ਡੱਬਵਾਲੀ, 26 ਫ਼ਰਵਰੀ (ਇਕਬਾਲ ਸਿੰਘ ਸ਼ਾਂਤ)-ਪਿੰਡ ਚੌਟਾਲਾ ਦੀ ਜਵਾਹਰ ਕਾਲੋਨੀ ਸਥਿਤ ਇਕ ਖੇਤ ਦੀ ਢਾਣੀ ਵਿਚ ਘਰੇਲੂ ਕਲੇਸ਼ ਨੇ ਇਕ ਗਰੀਬ ਪਰਿਵਾਰ ਨੂੰ ਉਜਾੜ ਦਿੱਤਾ | ਜਿਸ ਵਿਚ 35 ਸਾਲਾ ਵਿਅਕਤੀ ਸੁਭਾਸ਼ ਦੀ ਮੌਕੇ 'ਤੇ ਮੌਤ ਹੋ ਗਈ, ਜਦਕਿ ਉਸਦੀ ਪਤਨੀ ਸੁਨੀਤਾ ਗੰਭੀਰ ਹਾਲਤ ਵਿਚ ਹਨੂੰਮਾਨਗੜ੍ਹ ਦੇ ਹਸਪਤਾਲ ਵਿਚ ਜ਼ੇਰੇ-ਇਲਾਜ ਹੈ | ਪੁਲਿਸ ਨੇ ਮਿ੍ਤਕ ਦੀ ਲਾਸ਼ ਲੋੜੀਂਦੀ ਕਾਰਵਾਈ ਮਗਰੋਂ ਵਾਰਸਾਂ ਨੂੰ ਸੌਂਪ ਦਿੱਤੀ ਹੈ | ਜਾਣਕਾਰੀ ਮੁਤਾਬਿਕ ਮਿ੍ਤਕ ਸੁਭਾਸ਼, ਕਿਸਾਨ ਚੁੰਨੀ ਰਾਮ ਦੇ ਖੇਤ ਵਿਚ ਹਿੱਸੇ 'ਤੇ ਖੇਤੀ ਕਰਦਾ ਸੀ ਅਤੇ ਪਿਛਲੇ ਪੰਜ ਸਾਲਾਂ ਤੋਂ ਪਰਿਵਾਰ ਸਮੇਤ ਇਸ ਢਾਣੀ ਵਿਚ ਰਹਿ ਰਿਹਾ ਸੀ | ਪਰਿਵਾਰ ਵਿਚ ਚਾਰ ਪੁੱਤਰ ਅਤੇ ਇਕ ਧੀ ਹੈ, ਜਿਨ੍ਹਾਂ ਵਿਚ ਸਭ ਤੋਂ ਵੱਡਾ ਬੱਚਾ 12 ਸਾਲ ਦਾ ਹੈ | ਦੱਸਿਆ ਜਾਂਦਾ ਹੈ ਕਿ ਘਟਨਾ ਤੋਂ ਪਹਿਲਾਂ ਬੀਤੀ ਰਾਤ ਸੁਭਾਸ਼ ਵਲੋਂ ਬੱਚਿਆਂ ਅਤੇ ਪਤਨੀ ਨਾਲ ਮਾਰਕੁੱਟ ਕੀਤੀ ਗਈ | ਦੋ ਛੋਟੇ ਬੱਚਿਆਂ ਨੂੰ ਮੁਢਲੀ ਡਾਕਟਰੀ ਮਦਦ ਦਿੱਤੀ ਗਈ | ਹਾਲਤ ਵਿਗੜਣ 'ਤੇ 12 ਸਾਲਾ ਪੁੱਤਰ ਨੇ ਨੇੜਲੇ ਕਿਸਾਨ ਰੋਹਤਾਸ਼ ਦੇ ਘਰ ਜਾ ਕੇ ਸੂਚਨਾ ਦਿੱਤੀ | ਰੋਹਤਾਸ਼ ਨੇ ਖੇਤ ਮਾਲਕ ਅਤੇ ਡਾਇਲ 112 ਨੂੰ ਜਾਣਕਾਰੀ ਦਿੱਤੀ | ਖੇਤ ਮਾਲਕ ਦਾ ਪੁੱਤਰ ਮੌਕੇ 'ਤੇ ਪੁੱਜਿਆ ਤਾਂ ਸੁਭਾਸ਼ ਦੀ ਮੌਤ ਹੋ ਚੁੱਕੀ ਸੀ, ਜਦਕਿ ਸੁਨੀਤਾ ਦੀ ਨਬਜ਼ ਚੱਲ ਰਹੀ ਸੀ | ਉਸ ਨੂੰ ਤੁਰੰਤ ਸੰਗਰੀਆ ਹਸਪਤਾਲ ਲਿਜਾਇਆ ਗਿਆ, ਜਿੱਥੋਂ ਗੰਭੀਰ ਹਾਲਤ ਕਾਰਨ ਹਨੂੰਮਾਨਗੜ੍ਹ ਰੈਫਰ ਕਰ ਦਿੱਤਾ ਗਿਆ | ਸੂਚਨਾ ਮਿਲਣ 'ਤੇ ਥਾਣਾ ਸਦਰ ਦੇ ਮੁਖੀ ਸ਼ੈਲੇਂਦਰ ਕੁਮਾਰ, ਚੌਟਾਲਾ ਚੌਕੀ ਦੇ ਮੁਖੀ ਸੱਤਪਾਲ ਤੇ ਡਾਇਲ 112 ਦੀ ਟੀਮ ਮੌਕੇ 'ਤੇ ਪੁੱਜੀ | ਥਾਣਾ ਸਦਰ ਦੇ ਮੁਖੀ ਸ਼ੈਲੇਂਦਰ ਕੁਮਾਰ ਨੇ ਕਿਹਾ ਕਿ ਮਿ੍ਤਕ ਦੇ ਪਿਤਾ ਕਿ੍ਸ਼ਨ ਦੇ ਬਿਆਨ 'ਤੇ ਇਤਫਾਕੀਆ ਕਾਰਵਾਈ ਕੀਤੀ ਗਈ ਹੈ | ਉਨ੍ਹਾਂ ਕਿਹਾ ਕਿ ਸੁਭਾਸ਼ ਦਿਮਾਗੀ ਤੌਰ 'ਤੇ ਪ੍ਰੇਸ਼ਾਨ ਰਹਿੰਦਾ ਸੀ, ਇਸੇ ਤਹਿਤ ਘਟਨਾ ਤੋਂ ਪਹਿਲਾਂ ਉਸਨੇ ਬੱਚਿਆਂ ਅਤੇ ਪਤਨੀ ਦੀ ਮਾਰ-ਕੁੱਟ ਕੀਤੀ |