ਕਾਲਾ ਸੰਘਿਆਂ, 4 ਅਪ੍ਰੈਲ (ਬਲਜੀਤ ਸਿੰਘ ਸੰਘਾ)-ਸਥਾਨਕ ਕਸਬੇ 'ਚ ਕੁੱਝ ਸਮਾਂ ਪਹਿਲਾਂ ਵਿਦੇਸ਼ ਤੋਂ ਪਰਤੇ ਵਿਅਕਤੀ ਨੂੰ ਸਾਧੂ ਦੇ ਭੇਸ 'ਚ ਲੁਟੇਰੇ ਨੇ 3 ਸਾਥੀਆਂ ਸਮੇਤ ਫ਼ਿਲਮੀ ਅੰਦਾਜ਼ 'ਚ ਸੋਨਾ, ਘੜੀ ਤੇ ਨਕਦੀ ਲੁੱਟ ਲਏ ਜਾਣ ਦਾ ਸਮਾਚਾਰ ਮਿਲਿਆ ਹੈ | ਪੀੜਤ ਵਿਅਕਤੀ ਕਰਨੈਲ ਸਿੰਘ ਪੁੱਤਰ ਪ੍ਰੀਤਮ ਸਿੰਘ ਪਿੰਡ ਆਲਮਗੀਰ ਕਾਲਾ ਸੰਘਿਆਂ ਨੇ ਪੱਤਰਕਾਰ ਨੂੰ ਮਿਲ ਕੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਉਹ ਐਕਟਿਵਾ ਤੇ ਡਾਕਟਰ ਤੋਂ ਦਵਾਈ ਲੈ ਕੇ ਵਾਪਸ ਘਰ ਜਾ ਰਿਹਾ ਸੀ ਕਿ ਰਸਤੇ 'ਚ ਇਕ ਮੋਟਸਾਈਕਲ ਸਵਾਰ ਆਦਮੀ ਤੇ ਔਰਤ ਨੇ ਉਸ ਨੂੰ ਰਸਤਾ ਪੁੱਛਣ ਲਈ ਰੋਕਿਆ ਜਦ ਹੀ ਪਿੱਛੋਂ ਆ ਰਹੇ ਸਾਧੂ ਪਹਿਰਾਵੇ ਵਾਲੇ ਆਦਮੀ ਨੇ ਉਸ ਤੋਂ ਲਿਫਟ ਮੰਗੀ | ਸਾਧੂ ਭੇਸ ਲੁਟੇਰਾ ਉਸ ਸੜਕ ਵੱਲ ਛੱਡ ਦੇਣ ਲਈ ਕਹਿਣ ਲੱਗਾ, ਜਿਸ ਦੌਰਾਨ ਇਕਾਂਤ ਵੇਖ ਕੇ ਉਸ ਦੇ ਬਾਕੀ ਸਾਥੀਆਂ ਮੋਟਰਸਾਈਕਲ ਉਸ ਦੇ ਮੂਹਰੇ ਆ ਕੇ ਲਾ ਦਿੱਤਾ ਅਤੇ ਉਸ ਕੋਲੋਂ 2 ਸੋਨੇ ਦੀਆਂ ਮੁੰਦੀਆਂ, ਘੜੀ ਤੇ 2 ਹਜ਼ਾਰ ਰੁਪਏ ਖੋਹ ਕੇ ਭੱਜ ਗਏ | ਪੀੜਤ ਵਲੋਂ ਸਥਾਨਕ ਪੁਲਿਸ ਨੂੰ ਸੂਚਨਾ ਦੇ ਦਿੱਤੀ ਗਈ | ਪੁਲਿਸ ਤਫ਼ਤੀਸ਼ ਕਰ ਰਹੀ ਹੈ |
