ਸੜਕ ਵਿਚਕਾਰ ਪੁੱਟਿਆ ਡੂੰਘਾ ਲੰਮਾ ਖੱਡਾ ਬਣ ਰਿਹਾ ਹਾਦਸਿਆਂ ਦਾ ਕਾਰਨ

ਮਾਛੀਵਾੜਾ ਸਾਹਿਬ, 19 ਜੁਲਾਈ (ਮਨੋਜ ਕੁਮਾਰ)-ਸਥਾਨਕ ਰਾਹੋਂ ਰੋਡ ਤੇ ਪੈਟਰੋਲ ਪੰਪ ਤੋ ਮਹਿਜ਼ ਕੁੱਝ ਗਜ਼ ਦੀ ਦੂਰੀ ’ਤੇ ਸੜਕ ਵਿਚਕਾਰ ਕਰੀਬ 2 ਫੁੱਟ ਚੌੜਾ ਤੇ 20 ਫੁੱਟ ਲੰਮਾ ਪੁੱਟਿਆ ਟੋਇਆ ਹਰ ਪਲ ਕਿਸੇ ਨਾ ਕਿਸੇ ਅਣਸੁਖਾਂਵੀ ਘਟਨਾ ਨੂੰ ਸੱਦਾ ਦੇ ਰਿਹਾ ਹੈ। ਹਾਲਾਤ ਇਹ ਹਨ ਕਿ ਇਹ ਟੋਇਆ ਲਗਾਤਾਰ ਵਧਦਾ ਜਾ ਰਿਹਾ ਹੈ ਤੇ ਇਸ ਸੜਕ ਤੋਂ ਨਿਕਲਣ ਵਾਲੇ ਰਾਹਗੀਰ ਬਹੁਤ ਮੁਸ਼ਕਿਲ ਦਾ ਸਾਹਮਣਾ ਕਰ ਰਹੇ ਹਨ। ਦਿਨ ਸਮੇਂ ਤਾਂ ਕੁੱਝ ਨਾ ਕੁੱਝ ਬਚਾਅ ਹੋ ਸਕਦਾ ਹੈ ਪਰ ਰਾਤ ਸਮੇਂ ਨਿਕਲਣ ਵਾਲੇ ਰਾਹਗੀਰ ਕਿੱਸੇ ਵੇਲੇ ਵੀ ਕੋਈ ਵੱਡੀ ਦੁਰਘਟਨਾ ਦਾ ਸ਼ਿਕਾਰ ਹੋ ਸਕਦੇ ਹਨ ਕਿਉਂ ਕਿ ਰਾਹੋਂ ਤੇ ਨਵਾਂਸ਼ਹਿਰ ਨੂੰ ਜਾਣ ਲਈ ਇਸ ਸੜਕ ‘ਤੇ ਰਾਹਗੀਰਾਂ ਦੀ ਦਿਨ ਰਾਤ ਭਰਮਾਰ ਰਹਿੰਦੀ ਹੈ। ਹਾਲਾਂਕਿ ਇਸ ਸੜਕ ਦੇ ਵਿਚਕਾਰ ਪੁੱਟਿਆ ਇਹ ਟੋਇਆ ਸ਼ਾਇਦ ਕਿਸੇ ਨੇ ਪਾਈਪ ਪਾਉਣ ਲਈ ਪੁੱਟਿਆ, ਸਰਕਾਰੀ ਸੜਕ ਨਾਲ ਇਸ ਤਰਾਂ ਦੀ ਛੇੜਛਾੜ ਆਪਣੇ ਆਪ ਵਿਚ ਕਾਨੂੰਨ ਦੀ ਉਲੰਘਣਾ ਹੈ। ਆਮ ਰਾਹਗੀਰਾਂ ਦੀ ਮੰਗ ਹੈ ਕਿ ਉਹ ਕਿਸੇ ਅਣਸੁਖਾਂਵੀ ਘਟਨਾ ਤੋਂ ਪਹਿਲਾਂ ਹੀ ਇਸ ਟੋਏ ਨੂੰ ਪੱਕਾ ਕਰੇ ਤਾਂ ਕਿ ਜਾਨੀ ਨੁਕਸਾਨ ਤੋਂ ਬਚਾਅ ਹੋ ਸਕੇ।