ਬੜੀ ਹੀ ਅਜੀਬ ਗੱਲ ਹੈ ਕਿ ਇਹ ਡਰ ਲੋਕਾਂ ਨੂੰ ਹੁਣ ਤੋਂ ਹੀ ਸਤਾਉਣ ਲੱਗ ਪਿਆ ਹੈ। ਜੇ ਭਾਰਤ ਦੇ ਮਾਨਸੂਨ ਵਿਭਾਗ ਦੀਆਂ ਰਿਪੋਰਟਾਂ ਦੇਖੀਏ ਤਾਂ ਉਸ ਦੇ ਅਨੁਸਾਰ ਇਸ ਸਾਲ ਬਰਸਾਤ ਵਿਚ ਪਿਛਲੇ ਸਾਲ ਨਾਲੋਂ ਘੱਟ ਮੀਂਹ ਪਵੇਗਾ ਅਤੇ ਪਾਣੀ ਘਟੇਗਾ, ਜਿਸ ਨਾਲ ਹੜ੍ਹਾਂ ਦੀ ਸੰਭਾਵਨਾ ਘਟ ਜਾਂਦੀ ਹੈ। ਪਰ ਦੂਜੇ ਪਾਸੇ ਪੀ. ਡੀ. ਐਮ. ਏ. ਵਲੋਂ ਜਾਰੀ ਕੀਤੀ ਗਈ ਸੂਚਨਾ ਅਨੁਸਾਰ ਉੵਤਰੀ ਭਾਗਾਂ ਵਿਚ 6 ਤੋਂ 9 ਸਤੰਬਰ ਤੱਕ ਭਾਰੀ ਮੀਂਹ ਪੈਣ ਦੀ ਸੰਭਾਵਨਾ ਹੈ, ਜਿਸ ਨਾਲ ਡੈਮਾਂ ਵਿਚ ਪਾਣੀ ਦਾ ਪੱਧਰ ਕਾਫ਼ੀ ਵਧ ਸਕਦੇ ਹੈ। ਇਸ ਲਈ ਹੋ ਸਕਦਾ ਹੈ ਕਿ ਫਲੱਡ ਗੇਟ ਖੋਲ੍ਹਣੇ ਪੈਣ। ਇਸ ਦਾ ਇਕ ਹੋਰ ਕਾਰਨ ਵੀ ਹੈ ਕਿ ਪਿਛਲੇ ਸਮੇਂ ਵਿਚ ਕੁਝ ਪ੍ਰਸ਼ਾਸਨਿਕ ਕਾਰਨਾਂ ਕਰਕੇ ਅਤੇ ਕੁਝ ਲਾਪ੍ਰਵਾਹੀ ਕਰਕੇ ਡੈਮਾਂ 'ਚੋਂ ਗਾਰ ਨਹੀਂ ਕੱਢੀ ਜਾ ਸਕੀ। ਇਸ ਲਈ ਪਾਣੀ ਦਾ ਪੱਧਰ ਉੱਚਾ ਰਹਿਣ ਦੀ ਸੰਭਾਵਨਾ ਹੈ। ਦੋਵੇਂ ਹੀ ਗੱਲਾਂ ਹਨ, ਪਰ ਆਮ ਬੰਦੇ ਲਈ ਇਹ ਇਕ ਡਰ ਵਾਲੀ ਗੱਲ ਹੈ। ਇਸ ਲਈ ਹੁਣ ਤੋਂ ਹੀ ਸਾਡੀਆਂ ਸਰਕਾਰਾਂ ਅਤੇ ਲੋਕਾਂ ਨੂੰ ਚਾਹੀਦਾ ਹੈ ਕਿ ਉਹ ਹੜ੍ਹਾਂ ਤੋਂ ਬਚਣ ਲਈ ਆਪਣੇ ਪ੍ਰਬੰਧ ਕਰਨ। ਦਰਿਆਵਾਂ, ਨਾਲਿਆਂ ਅਤੇ ਖਾਲਿਆਂ ਨੂੰ ਡੂੰਘਾ ਕਰਕੇ ਪਾਣੀ ਦਾ ਵਹਾਅ ਤੇਜ਼ ਰੱਖਣ ਲਈ ਕੰਮ ਕੀਤਾ ਜਾ ਸਕਦਾ ਹੈ। ਡਰੇਨਾਂ ਨੂੰ ਸਾਫ਼ ਕੀਤਾ ਜਾ ਸਕਦਾ ਹੈ। ਹਾਲੇ ਸਮਾਂ ਪਿਆ ਹੈ, ਤਿੰਨ-ਚਾਰ ਮਹੀਨੇ ਪਏ ਹਨ। ਇਸ ਆਉਣ ਵਾਲੇ ਸੰਭਾਵਿਤ ਖ਼ਤਰੇ ਤੋਂ ਬਚਣ ਲਈ ਜੇ ਲੋਕ ਹੁਣ ਤੋਂ ਹੀ ਜ਼ੋਰ ਪਾ ਕੇ ਇਹ ਸਫ਼ਾਈ ਦਾ ਕੰਮ ਕਰਵਾ ਲੈਂਦੇ ਹਨ ਤਾਂ ਹੋ ਸਕਦਾ ਹੈ ਕਿ ਆਉਣ ਵਾਲੇ ਸਮੇਂ ਵਿਚ ਜੇ ਹੜ੍ਹ ਆ ਵੀ ਗਏ ਤਾਂ ਘੱਟੋ-ਘੱਟ ਕੁਝ ਜਾਨ-ਮਾਲ ਦੀ ਰੱਖਿਆ ਕੀਤੀ ਜਾ ਸਕੇ। ਪਰ ਜਿਵੇਂ ਸਾਡੇ ਦੇਸ਼ ਵਿਚ ਸਦੀਆਂ ਤੋਂ ਹੁੰਦਾ ਆ ਰਿਹਾ ਹੈ ਕਿ ਅਸੀਂ ਪਹਿਲਾਂ ਕੁਝ ਨਹੀਂ ਕਰਦੇ, ਬਾਅਦ ਵਿਚ ਅਫ਼ਸੋਸ ਕਰਦੇ ਹਾਂ, ਗ੍ਰਾਂਟਾਂ ਦਿੰਦੇ ਹਾਂ। ਸੋ ਇਸ ਸਮੱਸਿਆ ਦੇ ਹੱਲ ਲਈ ਹੁਣ ਤੋਂ ਹੀ ਸਭ ਨੂੰ ਰਲ-ਮਿਲ ਕੇ ਕੰਮ ਕਰਨ ਦੀ ਲੋੜ ਹੈ।
-ਮੋਬਾਈਲ : 98159-45018
