ਨਿਊਯਾਰਕ, 10 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਮਾਈਕ੍ਰੋਸੋਫਟ ਦੇ ਐਕਸ ਬਾਕਸ ਗੇਮਿੰਗ ਵਿਭਾਗ ’ਚ ਹਜ਼ਾਰਾਂ ਕਰਮਚਾਰੀਆਂ ਦੀਆਂ ਨੌਕਰੀਆਂ ਖਤਮ ਕਰਨ ਦੇ ਐਲਾਨ ਤੋਂ ਕੁਝ ਦਿਨਾਂ ਬਾਅਦ ਹੀ ਐਕਸ ਬਾਕਸ ਦੀ ਮੁੱਖ ਕਾਰਜਕਾਰੀ ਅਧਿਕਾਰੀ ਆਸ਼ਾ ਸ਼ਰਮਾ ਨੂੰ ਅਮਰੀਕੀ ਫੈਡਰਲ ਰਿਜ਼ਰਵ ਦੀ ‘ਉਤਪਾਦਕਤਾ ਅਤੇ ਨੌਕਰੀਆਂ’ ਟਾਸਕ ਫੋਰਸ ਦੀ ਸਾਂਝੀ ਅਗਵਾਈ ਸੌਂਪੇ ਜਾਣ ਨਾਲ ਤਕਨਾਲੋਜੀ ਅਤੇ ਕਾਰੋਬਾਰੀ ਜਗਤ ਵਿੱਚ ਵੱਡੀ ਚਰਚਾ ਸ਼ੁਰੂ ਹੋ ਗਈ ਹੈ। ਰਿਪੋਰਟਾਂ ਅਨੁਸਾਰ, ਆਸ਼ਾ ਸ਼ਰਮਾ ਨੇ 6 ਜੁਲਾਈ 2026 ਨੂੰ ਐਕਸ ਬਾਕਸ ਦੇ ਵੱਡੇ ਪੁਨਰਗਠਨ ਤਹਿਤ ਲਗਭਗ 3,200 ਨੌਕਰੀਆਂ ਖਤਮ ਕਰਨ ਦਾ ਐਲਾਨ ਕੀਤਾ ਸੀ। ਇਨ੍ਹਾਂ ਵਿੱਚੋਂ ਕਰੀਬ 1,600 ਕਰਮਚਾਰੀਆਂ ਨੂੰ ਤੁਰੰਤ ਪ੍ਰਭਾਵਿਤ ਕੀਤਾ ਗਿਆ, ਜਦਕਿ ਬਾਕੀ ਨੌਕਰੀਆਂ ਮੌਜੂਦਾ ਵਿੱਤੀ ਸਾਲ ਦੌਰਾਨ ਘਟਾਈਆਂ ਜਾਣੀਆਂ ਹਨ। ਇਸ ਤੋਂ ਸਿਰਫ਼ ਤਿੰਨ ਦਿਨ ਬਾਅਦ, 9 ਜੁਲਾਈ ਨੂੰ ਫੈਡਰਲ ਰਿਜ਼ਰਵ ਨੇ ਉਨ੍ਹਾਂ ਨੂੰ ਏ.ਆਈ., ਉਤਪਾਦਕਤਾ ਅਤੇ ਰੁਜ਼ਗਾਰ ਦੇ ਭਵਿੱਖ ਦਾ ਅਧਿਐਨ ਕਰਨ ਵਾਲੀ ਟਾਸਕ ਫੋਰਸ ਵਿੱਚ ਸਾਂਝੀ ਮੁਖੀ ਨਿਯੁਕਤ ਕਰ ਦਿੱਤਾ। ਫੈਡਰਲ ਰਿਜ਼ਰਵ ਵੱਲੋਂ ਕੁੱਲ ਪੰਜ ਬਾਹਰੀ ਸਲਾਹਕਾਰ ਸਮੂਹ ਬਣਾਏ ਗਏ ਹਨ, ਜੋ ਉਤਪਾਦਕਤਾ ਅਤੇ ਨੌਕਰੀਆਂ, ਮਹਿੰਗਾਈ ਨੀਤੀ, ਸੰਚਾਰ, ਬੈਲੈਂਸ ਸ਼ੀਟ ਅਤੇ ਆਰਥਿਕ ਡਾਟੇ ਨਾਲ ਜੁੜੇ ਮੁੱਦਿਆਂ ਦੀ ਸਮੀਖਿਆ ਕਰਨਗੇ।
