ਅਵਾਰਾ ਗਊਆਂ ਕਾਰਨ ਹੋ ਰਹੇ ਨੇ ਹਾਦਸੇ

ਨਵੀਂ ਦਿੱਲੀ, 21 ਜੂਨ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਦੀ ਸ਼ਕੂਰ ਬਸਤੀ ਦੀ ਪੁਰਾਣੀ ਸਬਜ਼ੀ ਮੰਡੀ ਚੌਕ ਵਾਲੀ ਸੜਕ ’ਤੇ ਹਮੇਸ਼ਾ ਵਾਰਾ ਗਊਆਂ ਦਾ ਜਮਾਵੜਾ ਲੱਗਣ ਨਾਲ ਆਉਣ-ਜਾਣ ਵਾਲੇ ਲੋਕਾਂ ਨੂੰ ਬਹੁਤ ਪ੍ਰੇਸ਼ਾਨੀ ਹੋ ਰਹੀ ਹੈ ਅਤੇ ਕਈ ਵਾਰ ਹਾਦਸੇ ਹੋ ਚੁੱਕੇ ਹਨ। ਲੋਕ ਇਨ੍ਹਾਂ ਗਊਆਂ ਨੂੰ ਚੌਕ ਵਿਚ ਹੀ ਚਾਰਾ ਅਤੇ ਹੋਰ ਚੀਜ਼ਾ ਖਾਣ ਲਈ ਪਾ ਜਾਂਦੇ ਹਨ, ਜਿਸ ਕਰਕੇ ਇਸੇ ਸੜਕ ’ਤੇ ਅਕਸਰ ਵਾਰਾ ਗਊਆਂ ਖੜ੍ਹੀਆਂ ਰਹਿੰਦੀਆਂ ਹਨ। ਇਸ ਸੜਕ ’ਤੇ ਹਮੇਸ਼ਾ ਹੀ ਆਵਾਜਾਈ ਰਹਿੰਦੀ ਹੈ, ਕਿਉਂਕਿ ਇਹ ਰਸਤਾ ਮਹਾਂਵੀਰ ਹਸਪਤਾਲ ਅਤੇ ਹੋਰ ਕਾਲੋਨੀਆਂ ਵਿਚ ਜਾਂਦਾ ਹੈ, ਜਿਸ ਕਰਕੇ ਬੱਸਾਂ, ਆਟੋ, ਈ. ਰਿਕਸ਼ਾ, ਕਾਰਾਂ, ਬਾਇਕ ਇਥੋਂ ਲੰਘਦੇ ਹਨ। ਟ੍ਰੈਫਿਕ ਲਾਈਟਾਂ ਨਾ ਹੋਣ ਕਰਕੇ ਲੋਕ ਆਪੋ-ਧਾਪੀ ਕਰਦੇ ਹਨ ਅਤੇ ਇਸੇ ਕਰਕੇ ਕਈ ਵਾਰ ਟਰੈਫਿਕ ਵੀ ਜਾਮ ਹੋ ਜਾਂਦਾ ਹੈ। ਇਸ ਚੌਕ ’ਤੇ ਕੋਈ ਪੁਲਿਸ ਕਰਮਚਾਰੀ ਮੌਜੂਦ ਨਾ ਹੋਣ ਕਰਕੇ ਕਦੇ ਵੀ ਕੋਈ ਵੱਡਾ ਹਾਦਸਾ ਹੋ ਸਕਦਾ ਹੈ। ਰਾਤ ਦੇ ਸਮੇਂ ਇਸ ਚੌਕ ਦੀਆਂ ਸਾਰੇ ਪਾਸੇ ਦੀਆਂ ਸੜਕਾਂ ’ਤੇ ਗਊਆਂ ਬੈਠੀਆਂ ਰਹਿੰਦੀਆਂ ਹਨ।