪਣੇ ਹੀ ਬਾਹਰੀ ਵਪਾਰੀਆਂ ਰਾਹੀਂ ਉਹੀ ਆਲੂ 4 ਰੁਪਏ ਤੋਂ 5 ਰੁਪਏ ਕਿੱਲੋ ਦੇ ਹਿਸਾਬ ਨਾਲ ਖ਼ਰੀਦ ਰਹੀਆਂ ਹਨ | ਇਸ ਨਾਲ ਕਿਸਾਨਾਂ ਦਾ ਵੱਡਾ ਆਰਥਿਕ ਨੁਕਸਾਨ ਹੋ ਰਿਹਾ ਹੈ | ਆਲੂਆਂ ਦੀ ਫ਼ਸਲ ਇਸ ਵਾਰ ਵੱਡੀ ਮਾਤਰਾ ਵਿੱਚ ਹੋਈ ਹੈ ਅਤੇ ਫਰਵਰੀ ਮਾਰਚ ਮਹੀਨੇ ਵਿੱਚ ਹੀ ਇਸ ਨੂੰ ਪਟਾਈ ਤੋਂ ਬਾਅਦ ਸਾਂਭਣਾ ਪੈਂਦਾ ਹੈ ਕਿਸਾਨ ਇਸ ਨੂੰ ਆਪਣੇ ਘਰ ਨਹੀਂ ਰੱਖ ਸਕਦਾ | ਸਾਡੀ ਪੰਜਾਬ ਸਰਕਾਰ ਤੋਂ ਮੰਗ ਹੈ ਕਿ ਕੰਨਟਰੈਕਟ ਤੋਂ ਭੱਜਣ ਵਾਲੀਆਂ ਕੰਪਨੀਆਂ ਤੇ ਪਰਚੇ ਦਰਜ ਕੀਤੇ ਜਾਣ ਅਤੇ ਮਾਰਕਫੈੱਡ ਰਾਹੀਂ ਆਲੂਆਂ ਦੀ ਖ਼ਰੀਦ ਤੁਰੰਤ ਕਰਵਾਈ ਜਾਵੇ ਨਹੀਂ ਤਾਂ ਮਜਬੂਰ ਹੋਏ ਕਿਸਾਨਾਂ ਨੂੰ ਆਲੂ ਸੜਕਾਂ 'ਤੇ ਸੁੱਟਣੇ ਪੈਣਗੇ | ਜੇ ਕਿਸਾਨਾਂ ਦੇ ਆਲੂ ਨਾ ਵਿਕਵਾਏ ਗਏ ਅਤੇ ਧੋਖਾ ਕਰਨ ਵਾਲੀਆਂ ਕੰਪਨੀਆਂ ਖ਼ਿਲਾਫ਼ ਕਾਰਵਾਈ ਨਾ ਕੀਤੀ ਗਈ ਤਾਂ ਭਾਰਤੀ ਕਿਸਾਨ ਯੂਨੀਅਨ ਲੱਖੋਵਾਲ ਸੜਕਾਂ 'ਤੇ ਆ ਕੇ ਸੰਘਰਸ਼ ਕਰਨ ਲਈ ਮਜਬੂਰ ਹੋਵੇਗੀ |
