ਲੰਡਨ, 11 ਅਪ੍ਰੈਲ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਲੰਡਨ ਦੀ ਹੰਸਲੋ ਕੌਂਸਲ 'ਚ ਬੀਤੇ ਕੁਝ ਸਮੇਂ ਤੋਂ ਕੁਝ ਵੀ ਸਹੀ ਨਹੀਂ ਚੱਲ ਰਿਹਾ | 7 ਮਈ ਨੂੰ ਹੋਣ ਵਾਲੀਆਂ ਚੋਣਾਂ ਤੋਂ ਪਹਿਲਾਂ ਬੀਤੇ 20 ਸਾਲਾਂ ਤੋਂ ਲੇਬਰ ਪਾਰਟੀ ਦੀ ਮੈਂਬਰ ਤੇ 12 ਸਾਲ ਤੋਂ ਕੌਂਸਲਰ ਬੰਦਨਾਂ ਚੋਪੜਾ ਨੇ ਲੇਬਰ ਪਾਰਟੀ ਨੂੰ ਅਲਵਿਦਾ ਕਹਿ ਕੇ ਰਿਫੌਰਮ ਯੂ.ਕੇ. ਪਾਰਟੀ 'ਚ ਸ਼ਾਮਿਲ ਹੋ ਗਈ ਹੈ | ਜਿਸ ਨਾਲ ਰਿਫੌਰਮ ਯੂ.ਕੇ. ਪਾਰਟੀ ਦੀ ਬੰਦਨਾਂ ਹੰਸਲੋ ਕੌਂਸਲ ਦੀ ਪਹਿਲੀ ਕੌਂਸਲਰ ਬਣ ਗਈ ਹੈ | ਇਸ ਦਲ ਬਦਲੀ ਨੂੰ ਲੈ ਕੇ ਲੇਬਰ ਪਾਰਟੀ ਨੇ ਆਲੋਚਨਾ ਕਰਦਿਆਂ ਇਸ ਨੂੰ ਹਾਸੋਹੀਣਾ ਕਦਮ ਕਿਹਾ ਹੈ | ਹੰਸਲੋ ਰਿਫਾਰਮ ਯੂ.ਕੇ. ਦੇ ਚੇਅਰਪਰਸਨ ਪ੍ਰਭਦੀਪ ਸਿੰਘ ਨੇ ਕਿਹਾ ਕਿ ਲੇਬਰ ਪਾਰਟੀ ਨੇ ਦੇਸ਼ ਤੇ ਸਥਾਨਕ ਕੌਂਸਲਾਂ ਵਿਚ ਬਦਲਾਅ ਲਿਆਉਣ ਦਾ ਵਾਅਦਾ ਕੀਤਾ ਸੀ, ਪਰ ਉਹ ਅਸਫ਼ਲ ਰਹੇ ਹਨ, ਉਨ੍ਹਾਂ ਨੇ ਸਥਾਨਕ ਨਿਵਾਸੀਆਂ ਲਈ ਜੋ ਸੇਵਾਵਾਂ ਪ੍ਰਦਾਨ ਕਰਨ ਦਾ ਵਾਅਦਾ ਕੀਤਾ ਸੀ, ਉਹ ਵੀ ਪੂਰਾ ਨਹੀਂ ਕੀਤਾ | ਮੈਨੂੰ ਲੱਗਦਾ ਹੈ ਕਿ ਰਿਫਾਰਮ ਇਕ ਅਜਿਹੀ ਪਾਰਟੀ ਹੈ ਜੋ ਚੁਣੌਤੀ ਦਾ ਸਾਹਮਣਾ ਕਰ ਸਕਦੀ ਹੈ | ਹੰਸਲੋ ਨੂੰ ਮੁੜ ਸੁਰਜੀਤ ਕਰਨ ਲਈ ਰਿਫਾਰਮ ਯੂ.ਕੇ. ਹੀ ਇੱਕੋ ਇਕ ਹੱਲ ਹੈ | ਕੌਂਸਲਰ ਚੋਪੜਾ ਨੇ ਜਿੰਦਗੀ ਦਾ ਜ਼ਿਆਦਾ ਸਮਾਂ ਹੰਸਲੋ ਵਿਚ ਹੀ ਬਿਤਾਇਆ ਹੈ |
