ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ਦੇ ਸੰਦਰਭ ’ਚ ਸ਼ੁਰੂ ਕੀਤੇ ਮੇਲੇ ਦੀ ਸਮਾਪਤੀ

ਗ

ਗਲਾਸਗੋ ਬਹੁ ਸੱਭਿਆਚਾਰਕ ਮੇਲੇ ਦੀਆਂ ਝਲਕੀਆਂ। 11-08-2026

ਗਲਾਸਗੋ, 10 ਅਗਸਤ (ਹਰਜੀਤ ਸਿੰਘ ਦੁਸਾਂਝ)-ਰਾਸ਼ਟਰਮੰਡਲ ਖੇਡਾਂ ਨਾਲ ਜੁੜੇ ਗਲਾਸਗੋ ਮੇਲੇ 2026 ਦੀ 9 ਅਗਸਤ ਨੂੰ ਸਮਾਪਤੀ ਹੋ ਗਈ। 23 ਮਈ ਤੋਂ ਸ਼ੁਰੂ ਹੋਏ ਕਰੀਬ 10 ਹਫ਼ਤਿਆਂ ਦੇ ਇਸ ਬਹੁ-ਸੱਭਿਆਚਾਰਕ ਮੇਲੇ ਦੌਰਾਨ ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ’ਚ 500 ਤੋਂ ਵੱਧ ਸਮਾਗਮ ਤੇ ਗਤੀਵਿਧੀਆਂ ਕਰਵਾਈਆਂ ਗਈਆਂ। ਮੇਲੇ ’ਚ ਸੰਗੀਤ, ਨਾਚ, ਥੀਏਟਰ, ਕਲਾ, ਖੇਡਾਂ ਤੇ ਪਰਿਵਾਰਕ ਤੇ ਭਾਈਚਾਰਕ ਪ੍ਰੋਗਰਾਮਾਂ ਰਾਹੀਂ ਗਲਾਸਗੋ ਦੇ ਵੱਖ-ਵੱਖ ਭਾਈਚਾਰਿਆਂ ਨੂੰ ਰਾਸ਼ਟਰਮੰਡਲ ਖੇਡਾਂ ਦੇ ਜਸ਼ਨ ਨਾਲ ਜੋੜਿਆ ਗਿਆ। ਇਸ ’ਚ ਸਥਾਨਕ ਕਲਾਕਾਰਾਂ, ਸੰਗੀਤਕਾਰਾਂ, ਖੇਡ ਕਲੱਬਾਂ ਤੇ ਸੱਭਿਆਚਾਰਕ ਸੰਸਥਾਵਾਂ ਨੇ ਵੱਡੀ ਭੂਮਿਕਾ ਨਿਭਾਈ। ਗਲਾਸਗੋ ਸਿਟੀ ਸੈਂਟਰ ਇਸ ਸੱਭਿਆਚਾਰਕ ਜਸ਼ਨ ਦਾ ਪ੍ਰਮੁੱਖ ਹਿੱਸਾ ਰਿਹਾ, ਜਿੱਥੇ ਲਾਈਵ ਸੰਗੀਤ, ਸਟਰੀਟ ਪ੍ਰਦਰਸ਼ਨ ਤੇ ਪਰਿਵਾਰਕ ਗਤੀਵਿਧੀਆਂ ਕਰਵਾਈਆਂ ਗਈਆਂ। ਇਸ ਤੋਂ ਇਲਾਵਾ ਟਰਨਰ ਇਨਾਮ ਜੇਤੂ ਬ੍ਰਿਟਿਸ਼ ਪੰਜਾਬੀ ਕਲਾਕਾਰ ਜਸਲੀਨ ਕੌਰ ਸਮੇਤ ਕਈ ਕਲਾਕਾਰਾਂ ਦੇ ਕੰਮ ਵੀ ਮੇਲੇ ਦਾ ਹਿੱਸਾ ਬਣੇ। ਗਲਾਸਗੋ 2026 ਰਾਸ਼ਟਰਮੰਡਲ ਖੇਡਾਂ 2 ਅਗਸਤ ਨੂੰ ਖ਼ਤਮ ਹੋ ਗਈਆਂ ਸਨ, ਪਰ ਫੈਸਟੀਵਲ 9 ਅਗਸਤ ਤੱਕ ਜਾਰੀ ਰਿਹਾ, ਜਿਸ ਨਾਲ ਖੇਡਾਂ ਤੋਂ ਬਾਅਦ ਵੀ ਸ਼ਹਿਰ ਵਿਚ ਕਲਾ, ਸੱਭਿਆਚਾਰ ਤੇ ਭਾਈਚਾਰਕ ਜਸ਼ਨ ਦੀ ਰੌਣਕ ਬਣੀ ਰਹੀ।