ਪੰਜ ਸਾਲਾਂ ਬਾਅਦ ਵਾਪਸੀ ਕਰਦੇ ਹੀ ਮੈਕਗ੍ਰੇਗਰ ਨੂੰ ਵੱਡਾ ਝਟਕਾ, ਹੋਲੋਵੇ ਨੇ ਟੀਕੇਓ ਨਾਲ ਜਿੱਤ ਕੇ ਬਿਖੇਰੀ ਚਮਕ

ਨਿਊਯਾਰਕ, 12 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਯੂ.ਐੱਫ.ਸੀ. 329 ਵਿੱਚ ਪੰਜ ਸਾਲਾਂ ਬਾਅਦ ਐਮਐਮਏ ਦੇ ਅੱਠਭੁਜੀ ਰਿੰਗ ਵਿੱਚ ਵਾਪਸੀ ਕਰਨ ਵਾਲੇ ਸਾਬਕਾ ਡਬਲ ਚੈਂਪੀਅਨ ਕੋਨੋਰ ਮੈਕਗ੍ਰੇਗਰ ਦਾ ਸੁਪਨਾ ਸ਼ੁਰੂ ਹੁੰਦੇ ਹੀ ਟੁੱਟ ਗਿਆ। ਲਾਸ ਵੇਗਾਸ ਵਿੱਚ ਹੋਏ ਇਸ ਬਹੁਚਰਚਿਤ ਮੁਕਾਬਲੇ ਦੌਰਾਨ ਮੈਕਗ੍ਰੇਗਰ ਪਹਿਲੇ ਹੀ ਮਿੰਟ ਵਿੱਚ ਸੱਜੀ ਲੱਤ ਦੀ ਸੱਟ ਦਾ ਸ਼ਿਕਾਰ ਹੋ ਗਏ, ਜਿਸ ਕਾਰਨ ਰੈਫਰੀ ਨੇ ਮੁਕਾਬਲਾ ਰੋਕ ਦਿੱਤਾ ਅਤੇ ਮੈਕਸ ਹੋਲੋਵੇ ਨੂੰ ਟੈਕਨੀਕਲ ਨਾਕਆਊਟ (ਟੀਕੇਓ) ਰਾਹੀਂ ਜੇਤੂ ਐਲਾਨ ਦਿੱਤਾ। ਲੜਾਈ ਦੀ ਸ਼ੁਰੂਆਤ ਵਿੱਚ ਮੈਕਗ੍ਰੇਗਰ ਨੇ ਹਮਲਾਵਰ ਅੰਦਾਜ਼ ਵਿੱਚ ਕਿਕ ਮਾਰੀ, ਪਰ ਉਸੇ ਦੌਰਾਨ ਉਨ੍ਹਾਂ ਦੀ ਲੱਤ ਜਵਾਬ ਦੇ ਗਈ ਅਤੇ ਉਹ ਦਰਦ ਨਾਲ ਮੈਟ ‘ਤੇ ਡਿੱਗ ਪਏ। ਉਨ੍ਹਾਂ ਨੇ ਮੁਕਾਬਲਾ ਜਾਰੀ ਰੱਖਣ ਦੀ ਕੋਸ਼ਿਸ਼ ਕੀਤੀ, ਪਰ ਸੱਟ ਗੰਭੀਰ ਹੋਣ ਕਾਰਨ ਰੈਫਰੀ ਨੇ ਇੱਕ ਮਿੰਟ ਤੋਂ ਕੁਝ ਵੱਧ ਸਮੇਂ ਬਾਅਦ ਲੜਾਈ ਖ਼ਤਮ ਕਰ ਦਿੱਤੀ। ਇਸ ਜਿੱਤ ਨਾਲ ਹੋਲੋਵੇ ਨੇ ਆਪਣੇ ਕਰੀਅਰ ਵਿੱਚ ਇੱਕ ਹੋਰ ਵੱਡੀ ਕਾਮਯਾਬੀ ਦਰਜ ਕਰ ਲਈ। ਸਹਿ-ਮੁੱਖ ਮੁਕਾਬਲੇ ਵਿੱਚ ਇੰਗਲੈਂਡ ਦੇ ਪੈਡੀ ਪਿੰਬਲੈੱਟ ਨੇ ਸਿਰਫ਼ 52 ਸਕਿੰਟਾਂ ਵਿੱਚ ਫਰਾਂਸ ਦੇ ਬੇਨੋਆ ਸੇਂਟ ਡੇਨਿਸ ਨੂੰ ਡੀ’ਆਰਸ ਚੋਕ ਲਗਾ ਕੇ ਸਬਮਿਸ਼ਨ ਰਾਹੀਂ ਹਰਾਇਆ। ਪਿੰਬਲੈੱਟ ਦੀ ਇਹ ਜਿੱਤ ਰਾਤ ਦੇ ਸਭ ਤੋਂ ਤੇਜ਼ ਅਤੇ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨਾਂ ਵਿੱਚੋਂ ਇੱਕ ਰਹੀ। ਇਸੇ ਦੌਰਾਨ ਈਐੱਸਪੀਐੱਨ ਵੱਲੋਂ ਜਾਰੀ 2026 ਦੇ ਐਮਐਮਏ ਵਰਲਡ ਪਾਵਰ ਇੰਡੈਕਸ ਵਿੱਚ ਰੂਸ ਪਹਿਲੀ ਵਾਰ ਦੁਨੀਆ ਦਾ ਨੰਬਰ ਇੱਕ ਦੇਸ਼ ਬਣਿਆ ਹੈ। ਇਸਲਾਮ ਮਖਾਚੇਵ ਅਤੇ ਪਿਓਤਰ ਯਾਨ ਵਰਗੇ ਸਿਤਾਰਿਆਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨੇ ਰੂਸ ਨੂੰ ਸਿਖਰ ‘ਤੇ ਪਹੁੰਚਾਇਆ ਹੈ। ਅਮਰੀਕਾ ਦੂਜੇ ਅਤੇ ਬ੍ਰਾਜ਼ੀਲ ਤੀਜੇ ਸਥਾਨ ‘ਤੇ ਰਹੇ, ਜਦਕਿ ਇੰਗਲੈਂਡ, ਆਸਟ੍ਰੇਲੀਆ, ਜਾਰਜੀਆ, ਫਰਾਂਸ, ਮੈਕਸੀਕੋ, ਨਿਊਜ਼ੀਲੈਂਡ ਅਤੇ ਚੀਨ ਨੇ ਵੀ ਚੋਟੀ ਦੇ ਦਸ ਦੇਸ਼ਾਂ ਵਿੱਚ ਜਗ੍ਹਾ ਬਣਾਈ ਹੈ। ਮੈਕਗ੍ਰੇਗਰ ਦੀ ਬਦਕਿਸਮਤੀ ਭਰੀ ਵਾਪਸੀ ਯੂਐੱਫਸੀ 329 ਦੀ ਸਭ ਤੋਂ ਵੱਡੀ ਚਰਚਾ ਬਣੀ ਰਹੀ। ਹੁਣ ਪ੍ਰਸ਼ੰਸਕਾਂ ਦੀਆਂ ਨਜ਼ਰਾਂ ਇਸ ਗੱਲ ‘ਤੇ ਟਿਕੀਆਂ ਹਨ ਕਿ ਕੀ ਉਹ ਇੱਕ ਵਾਰ ਫਿਰ ਸੱਟ ਤੋਂ ਉਭਰ ਕੇ ਰਿੰਗ ਵਿੱਚ ਵਾਪਸੀ ਕਰ ਸਕਣਗੇ ਜਾਂ ਨਹੀਂ।