15 ਨੂੰ ਹੋਣ ਵਾਲੀ ਨੀਟ ਪੀ.ਜੀ. ਪ੍ਰੀਖਿਆ ਮੁਲਤਵੀ
ਅਜੀਤ ਡੈਸਕ
04-06-2025
ਨਵੀਂ ਦਿੱਲੀ, 3 ਜੂਨ (ਮਿਸਰਦੀਪ ਭਾਟੀਆ)- 15 ਜੂਨ, 2025 ਨੂੰ ਹੋਣ ਵਾਲੀ ਐਨ.ਈ.ਈ.ਟੀ. ਪੀ.ਜੀ. ਪ੍ਰੀਖਿਆ ਮੁਲਤਵੀ ਕਰ ਦਿੱਤੀ ਗਈ ਹੈ | ਐਨ.ਬੀ.ਈ.ਐਮ.ਐਸ. ਵਲੋਂ ਇਹ ਫ਼ੈਸਲਾ ਸੁਪਰੀਮ ਕੋਰਟ ਦੇ ਉਸ ਹੁਕਮ ਤੋਂ ਬਾਅਦ ਆਇਆ ਹੈ, ਜਿਸ ਵਿਚ ਅਦਾਲਤ ਨੇ ਇਕ ਹੀ ਸ਼ਿਫ਼ਟ ਵਿਚ ਪ੍ਰੀਖਿਆ ਕਰਵਾਉਣ ਦਾ ਹੁਕਮ ਦਿੱਤਾ ਸੀ | ਐਨ.ਬੀ.ਈ.ਐਮ.ਐਸ. ਵਲੋਂ ਜਲਦੀ ਹੀ ਨਵੀਆਂ ਪ੍ਰੀਖਿਆ ਤਰੀਕਾਂ ਦਾ ਐਲਾਨ ਕਰ ਦਿੱਤਾ ਜਾਵੇਗਾ | ਜਾਣਕਾਰੀ ਦੇ ਮੁਤਾਬਕ ਪਹਿਲਾਂ ਇਹ ਪ੍ਰੀਖਿਆ 15 ਜੂਨ ਨੂੰ ਹੋਣੀ ਸੀ ਅਤੇ ਇਸ ਲਈ ਪ੍ਰੀਖਿਆ ਕੇਂਦਰਾਂ ਦੀ ਚੋਣ ਤੋਂ ਪਹਿਲਾਂ ਹੋਰ ਤਿਆਰੀਆਂ ਵੀ ਕੀਤੀਆਂ ਗਈਆਂ ਸਨ | ਐਨ.ਬੀ.ਈ.ਐਮ.ਐਸ. ਵਲੋਂ ਪ੍ਰੀਖਿਆ ਮੁਲਤਵੀ ਕਰਨ ਸੰਬੰਧੀ ਇਕ ਬਿਆਨ ਜਾਰੀ ਕੀਤਾ ਗਿਆ | ਜਾਰੀ ਨੋਟੀਫਿਕੇਸ਼ਨ ਵਿਚ ਕਿਹਾ ਗਿਆ ਕਿ ਸੁਪਰੀਮ ਕੋਰਟ ਨੇ ਪ੍ਰੀਖਿਆ ਇਕ ਹੀ ਸ਼ਿਫਟ ਵਿਚ ਕਰਵਾਉਣ ਦੇ ਹੁਕਮ ਦਿੱਤੇ ਹਨ | ਅਜਿਹੀ ਸਥਿਤੀ ਵਿਚ ਬੋਰਡ ਨੂੰ ਹੋਰ ਪ੍ਰੀਖਿਆ ਕੇਂਦਰਾਂ ਦੀ ਭਾਲ ਕਰਨੀ ਪਵੇਗੀ | ਨਾਲ ਹੀ ਬੁਨਿਆਦੀ ਢਾਂਚੇ ਦਾ ਵੀ ਪ੍ਰਬੰਧ ਕਰਨਾ ਪਵੇਗਾ | ਇਸ ਲਈ ਪ੍ਰੀਖਿਆ ਨੂੰ ਫਿਲਹਾਲ ਮੁਲਤਵੀ ਕੀਤਾ ਜਾ ਰਿਹਾ ਹੈ | ਸੋਧੀ ਹੋਈ ਮਿਤੀ ਬੋਰਡ ਵਲੋਂ ਜਲਦੀ ਹੀ ਦੱਸੀ ਜਾਵੇਗੀ |