ਡੱਬਵਾਲੀ, 26 ਫਰਵਰੀ (ਇਕਬਾਲ ਸਿੰਘ ਸ਼ਾਂਤ)-ਗੋਲ ਬਾਜ਼ਾਰ ਚੌਕੀ ਦੇ ਸਟਾਫ਼ ਨੇ ਇਮਾਨਦਾਰੀ ਦੀ ਮਿਸਾਲ ਕਾਇਮ ਕੀਤੀ | ਉਨ੍ਹਾਂ ਨੇ ਸੜਕ 'ਤੇ ਪਏ ਮਿਲੇ ਸੋਨੇ ਤੇ ਚਾਂਦੀ ਦੇ ਗਹਿਣੇ ਅਤੇ ਲੱਖਾਂ ਰੁਪਏ ਦੀ ਨਕਦੀ ਉਨ੍ਹਾਂ ਦੇ ਅਸਲੀ ਮਾਲਕ ਨੂੰ ਵਾਪਸ ਕਰ ਦਿੱਤੀ | ਗੋਲ ਬਾਜ਼ਾਰ ਚੌਕੀ ਦੇ ਮੁਖੀ ਕਿ੍ਸ਼ਨ ਕੁਮਾਰ ਨੇ ਦੱਸਿਆ ਕਿ 25 ਫਰਵਰੀ ਦੀ ਰਾਤ ਨੂੰ ਏ. ਐਸ. ਆਈ. ਜਗਜੀਤ ਸਿੰਘ ਤੇ ਐਸ. ਪੀ. ਓ. ਰਣਵੀਰ ਸਿੰਘ ਸ਼ਹਿਰ ਵਿਚ ਪਰਸ਼ੂਰਾਮ ਚੌਕ 'ਤੇ ਗਸ਼ਤ ਕਰ ਰਹੇ ਸਨ | ਉਨ੍ਹਾਂ ਨੂੰ ਸੜਕ ਕਿਨਾਰੇ ਇਕ ਸ਼ੱਕੀ ਪੋਲੀਥੀਨ ਬੈਗ ਮਿਲਿਆ | ਜਾਂਚ ਕਰਨ 'ਤੇ ਉਨ੍ਹਾਂ ਨੂੰ ਸੋਨੇ ਤੇ ਚਾਂਦੀ ਦੇ ਗਹਿਣੇ, ਨਕਦੀ ਤੇ ਇਕ ਆਧਾਰ ਕਾਰਡ ਮਿਲਿਆ | ਆਧਾਰ ਕਾਰਡ ਜ਼ਰੀਏ ਮਾਲਕ ਦੀ ਪਛਾਣ ਸੁਖਦੇਵ ਸਿੰਘ ਵਾਸੀ ਪਥਰਾਲਾ (ਬਠਿੰਡਾ) ਵਜੋਂ ਹੋਈ | ਜ਼ਰੂਰੀ ਤਸਦੀਕ ਤੋਂ ਬਾਅਦ, ਗਹਿਣੇ ਤੇ ਨਕਦੀ ਉਸ ਨੂੰ ਸੁਰੱਖਿਅਤ ਵਾਪਸ ਕਰ ਦਿੱਤੀ ਗਈ | ਗਹਿਣੇ ਵਾਪਸ ਮਿਲਣ 'ਤੇ ਮਾਲਕ ਨੇ ਡੱਬਵਾਲੀ ਪੁਲਿਸ ਦੀ ਇਮਾਨਦਾਰੀ ਦੀ ਸ਼ਲਾਘਾ ਕੀਤੀ |