ਨਵੀਂ ਦਿੱਲੀ, 15 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਹਰ ਸਾਲ ਬਾਰਿਸ਼ ਦੇ ਮੌਸਮ ਵਿਚ ਜਮਨਾ ਨਦੀ ਵਿਚ ਜ਼ਿਆਦਾ ਪਾਣੀ ਆ ਜਾਣ 'ਤੇ ਹੜ੍ਹ ਜਿਹੀ ਸਥਿਤੀ ਹਰ ਸਾਲ ਆਉਣ 'ਤੇ ਵਿਸ਼ੇਸ਼ ਕਰਕੇ ਆਸ-ਪਾਸ ਦੇ ਇਲਾਕਿਆਂ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ | ਲੋਕਾਂ ਦੀ ਇਸੇ ਸਮੱਸਿਆ ਨੂੰ ਲੈ ਕੇ ਜਮਨਾ ਨਦੀ ਦੀ ਗਹਿਰਾਈ ਜ਼ਿਆਦਾ ਕਰਨ ਦੀ ਤਿਆਰੀ ਕੀਤੀ ਜਾ ਰਹੀ ਹੈ | ਇਸ ਲਈ ਸਰਵੇ ਕੀਤਾ ਜਾ ਰਿਹਾ ਹੈ | ਸਿੰਚਾਈ ਅਤੇ ਹੜ੍ਹ ਵਿਭਾਗ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪਹਿਲਾਂ ਜਮਨਾ ਨਦੀ ਦੀ ਗਹਿਰਾਈ 60 ਤੋਂ 68 ਫੁੱਟ ਤੱਕ ਹੁੰਦੀ ਸੀ ਪ੍ਰੰਤੂ ਹੁਣ ਇਹ ਗਹਿਰਾਈ ਕਾਫੀ ਘੱਟ ਗਈ ਹੈ | ਆਈ.ਟੀ.ਓ. ਬੈਰਾਜ਼ ਤੋਂ ਔਖਲਾ ਬੈਰਾਜ਼ ਵਿਚ ਤਕਰੀਬਨ 14 ਕਿਲੋਮੀਟਰ ਦਾ ਹਿੱਸਾ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਹੈ | ਇੱਥੇ ਕਿਤੇ-ਕਿਤੇ ਗਹਿਰਾਈ 23 ਫੁੱਟ ਤੋਂ ਵੀ ਘੱਟ ਹੈ | ਇਸ ਨਦੀ ਦੀ 7 ਤੋਂ 10 ਫੁੱਟ ਤੱਕ ਗਹਿਰਾਈ ਵਧਾਉਣ ਦੀ ਯੋਜਨਾ ਬਣਾਈ ਗਈ ਹੈ | ਜਦੋਂ ਇਸ ਨਦੀ ਦਾ ਸਰਵੇ ਪੂਰਾ ਹੋ ਜਾਂਦਾ ਹੈ ਤਾਂ ਫਿਰ ਸਰਕਾਰ ਐਨ.ਜੀ.ਟੀ. ਤੋਂ ਡਰੇਜਿੰਗ ਦੀ ਇਜਾਜ਼ਤ ਲਵੇਗੀ | ਇਹ ਵੀ ਦੱਸਿਆ ਜਾ ਰਿਹਾ ਹੈ ਕਿ ਗਹਿਰਾਈ ਘੱਟ ਹੋ ਜਾਣ 'ਤੇ ਜਦੋਂ ਬਾਰਿਸ਼ ਦੇ ਮੌਸਮ ਵਿਚ ਹਥਨੀ ਕੁੰਡ ਤੋਂ ਪਾਣੀ ਛੱਡਿਆ ਜਾਂਦਾ ਹੈ ਤਾਂ ਪਾਣੀ ਦਾ ਪੱਧਰ ਕਾਫੀ ਵਧ ਜਾਂਦਾ ਹੈ ਜਿਸ ਕਰਕੇ ਹੜ੍ਹ ਦਾ ਖਤਰਾ ਵਧ ਜਾਂਦਾ ਹੈ ਅਤੇ ਲੋਕਾਂ ਨੂੰ ਨਦੀ ਦੇ ਆਸ-ਪਾਸ ਤੋਂ ਹਟਣਾ ਪੈਂਦਾ ਹੈ |
