ਰਾੜਾ ਸਾਹਿਬ ਵਿਖੇ ਨਵੇਂ ਬਣੇ ਨਹਿਰੀ ਪੁਲ 'ਤੇ ਉੱਡ ਰਹੀ ਧੂੜ ਨੇ ਕੀਤਾ ਜਨਤਾ ਨੂੰ ਪ੍ਰੇਸ਼ਾਨ

ਅ

ਅਜੀਤ ਡੈਸਕ 28-04-2026

ਰਾੜਾ ਸਾਹਿਬ, 27 ਅਪ੍ਰੈਲ (ਪ੍ਰੀਤਮ ਸਿੰਘ ਮੁਕੰਦਪੁਰੀ)-ਰਾੜਾ ਸਾਹਿਬ ਵਿਖੇ ਬਠਿੰਡਾ ਬ੍ਰਾਂਚ ਨਹਿਰ ਉਪਰ ਪੰਜਾਬ ਮੰਡੀ ਬੋਰਡ ਦੀ ਦੇਖਰੇਖ ਹੇਠ ਨਵੇਂ ਬਣੇ ਪੁਲ ਨਾਲ ਜਿੱਥੇ ਲੋਕਾਂ ਦੀ ਚਿਰੋਕਣੀ ਮੰਗ ਪੂਰੀ ਹੋਈ ਹੈ, ਉਥੇ ਪੁਲ ਦੇ ਦੋਵੇਂ ਪਾਸੇ ਸਹੀ ਰੂਪ ਵਿੱਚ ਪ੍ਰੀਮਿਕਸ ਆਦਿ ਨਾ ਪਾਉਣ ਕਰਕੇ ਉਥੋਂ ਦੀ ਲੰਘ ਰਹੇ ਵਾਹਨਾਂ ਨਾਲ ਉਡ ਰਹੀ ਧੂੜ ਨਾਲ ਆਮ ਪਬਲਿਕ, ਰਾਹਗੀਰ ਅਤੇ ਦੁਕਾਨਦਾਰ ਰੋਜ਼ਾਨਾ ਪ੍ਰੇਸ਼ਾਨ ਹੋ ਰਹੇ ਹਨ | ਜ਼ਿਕਰਯੋਗ ਹੈ ਕਿ ਗੁਰਦੁਆਰਾ ਰਾੜਾ ਸਾਹਿਬ ਵਿਖੇ ਰੋਜ਼ਾਨਾ ਵੱਡੀ ਗਿਣਤੀ ਵਿੱਚ ਸੰਗਤਾਂ ਨਤਮਸਤਕ ਹੋਣ ਲਈ ਪਹੁੰਚਦੀਆਂ ਹਨ | ਇਹ ਧੂੜ ਜਿਥੇ ਲੋਕਾਂ ਦੀ ਸਿਹਤ ਅਤੇ ਸਫ਼ਾਈ ਨਾਲ ਖਿਲਵਾੜ ਕਰ ਰਹੀ ਹੈ ਉਥੇ ਆਲੇ ਦੁਆਲੇ ਦੁਕਾਨਾਂ ਉੱਪਰ ਵਿਕ ਰਹੀਆਂ ਮਠਿਆਈਆਂ ਅਤੇ ਹੋਰ ਖਾਦ ਪਦਾਰਥਾਂ ਦੀ ਮਿਕਦਾਰ ਅਤੇ ਮਿਆਰ ਨੂੰ ਵੀ ਪ੍ਰਭਾਵਿਤ ਕਰ ਰਹੀ | ਪ੍ਰੇਸ਼ਾਨੀ ਦੇ ਆਲਮ ਵਿਚ ਕੁੱਝ ਸਮਾਜਸੇਵੀ ਸੰਸਥਾਵਾਂ ਅਤੇ ਸੁਹਿਰਦ ਸ਼ਖ਼ਸੀਅਤਾਂ ਵਲੋਂ ਆਪਣੇ ਤੌਰ ਤੌਰ ਰੋਜ਼ਾਨਾ ਪਾਣੀ ਦਾ ਛਿੜਕਾਅ ਕੀਤਾ ਜਾ ਰਿਹਾ ਹੈ | ਇਹ ਵੀ ਦੱਸ ਦਈਏ ਕਿ ਸਰਕਾਰ ਵਲੋਂ ਇਸ ਦਾ ਅਜੇ ਤੱਕ ਰਸਮੀ ਉਦਘਾਟਨ ਨਹੀਂ ਕੀਤਾ ਗਿਆ ਜਿਸ ਕਰਕੇ ਆਵਾਜਾਈ ਪ੍ਰਬੰਧਨ ਤੋਂ ਅੱਕੇ ਲੋਕਾਂ ਨੇ ਆਪਣੇ ਆਪ ਹੀ ਇਸ ਦੀ ਲਾਂਘੇ ਵਜੋਂ ਵਰਤੋਂ ਸ਼ੁਰੂ ਕਰ ਦਿੱਤੀ ਹੈ | ਇਸ ਸਮੇਂ ਗੁਰਮੀਤ ਸਿੰਘ ਡਰਾਈਕਲੀਨ, ਨੰਦੂ ਇਲੈਕਟਰੀਸਨ, ਗੁਰਮੀਤ ਹਾਰਡਵੇਅਰ, ਗੁਰਪ੍ਰੀਤ ਸਿੰਘ ਲਾਡੀ, ਤੇਜਪਾਲ ਲਾਈਟ ਹਾਊਸ, ਬੂਟਾ ਘਣਗਸ, ਪੁਨੀਤ ਕਰਿਆਨਾ ਸਟੋਰ, ਹਰਜੀਤ ਇਲੈਕਟਰੋਨਿਕ, ਪਰਮਿੰਦਰ ਸਿੰਘ ਰਿੰਕਾ, ਹਰਪ੍ਰੀਤ ਸਿੰਘ ਪੀਤਾ, ਸੁਖਵਿੰਦਰ ਸਿੰਘ ਬੱਬੂ, ਸਾਦੀ ਸਿੰਘ ਭੱਟੀ, ਬਲਵਿੰਦਰ ਸਿੰਘ ਕਟਾਹਰੀ, ਚਮਕੌਰ ਸਿੰਘ ਪ੍ਰਾਪਰਟੀ ਡੀਲਰ, ਗੁਰਮੀਤ ਸਿੰਘ ਸੀਲੋਂ, ਜਸਪਾਲ ਸਿੰਘ ਭੋਲਾ, ਅਮਨ ਘਣਗਸ ਅਤੇ ਹੋਰ ਦੁਕਾਨਦਾਰ ਨੇ ਪੁਲ ਤੇ ਇਕੱਠੇ ਹੋ ਕੇ ਮੰਗ ਕੀਤੀ ਕਿ ਇਸ ਦੇ ਦੋਵੇਂ ਪਾਸਿਆਂ ਤੋਂ ਪ੍ਰੀਮਿਕਸ ਪਾ ਕੇ ਲੋੜੀਂਦੀ ਢਾਲ ਬਣਾਈ ਜਾਵੇ ਤਾਂ ਜੋ ਮਿੱਟੀ ਘੱਟੇ ਅਤੇ ਅਣਸੁਖਾਵੀਂ ਦੁਰਘਟਨਾ ਤੋਂ ਬਚਿਆ ਜਾ ਸਕੇ |
ਇਸ ਸਬੰਧੀ ਜਤਿਨ ਸਿੰਗਲਾ ਐਕਸੀਅਨ ਪੰਜਾਬ ਮੰਡੀ ਬੋਰਡ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਅੱਜ ਕੱਲ੍ਹ ਲੁੱਕ ਸਪਲਾਈ ਦੀ ਘਾਟ ਹੈ ਜਿਸ ਕਾਰਨ ਪ੍ਰੀਮਿਕਸ ਪਾਉਣ ਦਾ ਕੰਮ ਪਛੜ ਗਿਆ ਹੈ | ਇਸ ਕਾਰਜ ਨੂੰ ਪਹਿਲ ਦੇ ਆਧਾਰ ਤੇ ਆਉਣ ਵਾਲੇ ਦਿਨਾਂ ਵਿੱਚ ਮੁਕੰਮਲ ਕਰ ਦਿੱਤਾ ਜਾਵੇਗਾ |