ਸਾਊਥ ਲੈਨਾਰਕਸ਼ਾਇਰ ਕੌਂਸਲ ਦੇ ਲਾਰਖਾਲ ਵਾਰਡ ਦੀ ਉੱਪ-ਚੋਣ ’ਚ ਰਿਫਾਰਮ ਯੂ.ਕੇ. ਦੀ ਜਿੱਤ

ਗਲਾਸਗੋ, 12 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਸਕਾਟਲੈਂਡ ਦੇ ਸਾਊਥ ਲੈਨਾਰਕਸ਼ਾਇਰ ਕੌਂਸਲ ਦੇ ਲਾਰਖਾਲ ਵਾਰਡ ’ਚ ਹੋਈ ਉੱਪ-ਚੋਣ ਵਿੱਚ ਰਿਫਾਰਮ ਯੂਕੇ ਨੇ ਮਹੱਤਵਪੂਰਨ ਜਿੱਤ ਹਾਸਲ ਕੀਤੀ ਹੈ। ਪਾਰਟੀ ਦੀ ਉਮੀਦਵਾਰ ਫਿਓਨਾ ਮੈਕਡਰਮਟ ਨੇ 1,150 ਵੋਟਾਂ ਪ੍ਰਾਪਤ ਕਰਕੇ ਕੌਂਸਲਰ ਵਜੋਂ ਚੋਣ ਜਿੱਤ ਪ੍ਰਾਪਤ ਕੀਤੀ। ਇਸ ਚੋਣ ਵਿੱਚ ਸਕਾਟਿਸ਼ ਨੈਸ਼ਨਲ ਪਾਰਟੀ ਦੀ ਉਮੀਦਵਾਰ ਨੂੰ 975 ਅਤੇ ਲੇਬਰ ਪਾਰਟੀ ਦੇ ਉਮੀਦਵਾਰ ਨੂੰ 799 ਵੋਟਾਂ ਮਿਲੀਆਂ। ਇਹ ਸੀਟ ਪਹਿਲਾਂ ਲੇਬਰ ਪਾਰਟੀ ਦੇ ਕਬਜ਼ੇ ਵਿੱਚ ਸੀ, ਪਰ ਹੁਣ ਰਿਫਾਰਮ ਯੂਕੇ ਨੇ ਇਸ ’ਤੇ ਆਪਣਾ ਕਬਜ਼ਾ ਕਰ ਲਿਆ ਹੈ। ਇਹ ਜਿੱਤ ਸਕਾਟਲੈਂਡ ਵਿੱਚ ਰਿਫਾਰਮ ਯੂਕੇ ਲਈ ਇੱਕ ਹੋਰ ਅਹਿਮ ਸਿਆਸੀ ਸਫਲਤਾ ਮੰਨੀ ਜਾ ਰਹੀ ਹੈ। ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਪਾਰਟੀ ਨੇ ਹਾਲੀਆ ਚੋਣਾਂ ਵਿੱਚ ਆਪਣਾ ਜਨਾਧਾਰ ਵਧਾਇਆ ਹੈ ਅਤੇ ਹੁਣ ਉਹ ਰਵਾਇਤੀ ਪਾਰਟੀਆਂ ਲਈ ਇੱਕ ਗੰਭੀਰ ਚੁਣੌਤੀ ਬਣਦੀ ਜਾ ਰਹੀ ਹੈ। ਰਿਫਾਰਮ ਯੂਕੇ ਲੰਬੇ ਸਮੇਂ ਤੋਂ ਗੈਰ-ਕਾਨੂੰਨੀ ਇਮੀਗ੍ਰੇਸ਼ਨ ਘਟਾਉਣ, ਸਰਹੱਦਾਂ ’ਤੇ ਸਖ਼ਤ ਨਿਯੰਤਰਣ ਅਤੇ ਸ਼ਰਨਾਰਥੀ ਪ੍ਰਣਾਲੀ ਵਿੱਚ ਬਦਲਾਅ ਦੀ ਵਕਾਲਤ ਕਰਦੀ ਆ ਰਹੀ ਹੈ। ਇਹ ਮੁੱਦਾ ਪਾਰਟੀ ਦੇ ਸਮਰਥਕਾਂ ਲਈ ਅਹਿਮ ਰਿਹਾ ਹੈ।