ਯਮੁਨਾਨਗਰ, 11 ਅਪ੍ਰੈਲ (ਗੁਰਦਿਆਲ ਸਿੰਘ ਨਿਮਰ)-'ਵਿਸ਼ਵ ਸਿਹਤ ਦਿਵਸ' ਮੌਕੇ ਯੂਥ ਰੈੱਡ ਕਰਾਸ ਅਤੇ ਕਾਨੂੰਨੀ ਸਾਖਰਤਾ ਸੈੱਲ ਵਲੋਂ ਸਥਾਨਕ ਐਮ. ਐਲ. ਐਨ. ਕਾਲਜ ਵਿਖੇ ਵਿਦਿਆਰਥਣਾਂ 'ਚ ਸਿਹਤ ਪ੍ਰਤੀ ਜਾਗਰੂਕਤਾ ਵਧਾਉਣ ਦੇ ਉਦੇਸ਼ ਨਾਲ ਭਾਸ਼ਣ ਕਰਵਾਇਆ ਗਿਆ | ਇਸ ਪ੍ਰੋਗਰਾਮ 'ਚ ਕਈ ਉੱਘੇ ਡਾਕਟਰਾਂ ਨੇ ਹਿੱਸਾ ਲੈਂਦਿਆਂ ਸਿਹਤ ਨਾਲ ਸੰਬੰਧਿਤ ਵੱਖ-ਵੱਖ ਵਿਸ਼ਿਆਂ 'ਤੇ ਕੀਮਤੀ ਜਾਣਕਾਰੀ ਸਾਂਝੀ ਕੀਤੀ | ਇਨ੍ਹਾਂ ਮਾਹਿਰਾਂ 'ਚ ਡਾ. ਸੁਮਿਤਾ ਸੋਨੀ ਪ੍ਰਧਾਨ ਆਈ. ਐਮ. ਏ. ਹਰਿਆਣਾ ਰਾਜ, ਡਾ. ਬੁਲਬੁਲ ਕਟਾਰੀਆ ਡਿਪਟੀ ਸਿਵਲ ਸਰਜਨ, ਡਾ. ਰਿਤੂ ਮਾਗੋ, ਡਾ. ਭਾਵਨਾ ਸ਼ਰਮਾ, ਡਾ. ਰੇਣੂ ਅਤੇ ਡਾ. ਪ੍ਰੇਰਨਾ ਆਦਿ ਸ਼ਾਮਿਲ ਸਨ, ਜਿਨ੍ਹਾਂ ਨੇ ਸਮੁੱਚੀ ਸਿਹਤ ਲਈ ਭਾਈਚਾਰਕ ਜਾਗਰੂਕਤਾ ਦੀ ਮਹੱਤਤਾ 'ਤੇ ਚਾਨਣਾ ਪਾਇਆ | ਇਸ ਮੌਕੇ ਡਾ. ਬੁਲਬੁਲ ਕਟਾਰੀਆ ਨੇ ਵਿਦਿਆਰਥਣਾਂ ਨੂੰ ਮੂੰਹ ਦੀ ਸਿਹਤ ਅਤੇ ਸਫਾਈ ਦੀ ਮਹੱਤਤਾ ਬਾਰੇ ਜਾਗਰੂਕ ਕੀਤਾ, ਜਦਕਿ ਡਾ. ਨਿਸ਼ਾ ਨੇ ਸਰਵਾਈਕਲ ਕੈਂਸਰ, ਇਸ ਦੀ ਰੋਕਥਾਮ ਅਤੇ ਜਾਂਚ ਦੀ ਮਹੱਤਤਾ ਸੰਬੰਧੀ ਕੀਮਤੀ ਜਾਣਕਾਰੀ ਪ੍ਰਦਾਨ ਕੀਤੀ | ਇਸ ਤੋਂ ਇਲਾਵਾ ਡਾ. ਰਿਤੂ ਮੈਗੋ ਨੇ ਮਾਂਹਵਾਰੀ ਸਫਾਈ 'ਤੇ ਲੈਕਚਰ ਦਿੱਤਾ, ਜਿਸ ਦਾ ਕਰੀਬ 200 ਵਿਦਿਆਰਥਣਾਂ ਨੇ ਲਾਭ ਉਠਾਇਆ | ਅੰਤ 'ਚ ਕਾਲਜ ਦੇ ਕਾਰਜਕਾਰੀ ਪਿ੍ੰ. ਡਾ. ਮਨੋਹਰ ਗੋਇਲ ਨੇ ਡਾ. ਸਵਿਤਾ ਗਰਗ ਅਤੇ ਡਾ. ਪੂਜਾ ਜੈਨ ਨੂੰ ਇਸ ਪ੍ਰੋਗਰਾਮ ਦੇ ਸਫਲ ਪ੍ਰਬੰਧਾਂ ਲਈ ਵਧਾਈ ਦਿੱਤੀ |
