ਨਵੀਂ ਦਿੱਲੀ, 31 ਅਕਤੂਬਰ (ਪੀ.ਟੀ.ਆਈ.)-ਜੰਮੂ-ਕਸ਼ਮੀਰ ਦੇ ਮੁੱਖ ਮੰਤਰੀ ਉਮਰ ਅਬਦੁੱਲਾ ਨੇ ਟੈਲੀਵਿਜ਼ਨ ਪੱਤਰਕਾਰ ਨਿਧੀ ਰਾਜ਼ਦਾਨ ਨਾਲ ਵਿਆਹ ਕਰਵਾ ਲਿਆ ਹੈ। ਇਕ ਟਵੀਟ ਰਾਹੀਂ 56 ਸਾਲਾ ਉਮਰ ਅਬਦੁੱਲਾ ਨੇ ਕਿਹਾ ਕਿ ‘ਕੱਲ੍ਹ ਤੋਂ ਇਕ ਨਵੀਂ ਜ਼ਿੰਦਗੀ ਦਾ ਸਫ਼ਰ ਸ਼ੁਰੂ ਹੋਇਆ ਹੈ। ਇਸ ਟਵੀਟ ਵਿਚ ਉਨ੍ਹਾਂ ਨੇ ਨਿਧੀ ਰਾਜ਼ਦਾਨ ਨੂੰ ਵੀ ਟੈਗ ਕੀਤਾ। ਟਵੀਟ ’ਚ ਦੋਵਾਂ ਦੀਆਂ ਚਾਰ ਤਸਵੀਰਾਂ ਵੀ ਸਾਂਝੀਆਂ ਕੀਤੀਆਂ ਗਈਆਂ। ਸੂਤਰਾਂ ਮੁਤਾਬਕ, ਦੋਵਾਂ ਦਾ ਵਿਆਹ ਸ਼ੁੱਕਰਵਾਰ ਨੂੰ ਇੱਥੇ ਵਿਸ਼ੇਸ਼ ਵਿਆਹ ਕਾਨੂੰਨ ਤਹਿਤ ਹੋਇਆ। ਵਿਆਹ ਸਮੇਂ ਦੋਵਾਂ ਪਰਿਵਾਰਾਂ ਦੇ ਮੈਂਬਰ ਗਵਾਹ ਵਜੋਂ ਮੌਜੂਦ ਸਨ।
ਉਮਰ ਅਬਦੁੱਲਾ ਦੀ ਪਹਿਲੀ ਪਤਨੀ ਪਾਇਲ ਨਾਲ ਵਿਆਹ ਜੁਲਾਈ ਮਹੀਨੇ ’ਚ ਸੁਪਰੀਮ ਕੋਰਟ ਦੇ ਹੁਕਮ ਤੋਂ ਬਾਅਦ ਖ਼ਤਮ ਹੋ ਗਿਆ ਸੀ। ਦੋਵਾਂ ਵਿਚਕਾਰ ਸਮਝੌਤਾ ਹੋਣ ਤੋਂ ਬਾਅਦ ਇਹ ਫ਼ੈਸਲਾ ਆਇਆ ਸੀ। 49 ਸਾਲਾ ਨਿਧੀ ਰਾਜ਼ਦਾਨ ਦਾ ਇਹ ਦੂਜਾ ਵਿਆਹ ਹੈ। ਸ੍ਰੀਨਗਰ ਤੇ ਨਵੀਂ ਦਿੱਲੀ ਵਿਚ ਹੋਏ ਵਿਆਹ ਦੇ ਸਮਾਗਮਾਂ ’ਚ ਦੋਵਾਂ ਪਰਿਵਾਰਾਂ ਦੇ ਮੈਂਬਰਾਂ ਤੇ ਨਜ਼ਦੀਕੀ ਰਿਸ਼ਤੇਦਾਰਾਂ ਨੇ ਸ਼ਿਰਕਤ ਕੀਤੀ। ਉਮਰ ਅਬਦੁੱਲਾ ਦੇ ਮਾਤਾ-ਪਿਤਾ ਫਾਰੂਕ ਅਬਦੁੱਲਾ ਤੇ ਮੌਲੀ, ਉਨ੍ਹਾਂ ਦੀਆਂ ਤਿੰਨ ਭੈਣਾਂ ਤੇ ਹੋਰ ਨਜ਼ਦੀਕੀ ਰਿਸ਼ਤੇਦਾਰ ਸਮਾਗਮ ਵਿਚ ਸ਼ਾਮਲ ਹੋਏ। ਇਸ ਤੋਂ ਇਲਾਵਾ ਨਿਧੀ ਰਜ਼ਦਾਨ ਦੇ ਮਾਤਾ-ਪਿਤਾ, ਸੀਨੀਅਰ ਪੱਤਰਕਾਰ ਐੱਮ. ਕੇ. ਰਾਜ਼ਦਾਨ ਅਤੇ ਸਰਲਾ ਰਜ਼ਦਾਨ ਵੀ ਮੌਜੂਦ ਸਨ।
