ਦੋਦਾ, 25 ਫ਼ਰਵਰੀ (ਰਵੀਪਾਲ)-ਥਾਣਾ ਕੋਟਭਾਈ ਪੁਲਿਸ ਨੇ ਇਕ ਮੁੰਦਰੀ ਚੋਰੀ ਦੇ ਮਾਮਲੇ 'ਚ ਤਿੰਨ ਅਣਪਛਾਤੇ ਵਿਅਕਤੀਆਂ ਵਿਰੁੱਧ ਮਾਮਲਾ ਦਰਜ ਕੀਤਾ ਹੈ | ਪੁਲਿਸ ਕੋਲ ਦਰਜ ਆਪਣੀ ਸ਼ਿਕਾਇਤ ਵਿਚ ਰੀਨਾ ਦੇਵੀ ਪੁੱਤਰੀ ਸ਼ੰਕਰ ਦਾਸ ਵਾਸੀ ਪਰਾਗਪੁਰ ਖਾਰੀਆ ਜ਼ਿਲ੍ਹਾ ਕਾਂਗੜਾ ਨੇ ਦੱਸਿਆ ਕਿ ਉਹ ਫਤਹਿ ਗਲੋਬਲ ਸਕੂਲ ਪਿੰਡ ਮੱਲਣ ਵਿਖੇ ਬਤੌਰ ਪਿ੍ੰਸੀਪਲ ਨੌਕਰੀ ਕਰਦੀ ਹੈ | ਬੀਤੀ 23 ਫ਼ਰਵਰੀ ਨੂੰ ਉਹ ਆਪਣੇ ਦਫ਼ਤਰ ਦੇ ਤਾਲੇ ਲਗਾ ਕੇ ਆਪਣੀ ਰਿਹਾਇਸ਼ 'ਤੇ ਚਲੀ ਗਈ ਤਾਂ ਕਰੀਬ 1:30 ਵਜੇ ਉਸ ਨੂੰ ਆਪਣੇ ਦਫ਼ਤਰ 'ਚੋਂ ਅਚਾਨਕ ਆਵਾਜ਼ ਸੁਣਾਈ ਦਿੱਤੀ | ਜਦੋਂ ਉਸ ਨੇ ਜਾ ਕੇ ਦੇਖਿਆ ਤਾਂ ਤਿੰਨ ਅਣਪਛਾਤੇ ਵਿਅਕਤੀ ਜਿਨ੍ਹਾਂ ਦੇ ਮੂੰਹ ਬੰਨੇ੍ਹ ਹੋਏ ਸਨ, ਦਫ਼ਤਰ ਵਿਚ ਫਰੋਲਾ-ਫਰਾਲੀ ਕਰ ਰਹੇ ਸਨ | ਉਸ ਵਲੋਂ ਰੌਲਾ ਪਾਉਣ 'ਤੇ ਉਕਤਾਨ ਤਿੰਨੇ ਵਿਅਕਤੀ ਮੌਕੇ ਤੋਂ ਫ਼ਰਾਰ ਹੋ ਗਏ | ਜਦੋਂ ਉਸ ਨੇ ਸਵੇਰੇ ਦਫ਼ਤਰ ਜਾ ਕੇ ਪੜਤਾਲ ਕੀਤੀ ਤਾਂ ਦਫ਼ਤਰ ਵਿਚੋਂ ਉਸ ਦੀ ਚਾਂਦੀ (ਸਿਲਵਰ) ਦੀ ਇਕ ਮੁੰਦਰੀ ਚੋਰੀ ਹੋ ਗਈ ਸੀ | ਉਕਤ ਮਾਮਲੇ 'ਚ ਥਾਣਾ ਕੋਟਭਾਈ ਪੁਲਿਸ ਨੇ ਅਣਪਛਾਤੇ ਵਿਅਕਤੀਆਂ ਵਿਰੁੱਧ ਮੁਕੱਦਮਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ |
