ਮਲੌਦ, 28 ਅਪ੍ਰੈਲ (ਕੁਲਵਿੰਦਰ ਸਿੰਘ ਨਿਜ਼ਾਮਪੁਰ)- ਬਲਾਕ ਕਾਂਗਰਸ ਮਲੌਦ ਦੇ ਪ੍ਰਧਾਨ ਗੁਰਮੇਲ ਸਿੰਘ ਗਿੱਲ ਬੇਰਕਲਾਂ ਤੇ ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਅਵਤਾਰ ਸਿੰਘ ਤਾਰੀ ਰਾਮਗੜ੍ਹ ਸਰਦਾਰਾਂ ਨੇ ਕਿਹਾ ਕਿ ਸਾਬਕਾ ਮੁੱਖ ਮੰਤਰੀ ਤੇ ਮੈਂਬਰ ਪਾਰਲੀਮੈਂਟ ਚਰਨਜੀਤ ਸਿੰਘ ਚੰਨੀ ਨੇ ਆਪਣੇ ਸੀਮਤ ਸਮਾਂ ਤਿੰਨ ਮਹੀਨੇ ਮੁੱਖ ਮੰਤਰੀ ਰਹਿਣ ਮੌਕੇ ਪੰਜਾਬ ਦੀ ਭਲਾਈ ਲਈ ਉਹ ਕੰਮ ਕਰਕੇ ਵਿਖਾਏ ਜਿਹੜੇ ਕੰਮ ਅੱਜ ਤੱਕ ਕਿਸੇ ਹੋਰ ਮੁੱਖ ਮੰਤਰੀ ਤੋਂ ਨਹੀਂ ਹੋਏ, ਕਾਂਗਰਸ ਹਾਈਕਮਾਂਡ ਨੂੰ ਬਿਨਾ ਕਿਸੇ ਦੇਰੀ ਕੀਤਿਆਂ ਚਰਨਜੀਤ ਸਿੰਘ ਚੰਨੀ ਨੂੰ 2027 ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਮੁੱਖ ਮੰਤਰੀ ਦਾ ਚਿਹਰਾ ਐਲਾਨ ਦੇਣਾ ਚਾਹੀਦਾ ਹੈ | ਕਿਉਂਕਿ ਚੰਨੀ ਹੀ ਪੰਜਾਬ ਅੰਦਰ ਕਾਂਗਰਸ ਪਾਰਟੀ ਦੀ ਸਰਕਾਰ ਬਣਾ ਸਕਦੇ ਹਨ | ਉਨ੍ਹਾਂ ਕਿਹਾ ਕਿ ਹਰ ਵਰਗ ਦੀ ਹੱਕ-ਸੱਚ ਨਾਲ ਗੱਲ ਕਰਨ ਵਾਲੇ ਪੰਜਾਬ ਦੇ ਮੁੱਦੇ, ਕਿਸਾਨ ਵਰਗ ਦੇ ਮੁੱਦੇ ਚੁੱਕਣ ਵਾਲੇ ਚੰਨੀ ਨੂੰ ਸੂਬੇ ਦੇ ਲੋਕ ਮੁੱਖ ਮੰਤਰੀ ਬਣਿਆ ਵੇਖਣਾ ਚਾਹੁੰਦੇ ਹਨ | ਉਕਤ ਆਗੂਆਂ ਨੇ ਕਿਹਾ ਕਿ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਮੁੱਖ ਮੰਤਰੀ ਕਾਰਜਕਾਲ ਦੌਰਾਨ ਬਿਜਲੀ ਦੇ ਕਈ ਸਾਲਾਂ ਤੋਂ ਬਕਾਇਆ ਖੜੇ ਬਿੱਲ ਮੁਆਫ਼ ਕੀਤੇ, ਵਾਟਰ ਸਪਲਾਈ ਦੇ ਬਿੱਲ ਮੁਆਫ਼ ਕੀਤੇ, ਬੀਬੀਆਂ ਨੂੰ ਸਰਕਾਰੀ ਬੱਸ ਦੀ ਫ਼ਰੀ ਸਹੂਲਤ ਦਿੱਤੀ ਅਤੇ ਕਿਸਾਨ ਵਰਗ ਵਲੋਂ ਕਾਲੇ ਕਾਨੂੰਨ ਰੱਦ ਕਰਨ ਲਈ ਲਾਏ ਜਾ ਰਹੇ ਰੋਸ ਪ੍ਰਦਰਸ਼ਨ ਸਮੇਂ ਕਿਸੇ ਵੀ ਕਿਸਮ ਦੀ ਦਿੱਕਤ ਨਹੀ ਆਉਣ ਦਿੱਤੀ ਸੀ |
